Ассалому алайкум! Мен турмуш ўртоғим билан 5 йил аввал ажрашганман. Қонуний ажрашганимга эса 2 йил бўлди. Ҳозирда турмуш ўртоғим уйланиб кетган. Яқинда билдимки, қонуний ажрашганим билан турмуш ўртоғим талоғимни бермаса, никоҳ бекор бўлмас экан. Тўғриси ажрашган вақтимизда бир неча марта жавобимни беринг деганимда рози бўлмаган. Қонуний ажрашганим билан талоғингни бермайман деб рози бўлмаган. Мен роса ўйланиб қолдим. Энди мен токи собиқ турмуш ўртоғимдан талоғимни олмагунимча турмушга чиқишим мумкин эмасми? Ҳозир у билан алоқаларим тўлиқ узилиб кетган. Нима қилсам бўлади шу вазиятда. Жавоб учун олдиндан катта раҳмат!
Жавоб: Ва алайкум ассалом! Талоқ лафзи ёки талоқнинг ўрнига ўтадиган кинояли талоқ лафзлари эр томонидан айтиладиган лафзлардир. Шунга кўра, талоқни эр тўғридан-тўғри ўзи амалга ошириши ёки унинг номидан бирор кимга талоқни амалга оширишни топшириши ҳам мумкин. Эрнинг розилиги билан ЗАГС ажратиб, юборса ҳам талоқ ўрнига ўтади. Шундан кейин иддаси чиққанидан сўнг бошқа эрга тегишга ҳақли бўлади. Талоқ қилинган аёл ҳайз кўрадиган бўлса, унинг иддаси уч ҳайздан сўнг, ҳайз кўрмайдиган бўлса, уч ойдан сўнг, ҳомиладор бўлса, ҳомиласини туққанидан сўнг тугайди. Валлоҳу аълам.
ЎМИ фатво ҳайъати
