Фарғона вилоятида фаолият олиб бораётган имом-хатиблар иштирокида йиғилиш ўтказилиб, жорий йил давомида диний-маърифий соҳада амалга оширилган ишлар, эришилган натижалар ва келгусидаги вазифалар муҳокама қилинди.
Йиғилишда таъкидланганидек, жорий йилнинг тўққиз ойи мобайнида Фарғона вилояти диний-маърифий ҳаётида қатор хайрли ва самарали ишлар амалга оширилди. Хусусан, вилоятда 3 та янги масжид фаолияти йўлга қўйилди. Шунингдек, Президентимизнинг алоҳида қарорлари асосида вилоятдаги 33 та масжид таҳоратхоналарида қурилиш-таъмирлаш ишлари бошланди.
Имом-хатибларнинг касбий ва маънавий салоҳиятини ошириш мақсадида турли спорт ва интеллектуал мусобақалар ташкил этилди. Жумладан, имом-хатиблар ўртасида ўтказилган “Заковат” интеллектуал турнирида Марғилон шаҳар жамоаси ғолибликни қўлга киритди. Отинойилар ўртасидаги “Заковат” беллашувида эса Бағдод тумани жамоаси биринчи ўринни эгаллади.
Шунингдек, Қуръони карим мусобақасида ҳам вилоят вакиллари муносиб натижаларга эришди. Унда Фарғона туманидаги “Хўжа Абдуллоҳ” жоме масжиди имом-хатиби Мансуралиев Абдувоҳид ҳамда Данғара туманидаги “Сайид Аҳмадхон ҳожи” жоме масжиди имом ноиби Тешаев Нуруллоҳ ғолибликни қўлга киритди.
Йиғилишда имом-хатибларнинг илмий-маърифий фаолияти ҳам алоҳида эътироф этилди. Жумладан, Марғилон шаҳар бош имом-хатиби Олимов Абдулфаттоҳ домланинг “Набавий мўжизалар ва башоратлар” ҳамда “Робия ҳожи она” масжиди имом-хатиби Раҳматилло домла Файзуллаевнинг “Дил гулустон эмасму” номли китоблари нашр этилгани қайд этилди.
Жорий йилда Фарғона вилоятидан 20 нафар имом-хатиб ва 6 нафар имом ноиби Тошкент ислом институтининг Модул таълим тизимига ўқишга қабул қилинди.
Имом-хатибларнинг оммавий ахборот воситаларидаги фаоллиги ҳам йил давомида сезиларли даражада ошди. Хусусан, улар томонидан ОАВда икки мингга яқин чиқишлар амалга оширилди. Шунингдек, имом-хатиблар 30 мингга яқин маънавий-маърифий тадбирларда фаол иштирок этдилар.
Диний-маърифий соҳадаги самарали хизматлари муносиб эътироф этилди. Жорий йилда вилоятдан 7 нафар имом-хатиб ва имом ноиби Ўзбекистон Республикаси Президентининг “Ўзбекистон Республикаси давлат мустақиллигининг 35 йиллиги” эсдалик нишони билан тақдирланди.
Йиғилишда имом-хатибларнинг хорижий давлатлардаги хизмат сафарлари давомида амалга оширган ишлари ҳам қайд этилди. Жумладан, ватандошлар билан илмий-маърифий суҳбатлар ўтказиш ва учрашувлар ташкил этиш мақсадида 7 нафар имом-хатиб ва 1 нафар имом ноиби АҚШ, Миср, Жанубий Корея, Туркия, Россия, Германия ва Польша давлатларида хизмат сафарларида бўлди.
Шунингдек, 5 нафар имом-хатиб Бирлашган Араб Амирликларининг Дубай шаҳрида Ислом ишлари, вақфлар ва закот бўйича Бош бошқарма томонидан ташкил этилган илмий-амалий ўқув семинарида иштирок этиб қайтди.
Йиғилиш якунида эришилган натижалар билан бир қаторда, келгусида амалга оширилиши лозим бўлган ишлар ҳам белгилаб олинди. Имом-хатиблар зиммасидаги масъулиятли вазифалар, аҳоли билан манзилли ишлаш, диний-маърифий тарғибот самарадорлигини ошириш, ёшлар билан ишлаш ҳамда жамоат билан мулоқотни янада кучайтириш борасидаги устувор вазифаларга алоҳида эътибор қаратилди.
***
Farg‘ona viloyatida faoliyat olib borayotgan imom-xatiblar ishtirokida yig‘ilish o‘tkazilib, joriy yil davomida diniy-maʼrifiy sohada amalga oshirilgan ishlar, erishilgan natijalar va kelgusidagi vazifalar muhokama qilindi.
Yig‘ilishda taʼkidlanganidek, joriy yilning to‘qqiz oyi mobaynida Farg‘ona viloyati diniy-maʼrifiy hayotida qator xayrli va samarali ishlar amalga oshirildi. Xususan, viloyatda 3 ta yangi masjid faoliyati yo‘lga qo‘yildi. Shuningdek, Prezidentimizning alohida qarorlari asosida viloyatdagi 33 ta masjid tahoratxonalarida qurilish-taʼmirlash ishlari boshlandi.
Imom-xatiblarning kasbiy va maʼnaviy salohiyatini oshirish maqsadida turli sport va intellektual musobaqalar tashkil etildi. Jumladan, imom-xatiblar o‘rtasida o‘tkazilgan “Zakovat” intellektual turnirida Marg‘ilon shahar jamoasi g‘oliblikni qo‘lga kiritdi. Otinoyilar o‘rtasidagi “Zakovat” bellashuvida esa Bag‘dod tumani jamoasi birinchi o‘rinni egalladi.
Shuningdek, Qurʼoni karim musobaqasida ham viloyat vakillari munosib natijalarga erishdi. Unda Farg‘ona tumanidagi “Xo‘ja Abdulloh” jome masjidi imom-xatibi Mansuraliyev Abduvohid hamda Dang‘ara tumanidagi “Sayid Ahmadxon hoji” jome masjidi imom noibi Teshayev Nurulloh g‘oliblikni qo‘lga kiritdi.
Yig‘ilishda imom-xatiblarning ilmiy-maʼrifiy faoliyati ham alohida eʼtirof etildi. Jumladan, Marg‘ilon shahar bosh imom-xatibi Olimov Abdulfattoh domlaning “Nabaviy mo‘jizalar va bashoratlar” hamda “Robiya hoji ona” masjidi imom-xatibi Rahmatillo domla Fayzullayevning “Dil guluston emasmu” nomli kitoblari nashr etilgani qayd etildi.
Joriy yilda Farg‘ona viloyatidan 20 nafar imom-xatib va 6 nafar imom noibi Toshkent islom institutining Modul taʼlim tizimiga o‘qishga qabul qilindi.
Imom-xatiblarning ommaviy axborot vositalaridagi faolligi ham yil davomida sezilarli darajada oshdi. Xususan, ular tomonidan OAVda ikki mingga yaqin chiqishlar amalga oshirildi. Shuningdek, imom-xatiblar 30 mingga yaqin maʼnaviy-maʼrifiy tadbirlarda faol ishtirok etdilar.
Diniy-maʼrifiy sohadagi samarali xizmatlari munosib eʼtirof etildi. Joriy yilda viloyatdan 7 nafar imom-xatib va imom noibi O‘zbekiston Respublikasi Prezidentining “O‘zbekiston Respublikasi davlat mustaqilligining 35 yilligi” esdalik nishoni bilan taqdirlandi.
Yig‘ilishda imom-xatiblarning xorijiy davlatlardagi xizmat safarlari davomida amalga oshirgan ishlari ham qayd etildi. Jumladan, vatandoshlar bilan ilmiy-maʼrifiy suhbatlar o‘tkazish va uchrashuvlar tashkil etish maqsadida 7 nafar imom-xatib va 1 nafar imom noibi AQSH, Misr, Janubiy Koreya, Turkiya, Rossiya, Germaniya va Polsha davlatlarida xizmat safarlarida bo‘ldi.
Shuningdek, 5 nafar imom-xatib Birlashgan Arab Amirliklarining Dubay shahrida Islom ishlari, vaqflar va zakot bo‘yicha Bosh boshqarma tomonidan tashkil etilgan ilmiy-amaliy o‘quv seminarida ishtirok etib qaytdi.
Yig‘ilish yakunida erishilgan natijalar bilan bir qatorda, kelgusida amalga oshirilishi lozim bo‘lgan ishlar ham belgilab olindi. Imom-xatiblar zimmasidagi masʼuliyatli vazifalar, aholi bilan manzilli ishlash, diniy-maʼrifiy targ‘ibot samaradorligini oshirish, yoshlar bilan ishlash hamda jamoat bilan muloqotni yanada kuchaytirish borasidagi ustuvor vazifalarga alohida eʼtibor qaratildi.
