Афғонистон пойтахтида 21 октябрь – Ўзбек тили байрами кунига бағишланган адабий-маданий анжуман бўлиб ўтди, деб хабар бермоқда “Дунё” АА.
Тадбирда Афғонистон ҳукумати вакиллари, олий таълим, маориф, ахборот ва маданият вазирликлари, Фанлар академияси масъуллари, ўзбек жамоат ташкилотлари аъзолари, шоир ва ёзувчилар, журналистлар, ўқитувчилар ҳамда талабалар қатнашди.
Очилиш маросимида афғонистонлик олимлар, тилшунослар ва ўқитувчилар мамлакатда Ўзбек тили байрами кенг нишонланаётганидан мамнун эканликларини билдирдилар. Улар Ўзбекистон ҳукуматининг ўзбек тилининг халқаро нуфузини ошириш, миллий анъана ва урф-одатларни оммалаштириш борасидаги саъй-ҳаракатларини юқори баҳоладилар.
Афғонистонлик шоир ва ёзувчи Аҳмад Жовид Фарҳод халқаро майдонда, жумладан, Афғонистонда ҳам ўзбек тилининг аҳамияти ортиб бораётганини қайд этди. У Ўзбек тили куни мамлакатда расмий байрам ҳисобланиши, тил эса ҳар бир халқнинг энг муҳим бойлиги ва миллий қадрияти эканини таъкидлади.
Шоир ва журналист Себгат Сафер нутқида ўзбек тилининг жамият бирлигини мустаҳкамлашдаги ўрнига эътибор қаратди. Унинг сўзларига кўра, тил нафақат халқни бирлаштиради ва тарбиялайди, балки унинг урф-одат ҳамда анъаналарини асраб-авайлашга ҳам хизмат қилади.
“Ўзбек тили буюк давлат арбоби ва мутафаккир Алишер Навоий номи билан чамбарчас боғлиқдир. Тил халқни бирлаштиради, тарбиялайди, ўқитади, урф-одат ва анъаналарни сақлайди. Она тилимиз бойлигини бутун дунёга тараннум этсак, миллатимиз ва бирдамлигимиз янада мустаҳкам бўлади”, – деди у.
У Афғонистонда ўзбек тилининг бойлиги ва ифода имкониятларини очиб бериш билан бир қаторда, уни илмий жиҳатдан ривожлантириш бўйича амалий ишларни давом эттириш зарурлигини таъкидлади.
Ўзбекистоннинг Қобулдаги дипломатлари мамлакатимизда давлат тилини қўллаб-қувватлаш ва ривожлантириш бўйича кўрилаётган чора-тадбирлар ҳақида сўз юритдилар. Ўзбекистон Президенти Шавкат Мирзиёев ташаббуси билан ёш авлодни она тилига ҳурмат ва садоқат руҳида тарбиялаш борасида амалга оширилаётган кенг кўламли ислоҳотларга алоҳида эътибор қаратилди.
Бундан ташқари, иштирокчиларга афғон ёшлари учун яратилган таълим имкониятлари ҳақида маълумот берилди. Хусусан, Сурхондарё вилоятида “Термиз” таълим маркази фаолият юритаётгани, у ерда афғонистонлик талабалар турли йўналишларда таҳсил олишлари ва имтиёзли грантларга эга бўлишлари мумкинлиги таъкидланди.
Маданий дастур доирасида ўзбек тилига бағишланган шеърлар ва Алишер Навоий ғазалларидан парчалар ўқилди, миллий рақслар ижро этилди.
Байрам тадбирлари доирасида ўзбек тилида чоп этилган китоблар тақдимоти, миллий либослар, тасвирий санъат асарлари ва ўзбек миллий таомлари кўргазмалари ҳам бўлиб ўтди.
***
Afg‘oniston poytaxtida 21 oktyabr – O‘zbek tili bayrami kuniga bag‘ishlangan adabiy-madaniy anjuman bo‘lib o‘tdi, deb xabar bermoqda “Dunyo” AA.
Tadbirda Afg‘oniston hukumati vakillari, oliy ta’lim, maorif, axborot va madaniyat vazirliklari, Fanlar akademiyasi mas’ullari, o‘zbek jamoat tashkilotlari a’zolari, shoir va yozuvchilar, jurnalistlar, o‘qituvchilar hamda talabalar qatnashdi.
Ochilish marosimida afg‘onistonlik olimlar, tilshunoslar va o‘qituvchilar mamlakatda O‘zbek tili bayrami keng nishonlanayotganidan mamnun ekanliklarini bildirdilar. Ular O‘zbekiston hukumatining o‘zbek tilining xalqaro nufuzini oshirish, milliy an’ana va urf-odatlarni ommalashtirish borasidagi sa’y-harakatlarini yuqori baholadilar.
Afg‘onistonlik shoir va yozuvchi Ahmad Jovid Farhod xalqaro maydonda, jumladan, Afg‘onistonda ham o‘zbek tilining ahamiyati ortib borayotganini qayd etdi. U O‘zbek tili kuni mamlakatda rasmiy bayram hisoblanishi, til esa har bir xalqning eng muhim boyligi va milliy qadriyati ekanini ta’kidladi.
Shoir va jurnalist Sebgat Safer nutqida o‘zbek tilining jamiyat birligini mustahkamlashdagi o‘rniga e’tibor qaratdi. Uning so‘zlariga ko‘ra, til nafaqat xalqni birlashtiradi va tarbiyalaydi, balki uning urf-odat hamda an’analarini asrab-avaylashga ham xizmat qiladi.
“O‘zbek tili buyuk davlat arbobi va mutafakkir Alisher Navoiy nomi bilan chambarchas bog‘liqdir. Til xalqni birlashtiradi, tarbiyalaydi, o‘qitadi, urf-odat va an’analarni saqlaydi. Ona tilimiz boyligini butun dunyoga tarannum etsak, millatimiz va birdamligimiz yanada mustahkam bo‘ladi”, – dedi u.
U Afg‘onistonda o‘zbek tilining boyligi va ifoda imkoniyatlarini ochib berish bilan bir qatorda, uni ilmiy jihatdan rivojlantirish bo‘yicha amaliy ishlarni davom ettirish zarurligini ta’kidladi.
O‘zbekistonning Qobuldagi diplomatlari mamlakatimizda davlat tilini qo‘llab-quvvatlash va rivojlantirish bo‘yicha ko‘rilayotgan chora-tadbirlar haqida so‘z yuritdilar. O‘zbekiston Prezidenti Shavkat Mirziyoyev tashabbusi bilan yosh avlodni ona tiliga hurmat va sadoqat ruhida tarbiyalash borasida amalga oshirilayotgan keng ko‘lamli islohotlarga alohida e’tibor qaratildi.
Bundan tashqari, ishtirokchilarga afg‘on yoshlari uchun yaratilgan ta’lim imkoniyatlari haqida ma’lumot berildi. Xususan, Surxondaryo viloyatida “Termiz” ta’lim markazi faoliyat yuritayotgani, u yerda afg‘onistonlik talabalar turli yo‘nalishlarda tahsil olishlari va imtiyozli grantlarga ega bo‘lishlari mumkinligi ta’kidlandi.
Madaniy dastur doirasida o‘zbek tiliga bag‘ishlangan she’rlar va Alisher Navoiy g‘azallaridan parchalar o‘qildi, milliy raqslar ijro etildi.
Bayram tadbirlari doirasida o‘zbek tilida chop etilgan kitoblar taqdimoti, milliy liboslar, tasviriy san’at asarlari va o‘zbek milliy taomlari ko‘rgazmalari ham bo‘lib o‘tdi.
