Айни дамда синовли кунларни юртдошларимиз Аллоҳнинг муборак ойларидан бири – Рамазон ойининг гўзал ибодати билан ўтказмоқдалар. Рамазон ойи бутун ислом олами учун тоат-ибодат, сахийлик, раҳмат ва барака мавсуми ҳисобланади. Бу муборак ой қалбимиз ва руҳимизни поклайдиган, бир-бирмизга меҳр-оқибат, мурувват кўрсатадиган ойдир. Рамазон ойида қилинган хайрли ишларга бошқа ойдагиларга нисбатан жуда кўп савоб ёзилиши муборак ҳадисларда айтилган: “Умматим ҳар қайси ойда қилган яхши амали учун бир савоб олади. Аммо Рамазон ойида битта эзгу амал учун ўндан то етти юзгача ва ундан ҳам зиёда ажр берилади”.
Динимиз буюрган хайрли амалларга узукка қўйилган кўздек ярашиб тушган “Саховат ва кўмак” умумхалқ ҳаракати доирасида олиб борилаётган тадбирлар халқимиз бирдамлигини, меҳр-оқибатимизни яққол намоён этмоқда. Вилоятимизда ҳам вилоят бош имом хатиби У.Абдуллаев бошчилигида барча диний соҳа вакиллари ҳам бу ҳаракатда фаол иштирок этмоқдалар.
Карантин тадбирлари бошлангандан буён вилоятдаги тадбиркор отинойилар томонидан йигирма беш мингдан зиёд ниқоблар тарқатилди. Айниқса, карантин қоидаларига риоя қилиб, ЎМИ уламолар кенгашининг баёнотини ҳалқимизга тўлиқ етказиш борасида отинойилар ўз ҳудудларида тарғибот ишларини олиб бормоқдалар. Вилоятда фаолият кўрсатаётган отинойиларимиз тарафидан ҳомийларни жалб қилган ҳолда жами эллик миллион сўмлик хайриялар амалга оширилди.
Юртимизда ҳеч ким эътибордан четда эмас. Аёлларимизни карантиндаги вақтларини унумли ўтказишлари учун ҳудудларда отинойилар томонидан бадиий ва диний адабиётлар хадя қилинди. Қилинган хайр-эҳсонлар, албатта, ўз эгасига Аллоҳ тарафидан бериладаган ажр савобларни келтиради.
Ҳар биримиз бу ойнинг фазилатларидан умидвор ҳолда, қилаётган ибодатларимизни Аллоҳ даргоҳида қабул қилсин! Рамазон ойида барча юртдошларимиз томонидан амалга оширилаётган ибодатлар, хайр-саховатлар ҳаққи ҳурмати Яратган юртимизга тинчлик омонлик, хотиржамлик барокат ато этсин! Бу муборак кунларди чин маънода ҳам руҳан ҳам жисмонан покланиш бахтини барчамизга насиб этсин!
Ҳилолахон КОМИЛОВА,
Фарғона вилояти бош имом-хатибининг хотин-қизлар
масалалари бўйича ёрдамчиси
