Рамазон ойи синовли кунларни бошидан кечираётган халқимиз қалбига фараҳ ва хурсандчилик олиб келди, десак муболаға бўлмайди. Рамазон шундай қадрли ва ғанимат ойдирки, унда тутилган рўзанинг савобини бевосита Аллоҳ таолонинг Ўзи беради. Рамазон ойи гуноҳлар мағфират қилинадиган, раҳм-шафқат кўрсатиладиган ва дўзахдан озод қилинадиган, Аллоҳ ва Расулининг буйруқларини бажаришда, қайтариқларидан қайтишда ва синов-имтиҳонга учраганда сабр-тоқатли ва чидамли бўлишни ўрганадиган, ўзаро бирдамлик, меҳрибонлик кўрсатиладиган, инсонлар бир-бирлари ҳақида қайғуриб, хато-камчиликларини кечирадиган, хайрли ишларда ҳамкорлик қилинадиган, мусулмонлар бир-бирини қўллайдиган ойдир. Шунингдек, Рамазон тенглик ойи бўлиб, бу ойда қариялар зиёрат қилинади, беморлардан хабар олинади, муҳтожларга ёрдам берилади, мусибатзада инсонлардан кўнгил сўралади ва етимлар овутилиб, юпатилади.
Рамазон ойи – раҳмат ойи!
Бу ойда Аллоҳнинг раҳмати бошқа ойлардагидан кўра кўпроқ ёғилади. Масжидлар, уйлар, кўчаларни раҳмат чулғаб олади. Атроф бошқа ойлардагидан кўра ўзгача файзли кўринади. Пайғамбаримиз Муҳаммад соллаллоҳу алайҳи васаллам ушбу ҳадислари орқали ҳам бунга ишора қилганлар:
“Рамазон ойининг биринчи кечаси кирганда шайтонлар ва ёмонлик қилгувчи жинлар кишанланади. Дўзахнинг барча эшиклари беркитилиб, унинг бирорта ҳам эшиги очиқ қолмайди. Шунингдек, жаннатнинг ҳамма эшиклари очилиб, унинг бирорта ҳам эшиги ёпиқ қолмайди. Унда бир жарчи: Эй яхшилик истовчи, яхшилик қилишга шошил, эй ёмонлик истовчи ёмонликдан ўзингни тий. Бу кунларда Аллоҳ дўзахдан кўпчиликни озод қилади – деб нидо қилиб туради. Бу нидо ҳар кеча такрорланади”.
Рамазон – савоблар кўпайтириб бериладиган ой!
Салмон Форсий розияллоҳу анҳудан ривоят қилинган ҳадисда Пайғамбаримиз Муҳаммад соллаллоҳу алайҳи васаллам: “У ойда ким бирор бир нафл амал қилса, бошқа ойда фарз амални адо қилган билан тенг бўлади. Кимда ким бу ойда бирорта фарз амални адо этса, бошқа ойда етмишта фарз амални адо қилган билан тенг бўлади”, дея марҳамат қилганлар. Шундай экан, мўмин киши бу ойда каттами-кичик, яхши амал қилишга ошиқиб, бу кунларни ғанимат билиши лозим ва лобуддир.
Бу ойда барчамиз ён-атрофимиздаги инсонларга, етимлар, бевалар, камбағаллар, қариндошлар, қўшниларга тилимиз билан ҳам, қўлимиз билан ҳам яхшилик қилишга уринамиз. Эҳсон-садақаларимиз кўпаяди. Закот берамиз. Диндошларимизнинг кўнглини кўтаришга, Рамазонни хушкайфиятда ўтказишлари учун шароит қилиб беришга ҳаракат қиламиз. Шунинг учун ҳам Рамазон ойининг яна бир фазилатидан бири бу – хайру эҳсон улашиладиган ой!
Рамазон солиҳ амаллар кўпаядиган ой!
Бу ойда Қуръони каримни кўп тиловат қилинади, Аллоҳ таолони зикр кўпайтирилади, нафл ибодатларни кўпайтирилади, олимлар, фозиллар ва яқинларни зиёрат қилиб, дуоси олинади, мискинларга садақа бериб, рўзадорга ифторлик қилиб беришнинг фазилатлари бисёрдир. Шу ўринда қайд этиш лозимки, айни кунларда юртимизда карантин чекловлари амалда бўлгани боис, муборак Рамазон ойида рўзадорларга ифторлик қилиб беришни ният қилган мусулмонлар ифторликни савобига эришиш учун қийналган, ночор оилаларга тақдим қилишлари айни муддао бўлади. Чунки карантин қоидаларини бузишда инсон саломатлигига зарари эҳтимоли мавжудлиги учун бу шаръий жиҳатдан ҳам тўғри бўлмайди.
Рамазон дуолар ижобат бўладиган ой!
Бу ойда кўпроқ дуо қилишимиз керак. Айниқса, Қуръони каримни хатм қилганимиздан сўнг дуога ҳарис бўлишимиз керак. Саҳарликка турган чоғимизда, ифторлик асносида кўпроқ дуо қилишга интилишимиз айни муддаодир.
Юқоридаги ва бошқа кўплаб ишлар сабабидан биз Рамазон ойини яхши кўрамиз, соғинамиз, кутамиз, бу ойдан чиқсак, маҳзун бўламиз.
Аллоҳ таоло барчамизга Рамазон ойини муборакли қилиб, бу ойда кўп ибодат қилишимизни, гуноҳлари кечирилган, дуолари ижобат этилган, мартабаси кўтарилган, Аллоҳга қурбат ҳосил қилган бандалардан бўлиб чиқишимизни насиб этсин, омин! Устмизда турган синовли кунларни бу ойнинг шарофатидан Аллоҳ таоло тезроқ аритсин!
Убайдуллоҳ АБДУЛЛАЕВ,
Фарғона вилояти бош имом-хатиби