Маълумки, Ислом дини тинчлик ва поклик динидир. Бу динга эътиқод қилувчилар доимо бир-бирларига меҳр-оқибат, тинчлик-саломатлик улашиб келган. Муқаддас динимизда инсонлар қонини тўкиш, молига тажовуз қилиш оғир гуноҳ саналади. Ҳаттоки инсонларга озор бериш, ўрталарини бузиш, бузғунчилик ишларини қилиш ҳам қаттиқ қораланади. Бу ҳақда Яратган Зот ўзининг каломида шундай марҳамат қилган: “Фитна – қатл этишдан ҳам ёмонроқдир” (Бақара сураси, 191-оят) дейилган.
Демак, ояти каримадан кўриниб турибдики, инсонлар орасида фитна уруғини сочиш ҳаттоки одам ўлдиришдан кўра гуноҳи оғирроқ экан. Ҳар бир мусулмон инсон турли фитналардан, бузғунчилик, динда фитнага тушиш, хусусан бир жамиятда яшовчи инсонлар ўртасида тафриқа солиш, бузғунчи фикр ва ботил ғояларни тарқатиш каби ношаръий амаллардан эҳтиёт бўлмоғи керак. Юртимизда яшовчи барча миллат ва халқлар бир-бирлари билан тинч-тотув яшашга интилмоғи, оила, фарзанд тарбиясида муҳим бўлган одоб-ахлоқ нормаларига риоя этмоғи даркор.
Инсон ҳавойи нафсига эргашиши ва ниятининг бузуқ бўлиши инсонни кўр ва кар қилиб қўяди. Унинг эгасига ёмонни яхши, яхшини ёмон деб кўрсатади. Аллоҳ ва Унинг Расули йўлига юрмайди, балки нафси буюрганига эргашади, диний таълимотларга гумон ва шубҳа билан муносабатда бўлади. Динда ортиқча ғулув-чуқур кетишлик ёки ҳаддан ташқари бепарволикка боришлик ҳам инсонни адаштиради. Инсонлар доимо огоҳ бўлсагина ўзининг келажагига ақл билан теран назар ташласа, келиши ёки содир бўлиши мумкин бўлган фитна-фасод, ҳавф-хатар, урушларни олдини олган бўлади.
Аксинча ғофил, лоқайд бўлган кимса эса атрофида нималар содир бўлаётганига ҳам эътибор бермай охир оқибат турли бало ва мусибатларга дучор бўлади. Айниқса, ҳозирга вақтларда турли интернет сайтлари орқали тарқалаётган асоси йўқ баъзи бир хабарлар инсонни янада хушёрликка чақиради. Чет элларда туриб миллатимизга, динимизга тўғри келмайдиган турли маълумотлар билан ёшларни ўз домига тортаётган, инсонларни бир-бирига қарши қилиб қўяётган бузуқ ниятли инсонлардан ёшларни асрамоғимиз керак.
Ўсиб келаётган фарзандларимизга одоб-ахлоқ, таълим-тарбия бераётганимизда насихат қилиб, Ватанган садоқатли, ота-онага хурмат, оиласи, ўсиб улғайган жамиятига муҳаббатли бўлиш каби фазилатларни онгига сингдира олсак, турли бузғунчи ишларни олдини олган бўламиз.
Шавкатжон БОТИРОВ,
Данғара тумани “Саййид Аҳмадхон ҳожи” масжиди ноиби-имоми
