Сўзимнинг аввалида барча юртдошларимизни Ватанимиз истиқлолининг 35 йиллиги билан самимий муборакбод этаман. Аллоҳ таоло юртимизни тинч, осмонимизни мусаффо, халқимизни осуда ва фаровон қилсин!
Мустақиллик — миллат ҳаётидаги энг улуғ неъматлардан биридир. Зеро, истиқлол туфайли халқ ўз тақдирини ўзи белгилаш, миллий қадриятлари, тили, тарихи ва маънавий меросини асраб-авайлаш, келажагини эркин ва мустақил равишда барпо этиш имконига эга бўлади.
Шу маънода, истиқлолни фақат бир сана ёки байрам сифатида эмас, балки зиммамизга юкланган улкан масъулият сифатида ҳам англашимиз лозим. Зеро, Ватан озодлиги ва тинчлигини асраш, унинг тараққиётига ҳисса қўшиш ҳар бир фуқаронинг муқаддас бурчидир.
Ўтган 35 йил давомида юртимиз ҳаётининг турли соҳаларида кенг кўламли ўзгариш ва янгиланишлар амалга оширилди. Таълим, тиббиёт, иқтисодиёт, инфратузилма, хусусан, маънавий ва маърифий соҳаларда янги имкониятлар яратилди.
Айниқса, кейинги йилларда инсон қадри, унинг ҳуқуқ ва манфаатларини таъминлаш, ёшларга таълим ва тарбия бериш, оилаларни қўллаб-қувватлаш, маҳаллаларда ижтимоий муҳитни яхшилашга алоҳида эътибор қаратилмоқда.
Бу жараёнларда маънавий-маърифий соҳадаги янгиланишлар ҳам алоҳида аҳамият касб этмоқда. Диний-маърифий соҳада амалга оширилаётган ишлар натижасида янги масжидлар, Қуръони карим ва тажвид курслари ҳамда маърифий мажмуалар барпо этилмоқда. Жумладан, жорий йилда Фарғона вилоятининг Қўқон шаҳрида “Масжидул Латиф”, Қўштепа туманида “Умар ибн Хаттоб” ва Ёзёвон туманида “Ал-Фарғоний” жоме масжидлари фаолият бошлади. Қўқон шаҳрида янги “Қуръони карим ва тажвид ўргатиш курси” иш бошлаши билан вилоятдаги бундай курслар сони учтага етди. Бу ишлар юртимизда диний-маърифий ҳаёт учун яратилаётган имкониятларнинг амалий ифодасидир.
Марғилон шаҳридаги “Бурҳониддин Марғиноний” мажмуаси ҳудудида Ислом ҳуқуқшунослиги институтини барпо этиш ишларининг бошлангани ҳам юртимизда буюк аждодларимизнинг илмий-маънавий меросини ўрганиш ва ривожлантиришга қаратилаётган эътиборнинг яна бир намунасидир.
Истиқлол ҳақида сўз юритар эканмиз, аввало, тинчлик ва хотиржамликнинг қадрини англашимиз керак. Ислом дини инсон ҳаёти, мол-мулки, оиласи ва қадр-қимматининг дахлсизлигини улуғлайди. Қуръони каримда Аллоҳ таоло инсонларга тинчлик ва омонликнинг қадрини англатиб, Ўзининг неъматларига шукр қилишга чақиради. “Қурайш” сурасида эса инсонларга очликдан тўйдириш ва хавфдан хотиржам қилиш неъматлари эслатилади.
Демак, тинч юртда яшаш — улкан неъмат. Уни қадрлаш эса фақат сўз билан эмас, балки яхши ният, ҳалол меҳнат, ўзаро ҳурмат, бағрикенглик ва жамият осойишталигига ҳисса қўшиш билан намоён бўлади.
Шу боис юртимиздаги тинчлик ва осойишталикни асраш, турли низо ва адоватларга йўл қўймаслик, фарзандларимизни Ватанга муҳаббат, илм-маърифат ва эзгулик руҳида тарбиялаш барчамизнинг вазифамиздир.
Шукр — берилган неъматни қадрлаш, уни эзгулик йўлида ишлатиш ва янада кўп яхшилик қилишга интилишдир. Қуръони каримда: “Агар шукр қилсангиз, албатта, сизга зиёда қиламан” деб марҳамат қилинган (Иброҳим сураси, 7-оят).
Бугунги тинч ва осуда ҳаётимизнинг қадрига етиш, уни асраш ва келажак авлодларга муносиб ҳолда етказиш барчамизнинг бурчимиздир.
Истиқлол бизга эркин яшаш билан бирга, Ватан олдидаги масъулиятни ҳам берди. Энди ҳар биримиз ўз касбимиз, билимимиз, ҳалол меҳнатимиз ва яхши амалларимиз билан юртимиз тараққиётига ҳисса қўшишимиз керак.
Айниқса, ёш авлодга истиқлолнинг қадрини англатиш, улар қалбида Ватанга муҳаббат, тинчликка садоқат, илмга интилиш ва эзгуликка иштиёқни шакллантириш муҳим вазифалардан биридир.
Аллоҳ таоло юртимизга тинчлик ва хотиржамлик, хонадонларимизга файзу барака, халқимизга фаровонлик ато этсин. Истиқлолимизни янада мустаҳкамлаш, Ватанимиз тараққиёти ва халқимиз фаровонлиги йўлида барчамизни ҳамжиҳат ва фидойи қилсин.
Мустақиллигимиз абадий, юртимиз тинч, халқимиз фаровон бўлсин!
Убайдуллоҳ Абдуллаев,
Фарғона вилояти бош имом хатиби
Уламолар кенгаши аъзоси
«Янги Фарғона» газетасининг мустақилигимизнинг 35 йиллик байрамига бағишланган махсус сони
***
So‘zimning avvalida barcha yurtdoshlarimizni Vatanimiz istiqlolining 35 yilligi bilan samimiy muborakbod etaman. Alloh taolo yurtimizni tinch, osmonimizni musaffo, xalqimizni osuda va farovon qilsin!
Mustaqillik — millat hayotidagi eng ulug‘ neʼmatlardan biridir. Zero, istiqlol tufayli xalq o‘z taqdirini o‘zi belgilash, milliy qadriyatlari, tili, tarixi va maʼnaviy merosini asrab-avaylash, kelajagini erkin va mustaqil ravishda barpo etish imkoniga ega bo‘ladi.
Shu maʼnoda, istiqlolni faqat bir sana yoki bayram sifatida emas, balki zimmamizga yuklangan ulkan masʼuliyat sifatida ham anglashimiz lozim. Zero, Vatan ozodligi va tinchligini asrash, uning taraqqiyotiga hissa qo‘shish har bir fuqaroning muqaddas burchidir.
O‘tgan 35 yil davomida yurtimiz hayotining turli sohalarida keng ko‘lamli o‘zgarish va yangilanishlar amalga oshirildi. Taʼlim, tibbiyot, iqtisodiyot, infratuzilma, xususan, maʼnaviy va maʼrifiy sohalarda yangi imkoniyatlar yaratildi.
Ayniqsa, keyingi yillarda inson qadri, uning huquq va manfaatlarini taʼminlash, yoshlarga taʼlim va tarbiya berish, oilalarni qo‘llab-quvvatlash, mahallalarda ijtimoiy muhitni yaxshilashga alohida eʼtibor qaratilmoqda.
Bu jarayonlarda maʼnaviy-maʼrifiy sohadagi yangilanishlar ham alohida ahamiyat kasb etmoqda. Diniy-maʼrifiy sohada amalga oshirilayotgan ishlar natijasida yangi masjidlar, Qurʼoni karim va tajvid kurslari hamda maʼrifiy majmualar barpo etilmoqda. Jumladan, joriy yilda Farg‘ona viloyatining Qo‘qon shahrida “Masjidul Latif”, Qo‘shtepa tumanida “Umar ibn Xattob” va Yozyovon tumanida “Al-Farg‘oniy” jome masjidlari faoliyat boshladi. Qo‘qon shahrida yangi “Qurʼoni karim va tajvid o‘rgatish kursi” ish boshlashi bilan viloyatdagi bunday kurslar soni uchtaga yetdi. Bu ishlar yurtimizda diniy-maʼrifiy hayot uchun yaratilayotgan imkoniyatlarning amaliy ifodasidir.
Marg‘ilon shahridagi “Burhoniddin Marg‘inoniy” majmuasi hududida Islom huquqshunosligi institutini barpo etish ishlarining boshlangani ham yurtimizda buyuk ajdodlarimizning ilmiy-maʼnaviy merosini o‘rganish va rivojlantirishga qaratilayotgan eʼtiborning yana bir namunasidir.
Istiqlol haqida so‘z yuritar ekanmiz, avvalo, tinchlik va xotirjamlikning qadrini anglashimiz kerak. Islom dini inson hayoti, mol-mulki, oilasi va qadr-qimmatining daxlsizligini ulug‘laydi. Qurʼoni karimda Alloh taolo insonlarga tinchlik va omonlikning qadrini anglatib, O‘zining neʼmatlariga shukr qilishga chaqiradi. “Quraysh” surasida esa insonlarga ochlikdan to‘ydirish va xavfdan xotirjam qilish neʼmatlari eslatiladi.
Demak, tinch yurtda yashash — ulkan neʼmat. Uni qadrlash esa faqat so‘z bilan emas, balki yaxshi niyat, halol mehnat, o‘zaro hurmat, bag‘rikenglik va jamiyat osoyishtaligiga hissa qo‘shish bilan namoyon bo‘ladi.
Shu bois yurtimizdagi tinchlik va osoyishtalikni asrash, turli nizo va adovatlarga yo‘l qo‘ymaslik, farzandlarimizni Vatanga muhabbat, ilm-maʼrifat va ezgulik ruhida tarbiyalash barchamizning vazifamizdir.
Shukr — berilgan neʼmatni qadrlash, uni ezgulik yo‘lida ishlatish va yanada ko‘p yaxshilik qilishga intilishdir. Qurʼoni karimda: “Agar shukr qilsangiz, albatta, sizga ziyoda qilaman” deb marhamat qilingan (Ibrohim surasi, 7-oyat).
Bugungi tinch va osuda hayotimizning qadriga yetish, uni asrash va kelajak avlodlarga munosib holda yetkazish barchamizning burchimizdir.
Istiqlol bizga erkin yashash bilan birga, Vatan oldidagi masʼuliyatni ham berdi. Endi har birimiz o‘z kasbimiz, bilimimiz, halol mehnatimiz va yaxshi amallarimiz bilan yurtimiz taraqqiyotiga hissa qo‘shishimiz kerak.
Ayniqsa, yosh avlodga istiqlolning qadrini anglatish, ular qalbida Vatanga muhabbat, tinchlikka sadoqat, ilmga intilish va ezgulikka ishtiyoqni shakllantirish muhim vazifalardan biridir.
Alloh taolo yurtimizga tinchlik va xotirjamlik, xonadonlarimizga fayzu baraka, xalqimizga farovonlik ato etsin. Istiqlolimizni yanada mustahkamlash, Vatanimiz taraqqiyoti va xalqimiz farovonligi yo‘lida barchamizni hamjihat va fidoyi qilsin.
Mustaqilligimiz abadiy, yurtimiz tinch, xalqimiz farovon bo‘lsin!
Ubaydulloh Abdullayev,
Farg‘ona viloyati bosh imom xatibi
Ulamolar kengashi aʼzosi
«Yangi Farg‘ona» gazetasining mustaqiligimizning 35 yillik bayramiga bag‘ishlangan 60 sahifali maxsus soni
