Аллоҳ таолога беадад шукрлар бўлсинки, мамлакатимиз мустақил деб эълон қилингандан буён ўтган қисқа вақт давомида юртимиз фуқаролари ҳаётида кўплаб янги ўзгаришлар содир бўлди. Ушбу ислоҳотлар ичида энг каттаси ва шукри таҳсинга сазовори – мўмин-мусулмонларнинг диний ҳаётидаги ўзгаришлардир.
Дарҳақиқат, йиллар давомида ота-боболаримиз эришолмай келган орзу- умидларини кўриш сизу бизларга насиб этди. Ўтган вақт давомида кўплаб янги масжидлар, ўнлаб мадраса ва олий диний таълим муассасалари очилди. Юртимиз фуқароларидан ҳар йили минглаб мусулмонлар ҳаж ва умра зиёратига ҳеч қандай тўсиқсиз бориб келмоқдалар. Муборак Рамазон ва Қурбон ҳайитлари ҳукумат томонидан қонуний тарзда дам олиш куни сифатида белгилаб берилди.
Аллоҳ таоло Қуръони карим оятларида: “Агар Аллоҳнинг неъматларини санасангизлар, саноғига ета олмайсизлар. Албатта, Аллоҳ мағфиратли ва рахмли зотдир” дея эслатади.
Ҳа, Аллоҳнинг бандаларига берган неъматлари сон-саноқсиз. Аслида инсон зоти ўзига берилган неъматларни ҳисоблашга уринса, санаб-саноғига ета олмаслиги айни ҳақиқат. Аммо кишини ўйлантирадиган масала эса, шундай сон-саноқсиз неъматларнинг шукрини ҳар ким адо қила олмаётганидир. Агар Аллоҳ ҳамма неъматлари учун тўла-тўкис шукрни талаб этганида, биз бандалар ҳоли қандай кечган бўларди?
Ҳар нарсанинг ҳақиқий эгаси Аллоҳ эканини билган мўмин иймон, соғлиқ, гўзаллик, илм билан бирга, Аллоҳдан етган мусибат, кўнгилсизлик каби синовларга ҳам шукр қила олган бўлармиди?
Пайғамбаримиз алайҳиссалом марҳамат қиладилар: “Икки неъмат борки, кўп одамлар унинг қадрига етмайдилар: сиҳат-саломатлик ва хотиржамликдир”.
Бошқа бир сўзларида эса: “Мўминнинг иши ажойиб-да, Унинг ҳамма иши ўзига фойда. Агар унга бир яхшилик келса, шукр қилади ва унга (шукрига) яхшилик бўлади. Агар бошига ёмонлик етиб, унга сабр қилса, бу ҳам унга яхшилик бўлади”.
А.Йўлдашев,
Учкўприк тумани “Икром ҳожи” масжиди имом-хатиби
