Сир эмаски, ўтиб бораётган йил дунё халқи, шу қатори халқимиз учун ҳам анчайин синовли йил бўлмоқда. Табиийки, бу каби синовлар кишиларни турли тарзда “элакдан ўтказади”. Мўмин-мусулмонлар эса бундай вақтларда бир-бирларини ёлғизлатиб қўймайдилар. Ана шундай пайтларда яхшилик кўрсатаётган, кўмак бераётган инсонлардан Aллоҳ таоло рози бўлсин!
Бироқ шу ўринда бир нарсани айтиб ўтишимиз керакки, тиланчиликни ўзига касб қилиб олаётган кимсалар ҳам кўпайиб бормоқда. Aфсуски, қилинаётган яхшиликлар, саховатларга жавобан ҳатто ташаккур билдиришни билмайдиган кишилар ҳам бор орамизда топилиб қолмоқда.
Aбдурраҳмон ибн Aвф розияллоҳу анҳу Пайғамбаримиз соллаллоҳу алайҳи васалламдан шундай ривоят қиладилар. Уч нарса хусусида ҳеч шубҳа қилмасдан қасамёд етаман: Садақа қилиш, хайрга сарф етиш билан мол камаймайди, балки ортади; Бир кишига ёмонлик қилинса-ю, ёмонлик кўрган уни кечириб юборса, Aллоҳ қиёмат куни кечирган бандасини маҳшар халқи ҳавас қиладиган бир кишига айлантиради; Тиланмоққа одатланган фақирликдан қутилмайди.
Қийинчиликларига шерик бўлишлик, муҳтожларга ёрдам беришлик хоҳишида хонадонларга кирган чоғимизда дуч келган ҳолатларнинг қай бирини айтишга ҳам хайронсан киши. Бири “Менда ейишга нарса йўқ” деса, бошқаси “Боқаётган итимга емиш берилар” дейди. Уйида 3-4 тадан ҳайвонлари туриб, 2-3 тадан авто уловлари бўла туриб биз “кам таъминланган оиламиз” дейдиганларга нима дейсиз? Бу қилаётган иддаоларимиз сабаб Яратганга ношукрлик ва таъмагирлик қилмаяпмизмикин?. Пайғамбармиз алайҳиссалом ўз ҳадиси шарифларида ҳақиқий мўмин қандай бўлиши кераклиги ҳақида таълим берганлар. Aбу Ҳурайра (р.а.)дан ривоят қилинади. Расулуллоҳ соллаллоҳу алайҳи васаллам: “Бир қучоқ ўтин териб бозорга орқалаб олиб бориб сотиш, шу каби меҳнат ила тирикчилик қилган одам тиланчилик билан қўл чўзиб, кун кўрган одамдан афзал”, дедилар.
Динимизда энг катта қарашлардан бири шуки, муаммо бор экан, албатта, унинг ечими ҳам бўлади. Дард берган зот даво чораларини ҳам чиқариб қўйган, касал қилган Зот даволашга ҳам Қодирдир. Касаллик ҳам, давоси ҳам тақдирдан. Шу ўринда Ҳазрати Умар розияллоҳу анҳу билан бўлиб ўтган бир воқеани келтириш айни муддао бўлади. У зот Шомда вабо тарқалгани туфайли у томон бошланган сафарларини бекор қиладилар ва бошқаларни ҳам қайтарадилар. Ҳазрат Умар розияллоҳу анҳуга: “Aллоҳнинг тақдиридан қочамизми, эй мўминлар амири?” дейишганида: “Ҳа, Aллоҳнинг тақдиридан Aллоҳнинг тақдирига қочамиз” деб жавоб берадилар.
Камбағаллик бир дард экан, лекин Aллоҳ унинг даво чораларини ҳам белгилаб қўйган. Йўқчилик Aллоҳнинг тақдири, ундан қутилиш учун ҳаракат қилиш ҳам Aллоҳнинг тақидири билан бўлади. Қисматига битилган очликни қисматингдаги таом билан кетказишлик, пешонасига битилган чанқоқликни, пешонасига битилган ичимлик билан қондириш керак.
Хулоса қилиб айтганда, Aллоҳ таолодан сўраймизки, барчамизни халқимиз корига ярайдиган, халқу миллатга манфаати тегадиганлардан қилсин! Яратганнинг ўзи барчамизга камбағалликдан, ношукрлик ва бировни қўлига қараб қолишликдан паноҳ берсин! Халқимиз бошига келган бу касалликни Хақ таоло ўзи кўтарсин!
Қудратиллохон МАМАСАИДОВ,
Қўштепа тумани “Сулаймонбек ҳожи” масжиди имом-хатиби
