Инсон баъзида билиб-билмай гуноҳга, хатога йўл қўяди. Гуноҳ эса кишини икки дунё саодатидан бебаҳра бўлишига сабаб бўлади. Меҳрибон Роббимиз Аллоҳ ўз бандаларига бундай ҳолларда гуноҳларига тавба қилиш, уларга каффорат ўташ йўлларини ҳам таълимини берган. Бева-бечоралар, фақир-фуқаролар, етим-есирлар ва муҳтожларга мурувват қилиш ҳам шулар жумласидандир.
Расулуллоҳ соллаллоҳу алайҳи васаллам саховатда тенги йўқ зот эдилар. Айниқса, Рамазон ойи келганидан у зотнинг саховатлари янада ортиб кетарди.
Муқаддас динимизнинг ана шундай таълимотини ўзларига дастак қилган имом-хатиблар ҳам муборак ойни ғанимат билган ҳолда жамиятда ёрдамга муҳтож, кексалар ва беморлар, шунингдек, бир қанча кўнгли ўксик азизларнинг хонадонларига ташриф уюштириб, улар ҳолидан хабар олмоқдалар. Жумладан, Қўштепа туманида фаолият олиб бораётган имом-хатиблар ҳам ана шундай меҳрга ташна кўнгиллар узра малҳам бўлиб, уларга озиқ-овқат ва кийим кечаклар улашдилар.
Зеро, Икрима (р.а.)дан нақл қилинган ривоятда шундай дейилади: Расулуллоҳ соллаллоҳу алайҳи васаллам Оиша розияллоҳу анҳога: «Садақа қил эй Оиша, бир дона хурмо бериб бўлса ҳам. Чунки у оч қолганни тўйдиради ва худди сув оловни ўчирганидек, хатони ўчиради», дедилар.
Қадрдоним! Аллоҳнинг раҳмати ва мағфирати ёғилиб турган бу муборак ойда сиз уларни унутмадингизми?! Эҳтимол, сизни қўни-қўшнингиз, яқин дўстингиз, қавму қариндошингиз, ҳатто ака-ука ёҳуд опа-синглингиз кутаётгандир… Балки уларни моддий жиҳатдан қўллаб-қувватлай олмассиз. Бироқ биргина ширин сўз ҳам катта яхшиликдир. Фурсатни бой берманг…
Раҳматуллоҳ ЖАЛИЛОВ,
Вакиллик матбуот хизмати
