Ўзбекистон халқаро ислом академияси ҳузуридаги Малака ошириш марказида 18-30-январ кунлари республикада фаолият олиб бораётган бош имом-хатиблар учун 72 соатлик малака ошириш ўқувлари бўлиб ўтди. “Янги Ўзбекистон – янгича дунёқараш” йўналишида олиб борилган машғулотларда 214 нафар тингловчи иштирок этди.
Машғулотларни Вазирлар Маҳкамаси ҳузуридаги Дин ишлари бўйича қўмита, Давлат бошқаруви академияси, Ўзбекистон халқаро ислом академиясидан етакчи профессор-ўқитувчилар ва илмий тадқиқотчилар олиб бордилар.
Бугун, мазкур машғулотлар якунига етди. Унда Фарғона вилояти бош имом-хатиби Убайдуллоҳ домла Абдуллаев бошчилигидаги бир гуруҳ бош имом-хатиблар ҳам ўқув-машғулотларида иштирок этиб, дарсларни муваффақиятли тарзда тамомладилар.
Шунингдек, имом-хатиблар Тошкент шаҳрида қад ростлаётган Ўзбекистондаги Ислом цивилизацияси маркази биносининг қурилиш жараёни ва бу ерда олиб борилаётган бунёдкорлик ишлари билан яқиндан танишдилар. Имом-хатибларга марказнинг мақсад ва вазифалари, келгусидаги режалари ҳақида маълумот берилди.