05.03.2020 йил санасида жойланди
Оиша розияллоҳу анҳо айтадилар: «Одамлар Расулуллоҳ соллаллоҳу алайҳи васалламдан фолбинлар ҳақида сўрашди. У зот: «Улар ҳақ эмаслар», дедилар. Улар: «Ё Расулуллоҳ, улар гоҳида шундай гапларни айтадиларки, у ҳақ бўлиб чиқади», дейишди. Расулуллоҳ соллаллоҳу алайҳи васаллам: «Бу ҳақ калимани жин ўғирлаб, ўғринча билиб олади-да, уни дўсти фолбиннинг қулоғига қуяди. Фолбинлар эса унга юзта ёлғонни аралаштириб юборадилар», дедилар (Муттафақун алайҳ).
Али ибн Абу Толиб розияллоҳу анҳу айтадилар: «Фолбин – сеҳргар, сеҳргар эса кофирдир».
Минг афсуски, ҳозирги пайтда сеҳр ва фолбинлик ҳаётимизга жуда ҳам чуқур кириб борган. Фолбинлар эшиги олдида узун навбат турганлигининг гувоҳи бўлишимиз мумкин. Навбатда турган аёллар ва эркаклар ўзларининг турли ҳаётий муаммоларига жавоб топаман ва ечими мушкул бўлган ишимни осон ҳал қиламан, деб эътиқод қиладилар, ўйлайдилар. Лекин улар қаттиқ адашувда эканликларини англамайдилар ҳам.
Восила ибн Асқаъ розияллоҳу анҳудан ривоят қилинади: «Расулуллоҳ соллаллоҳу алайҳи васалламнинг «Ким фолбиннинг ҳузурига келиб, ундан бирор нарсани сўраса, қирқ кечагача тавбаси тўсилади. Агар фолбиннинг гапига ишонса, кофир бўлади», деганларини эшитдим (Тобароний ривоят қилган).
Бетоб бўлса ҳам фолбинга, бирор нарсаси йўқолса ҳам фолбинга, иши юришмаса ҳам фолбинга, қизига совчи келмай қолса ёҳуд ўғлига қиз топилмаса ҳам фолбинга югурадиган ва умуман ҳаётини фолбинларсиз тасаввур қила олмайдиган юртдошларимизга хитобимиз шуки, Аллоҳдан қўрқинг! Муҳаммад соллаллоҳу алайҳи васаллам қайтарган ва охири абадий дўзах бўладиган йўлни тарк этинг! Пайғамбаримиз Аллоҳ таоло ҳар бир одамнинг тақдирини уларни яратишидан эллик минг йил олдин ёзиб қўйганини айтиб кетганлар. Бу тақдирни ҳеч ким ўзгартира олмайди. Фолбинларга қатнаётган опаларимиз, сингилларимизнинг шу бугунданоқ бу йўлдан қайтишлари лозим.
Ўзингиз ўйлаб кўринг, нима учун фолбинлар ҳамиша хор ва ғарибхоналарда яшашади. Нима сабабдан улар келажакни айтиб бериш учун ўзларида журъат топишади-ю, оёқлари остида турган конларни топиб, бойиб кетмайдилар. Майли, бу ҳам оғирдир, нега биргина лоторея қоғозини олиб, ноль бутун мингдан бир миллиметр нарида турган ёзувни ўқиб, “Каптива” ёки “Малибу” эгаси бўлиб олишмайди, нега?! Чунки улар келажакни ҳеч қачон била олишмайди.
Аллоҳ таоло Қуръони каримда бу илм фақат Ўзида эканлигини айтган. Аллоҳ таоло билан фақат Аллоҳгагина тегишли бўлган илмни талашаётган бандалар, албатта, хор бўлажак. Шу жирканч маҳлуқларнинг олдига бориб, иймон-у эътиқодни поймол қилмайлик, азизлар. Кимки шу ишни қилган бўлса, шу бугуноқ тавба қилсин, Аллоҳ кечирувчи Зот. Улгура олмай қолса, қиёматда Муҳаммад соллаллоҳу алайҳи васалламга тушган динда бўлмайди. Кофирнинг жойи эса абадий жаҳаннамдир. Бундан Аллоҳнинг Ўзи асрасин!
Рашиджон НУРАЛИЕВ,
Фурқат тумани “Чилгижийда” масжиди имом-хатиби
