Бир куни подшоҳ ўз аёнлари билан кемада денгиз сафарига йўл олди. Одатда саёҳатга подшоҳнинг хизматкор ва қуллари ҳам бирга чиқишарди. Хизматкорлар ичида умрида денгизни кўрмаган бир қул, кема ҳаракатланганида қўрқиб бақира бошлабди. У тинмай дод-вой қилар, бир неча киши огоҳлантиришларига қарамай, “чўкиб кетяпмиз” деб бақираверибди. Уни тинчлантиришнинг ҳеч иложи бўлмади. Қулнинг кема чайқалишидан баланд овозда бақириб-чақиришидан подшоҳнинг ҳаловати йўқолди. Кемадаги доно кишилардан бири подшоҳга:
– Подшоҳим, рухсат берсангиз, уни жим қила оламан, – деди.
Подшоҳ жуда хурсанд бўлишини айтди. Подшоҳнинг рухсати билан доно киши қулни денгизга ташлашни буюрибди. Сузишни билмаган қул денгизда жон ҳолича ёрдам беришларини янада бақириб сўрарди. Қулнинг сувда чўкаётганини кўрган доно киши:
– Бўлди, етади. Уни олиб чиқинглар, – деди.
Доно кишининг сўзига биноан қулни денгиздан олиб чиқишди. Қул уни олиб чиққанларга раҳмат айтиб, чўкмай қолганига шукр қилиб бир чеккада тинчгина ўтирибди.
Доно кишининг бу иши подшоҳга ёқди. Подшоҳ табассум билан қараб:
– Бу қулни қандай қилиб жим қилдинг? Доно киши жавоб берди:
– Ўтирган жойида бақириб-чақирган бу қул умрида денгиз сафарига чиқмаган. Шунинг учун кемадаги ҳузур-ҳаловатнинг қадрини билмади. Бу қул каби тинчлик ва хотиржамликнинг қадрини фақат уни йўқотганлар билади. Одамнинг бошига бир кулфат ва дард келсагина ҳузурнинг ва роҳатнинг қадрига етади. Қиссадан ҳисса шуки, ушбу дорул омон кунлар, тинчлик неъматини қадрига етиб, уни асраб авайлашимиз керак.
Тинчлик ва хотиржамлик Аллоҳ таолонинг буюк илоҳий неъматларидан биридир. Аллоҳ таоло бандаларини ўзаро иттифоқликда, аҳилликда, тинчлик-омонликда яшашга даъват этиб, шундай марҳамат қилади:
“Агар мўминлардан икки тоифа ўзаро урушиб қолсалар, дарҳол улар ўртасини ислоҳ этингиз!” (Ҳужурот сураси, 9-оят).
Биз мўмин-мусулмонлар Аллоҳнинг марҳаматидан умидвор бўлсак, Унинг чақириғига итоат этиб, юртимиз ва хонадонимиз тинчлиги, ҳаётимиз фаровонлиги учун саъй-ҳаракат қилмоғимиз лозим.
Муҳтарам Президентимиз Шавкат Мирзиёевнинг куни кеча БМТ Бош Ассамблеяси 72-сесссиясида нуфузли минбардан туриб сўзлаган нутқларида “Ислом дини бизни эзгулик ва тинчликка, асл инсоний фазилатларни асраб-авайлашга даъват этади”, деб таъкидладилар ва барча иштирокчи давлатлар вакиллари эътиборини қаратдилар.
Дарҳақиқат, инсон огоҳ бўлсагина ўзининг келажагига теран назар билан боқади, келиши мумкин бўлган хавфу хатарни келмасидан олдин бартараф қилиш ҳаракатида бўлади.
Инсон учун тинчлик ва хотиржамлик зарур ва бу муқаддас динимизнинг ҳамда давримизнинг муҳим талаби албатта. Бу ҳусусида Пайғамбаримиз Муҳаммад солаллоҳу алайҳи васаллам яна бир ҳадисларида шундай деганлар: “Ким оиласи тинч, жасади саломат ва ҳузурида бир кунлик таоми бор ҳолатда тонг оттирса, унга дунё тўлиғича берилибди” (Имом Бухорий “Ал-адаб ал-муфрад” китобида ривоят қилган).
Ушбу хадисда биз учун энг муҳим бўлган уч нарсани зикр қилиняпти. Тинчлик, саломатлик ва моддий таъминот. Аллоҳга ҳамдлар бўлсин, бугун бу неъматларнинг барчасига эришиб турибмиз. Бардавом бўлиши учун эса, уни сақлашимиз ва қалб, тил ва аъзолар билан шукр қилишимиз лозим бўлади.
Динимизда буюрилган энг яхши амаллардан бири тинчлик ҳукм суриб турган жойга яна тинчлик сўраб дуо қилишдир.
Зеро, Аллоҳ таоло бундай дейди: «Агар (берган неъматларимга) шукр қилсангиз, албатта, (уларни янада) зиёда қилурман» (Иброҳим сураси, 7-оят).
Шунинг учун ҳам биз юртимизда ҳукм сураётган тинчлик, хотиржамликни сақлаш, уни турли хил ғаразли хуруж ва ҳамлалардан, фитна ва бўҳтонлардан ҳимоя қилишимиз ва доимо сергак ва ҳушёр туриш зарурлигини ёдда тутмоқ даркордир. Шундай экан, жонажон тинч юртимизга кўз тегмасин, Аллоҳ таоло тинчлик-осойишталигимизни ҳамиша барқарор ва бардавом айласин!
Раҳматилло МАДАМИНОВ,
Қўштепа тумани “Эшонгузар” масжиди имом-ноиби
