Аллоҳнинг муҳаббатига ва Ўзига яқин бўлишга олиб борувчи, Расулуллоҳ соллаллоҳу алайҳи васалламнинг суннатлари, тақводорларнинг завқи ва солиҳларнинг одати бўлган бу намозни кўпчилик эътибордан четда қолдиради.
Кимки ушбу намозни ўқиса мусибат ва ташвишлардан, ғам-ғуссалардан қутилади, қашшоқлик кўрмайди, ҳар бир дардига шифо топади. Охиратда эса Аллоҳ таоло Ўз раҳмати ва мағфирати ила Жаннатига киритур: “Иймон келтириб, яхши амалларни қилганларни остидан анҳорлар оқиб турган жаннатларга киритурмиз. Унда абадий – бардавом қолурлар. Аллоҳнинг ваъдаси ҳақдир. Аллоҳдан ростгўйроқ зот борми?” (Нисо сураси, 122-оят).
Савол: Бу қандай намоз? У қандай адо этилади?
Шайх Маҳмуд Убайдий айтади: “Бу тунги намоз бўлиб, у фарз намозлардан кейинги энг яхши намозлардан бири ҳисобланади. Чунки Расулуллоҳ соллаллоҳу алайҳи васаллам: “Фарз намоздан кейинги энг афзал намоз тунги намоздир”, деганлар (Имом Муслим ривояти).
Қолаверса, Аллоҳ таоло Ўзининг солиҳ бандалари қаторида тунги намозни ўқийдиганларни алоҳида мадҳ этган: “Улар тунларни Роббиларига сажда қилиб, бедор ўтказадилар” (Фурқон сураси, 64-оят).
Бошқа оятда Аллоҳ таоло бундай марҳамат қилган: “Албатта, тақводорлар жаннатлар ва булоқлардадир. Роббилари берган нарсаларни олувчилардир. Чунки улар бундан олдин эҳсон қилувчилардан бўлганлардир. Улар кечалари оз ухлар эдилар” (Зориёт сураси, 15-17-оятлар).
Шунинг учун ушбу намозни тарк этмаслик ва эътибордан четда қолдирмаслик керак”.
Расулуллоҳ соллаллоҳу алайҳи васаллам: “Кечанинг қиёмини лозим тутинг. Чунки у сизлардан олдин ўтган солиҳларнинг одатидир. У Роббингизга қурбат, ёмонликларга каффорот, гуноҳлардан қайтарувчидир”, дедилар.
Бошқа ҳадисда Набий алайҳиссалом: “У жисмдан дардни кетказувчидир” деганлар.
Агар ушбу мақолани ўқиб бўлсангиз, Аллоҳ таолони зикр қилинг (Субҳаналлоҳи ва биҳамдиҳи) ва яқинларингиз билан баҳам кўринг.
Даврон НУРМУҲАММАД
***
Allohning muhabbatiga va O‘ziga yaqin bo‘lishga olib boruvchi, Rasululloh sollallohu alayhi vasallamning sunnatlari, taqvodorlarning zavqi va solihlarning odati bo‘lgan bu namozni ko‘pchilik e’tibordan chetda qoldiradi.
Kimki ushbu namozni o‘qisa musibat va tashvishlardan, g‘am-g‘ussalardan qutiladi, qashshoqlik ko‘rmaydi, har bir dardiga shifo topadi. Oxiratda esa Alloh taolo O‘z rahmati va mag‘firati ila Jannatiga kiritur: “Iymon keltirib, yaxshi amallarni qilganlarni ostidan anhorlar oqib turgan jannatlarga kiriturmiz. Unda abadiy – bardavom qolurlar. Allohning va’dasi haqdir. Allohdan rostgo‘yroq zot bormi?” (Niso surasi, 122-oyat).
Savol: Bu qanday namoz? U qanday ado etiladi?
Shayx Mahmud Ubaydiy aytadi: “Bu tungi namoz bo‘lib, u farz namozlardan keyingi eng yaxshi namozlardan biri hisoblanadi. Chunki Rasululloh sollallohu alayhi vasallam: “Farz namozdan keyingi eng afzal namoz tungi namozdir”, deganlar (Imom Muslim rivoyati).
Qolaversa, Alloh taolo O‘zining solih bandalari qatorida tungi namozni o‘qiydiganlarni alohida madh etgan: “Ular tunlarni Robbilariga sajda qilib, bedor o‘tkazadilar” (Furqon surasi, 64-oyat).
Boshqa oyatda Alloh taolo bunday marhamat qilgan: “Albatta, taqvodorlar jannatlar va buloqlardadir. Robbilari bergan narsalarni oluvchilardir. Chunki ular bundan oldin ehson qiluvchilardan bo‘lganlardir. Ular kechalari oz uxlar edilar” (Zoriyot surasi, 15-17-oyatlar).
Shuning uchun ushbu namozni tark etmaslik va e’tibordan chetda qoldirmaslik kerak”.
Rasululloh sollallohu alayhi vasallam: “Kechaning qiyomini lozim tuting. Chunki u sizlardan oldin o‘tgan solihlarning odatidir. U Robbingizga qurbat, yomonliklarga kafforot, gunohlardan qaytaruvchidir”, dedilar.
Boshqa hadisda Nabiy alayhissalom: “U jismdan dardni ketkazuvchidir” deganlar.
Agar ushbu maqolani o‘qib bo‘lsangiz, Alloh taoloni zikr qiling (Subhanallohi va bihamdihi) va yaqinlaringiz bilan baham ko‘ring.
Davron NURMUHAMMAD
