Бугун дунё бўйлаб тарқалаётган коронавирус инфекцияси юртимизни ҳам четлаб ўтмади. Республика махсус комиссияси ҳамда мутасаддилар томонидан ушбу касалликни енгиб ўтиш учун, аввало, ваҳима ва саросимага тушмай берилаётган кўрсатмаларга сўзсиз амал қилиш бот-бот такрорланмоқда.
Шундай экан, барчамиз бир бўлиб, бу бало кўтарилишига ўз ҳиссамизни қўшишимиз даркор. Мутухассислар уйда ўтиришни тавсия қилмоқдами, заруратсиз кўчага чиқмайлик. Юзга ниқоб тақиб юринглар, деб тавсия қилинаяптими, демак шундай қилишимиз зарур. Уламоларимиз дуою зикрлар, тиловату Қуръонлар ва эҳсонлар қилишга тавсия қиляптиларми, лаббай деб қўлдан келганча бу борада ҳам ёрдам берсак, айни муддао бўлади!
Афсуски, ҳали ҳам бу тартиб ва тадбирларни жиддий қабул қилмаётган, бу ҳолатга парда ортидан қараётганлар учраяпти. Тўғри, тушкунликка, ваҳимага тушиш керак эмас, лекин бу эҳтиёт чораларини кўрмасдан ўзини жар ёқасига ташлаш керак дегани ҳам эмас-ку, ахир!
Вабо тарқалганда тиббиёт мутахассислари нимани тавсия этаётган бўлса, шунга амал қилиш, эҳтиёт чораларини кўриш шариат томонидан ҳам қўллаб қувватланади. Ҳозирги ҳолатда юзга ниқоб тақиб юриш, заруратсиз уйдан чиқмаслик, мабодо кўчага чиқиб келса, қўлларни ва юзларни ювиш, жамоат жойларидан узоқроқ бўлиш айни шариатга амал қилиш ҳисобланади. Зеро, Қуръони каримда Аллоҳ таоло шундай марҳамат қилади:
“Эй, имон келтирганлар! Аллоҳга итоат этингиз, Пайғамбарга ва ўзларингиздан (бўлмиш) бошлиқларга итоат этингиз! Борди-ю, бирор нарсада (дин ишида) келиша олмай қолсангиз – Аллоҳга ва охират кунига ишонадиган бўлсангиз – уни Аллоҳга ва Пайғамбарига ҳавола қилингиз. Мана шу яхшироқ ва ечими чиройлироқ (иш)дир” (Нисо сураси, 59-оят).
Яна бир бошқа оятда Аллоҳ таоло шундай марҳамат қилган:
“Бас улар мана шу Байтнинг Роббига ибодат қилсинлар! У уларни очликдан тўқ қилган ва хавфдан омон сақлагандир” (Қурайш сураси, 3-4 оятлар).
Демак, хавфдан омон сақловчи – Аллоҳ, хавфдан омон бўлиш сабаби эса Унга ибодат қилмоқдир.
Уламолар инсон бошига келган мусибат, балолардан сақланиш учун қуйидаги ҳадисга амал қилишни тавсия қилганлар:
Расулуллоҳ соллаллоҳу алайҳи васаллам: “Бирор бир банда ҳар тонгда ва тунда: “Бисмиллаҳиллазий ла язурру маъасмиҳи шайун фил арзи ва ла фис-самаи ва ҳувас самийъул алийм”, деб уч марта айтса, унга бирор нарса зарар бермайди”, дедилар.
Маъноси: Аллоҳнинг исми билан бошлайман. Унинг исми туфайли еру осмонда бирор нарса зарар бера олмайди. У эшитувчи ва билувчи Зотдир.
Аллоҳ таоло бу балони дунёдан кўтарсин! Барчамизни Ўз ҳифзида сақласин! Касалларимизга мукаммал шифо берсин! Вабо билан касалланганларнинг сони кўпайишининг олдини олсин! Аллоҳим масжидларимизни тезда очилишини ва Рамазонда таровеҳларни жамоат бўлиб, хатми Қуръонларда иштирок этишимизни насиб этсин!
Улуғбек ТОЖИЕВ,
Риштон тумани “Бўжай” масжиди имом-хатиби
