Ҳар куни эрталаб мен, ўғлим, турмуш ўртоғим ниқоб тақиб боғимиз томон йўл оламиз. Кўчалар салқин, тинч, осуда. Қушларнинг чиғир-чиғирлари эшитилади. Қишлоғимиз чиройли, атрофга қараб, баҳри дилинг очилади. Кўчада болалар, ҳатто катталар ҳам кўринмайди. Лекин, ҳамма ўз ҳовлисида тинмай меҳнатда. Бутун дунёга “чанг” солаётган коронавирус бизнинг қишлоғимизга ҳам ўз таъсирини кўрсатган.
Менинг соддагина меҳнаткаш қишлоқдошларим ўтган йилгидан кўра ҳам икки ҳисса кўпроқ жидду-жаҳд билан ўз томорқаларига экин экиш билан банд.
Муҳтарам президентимизнинг халқимизга қилган мурожаатидан тўғри хулоса чиқариб, халқ учун қилаётган меҳрибонлигидан руҳланиб, меҳнат қилмоқдалар. Кимдир томорқасига картошка, кимдир помидор, яна кимдир қалампир булғор, қўйинки бўш ётган ернинг ўзи қолмаяпти.
Биз ҳам иккита иссиқхонамизда помидор етиштирмоқдамиз. Боғларимиз остига ловия, картошка, макка ва бошқа экинлар экиб парвариш қилмоқдамиз. Қишлоғимизда ишлар қизғин, ҳаёт давом этмоқда. Қишлоғимиздаги ҳар бир оила ўз томорқасидан ўз келажаги пойдеворини мустаҳкамлашга уринмоқда. Фақат яқинларимизнинг соғинчи бор холос. Албатта, озгина сабр қилсак, бу кунлар ҳам ўтмишга айланади.
Бугунги мана шундай бутун дунё давлатларини бошига тушган синовли кунларда Ўзбекистонда туғилиб ўсганимдан ҳамда шу ўлкада яшаётганлигимдан беҳад бахтиёрман. “Аллоҳ таоло қайсики бандаларини севса, ўша бандалари учун одил подшоҳ юборар экан”, деб эшитган эдим. Бизга мана шундай қалби осмонлардай кенг, қудрати тоғларданда улкан, меҳри қуёшданда тафтлироқ юртбоши насиб этганлиги учун Аллоҳга беадад шукроналар айтаман.
Шундай юртбошимиз бор эканки, кўнглимиз тўқ, хотиржам меҳнат қилаяпмиз. Буни ҳар доим фарзандларимиз онгига ҳам сингдириб, келажак авлодларда ватан ҳиссини мустаҳкамлаб боришимиз зарур.
Халқимиз бахтига муҳтарам юртбошимиз, унинг олдида бир сафда туриб, биз учун жон куйдираётган барча соҳа мутасаддилари, ҳаётимизнинг ҳозирги қаҳрамонлари бўлмиш Шифокорлар омон бўлишсин!
Зулфия СОДИҚОВА,
Ёзёвон тумани “Қорасой” маҳалла фуқаролар йиғини отинойиси
