Аллоҳ таоло инсонни азиз ва мукаррам қилиб яратган. Айниқса, аёлнинг пойи жаннатни тўшаб, мақомини юксак эътироф ила эъзозлади. Аёл, аввало она, садоқатли бека, фарзандларнинг жонкуяри. Мамлакатимизда ҳам аёлларимиз учун яратилаётган имкониятлар, бугунги кунда хотин-қизлармизни жамиятнинг ҳар бир соҳасида фаолликларини кўриб қувонасан киши.
Лекин минг афсуслар бўлсинки, шундай эътирофга сазовор бўлган аёлларимизнинг ўтаётган асримизда одам савдоси деб аталмиш иллатнинг қурбонига айланиб қолаётганлиги кишини ташвишга солади. Айниқса, уларнинг орасида ёш қизларнинг борлиги жуда ачинарли. Бу ҳам етмагандай, интернет тармоқларида танишиб, бир-икки ой гаплашиб, чет элларга турмушга чиқиб кетаётган қизларимиз ҳам кўпайиб бормокда.
Доно халқимизда «ҳар ерни қилма орзу, ҳар ерда бор тошу тарозу» деган пур маъно ҳикмат бор. Нопок кимсаларнинг алдовига учиб, ўзга юртларда хору зор бўлаётган, туну кун ишлаб иш ҳақини ололмаётган, соғлигидан ва диёнатидан ажраган юртдошларимиз хақида ҳар куни оммавий ахборот воситалари ва телевидение орқали маълумотга эга бўлсакда, булар бизга ибрат бўлмаётгандек гўё.
Аллоҳ таоло бандаларига фақат енгилликни хоҳлайди. Қуръони каримда бундай марҳамат қилинади: «Аллоҳ сизларга енгилликни истайди, оғирликни эмас» (Бақара сураси, 185-оят).
Аммо баъзи нодонликлари боис ўйламай қилинган ҳатти-ҳаракатлари сабаб, ҳатто ширин жонларини хатарга қўйишмоқда. Бир маротаба бериладиган қимматли умр йилларини бой беришмокда. Оқибатда оилалар вайрон, фарзандлар ноқобил бўлиб улғайиши авж олишига замин яратилмоқда.
БМТ маълумотига кўра ҳар йили икки миллион етти юз мингга яқин киши одам савдоси қурбони бўлмокда. Қанчадан-қанча аёлларимиз фарзандлари, хонадонлари ҳатто турмуш ўртоқларидан йироқда бойлик орттириш мақсадида қул сифатида бегона юртларда сарсон саргардон бўлмокда. Асосан дунё орзу ҳаваси, ҳавойи нафс, катта тўйлар қилиш орзуси уларни бегона юртларда хор бўлиб юришга мажбур этмоқда.
Шундай экан, узоқдаги ялтираган саробдан кўра, яқиндаги берилган неъматларни қадрлайлик! Бахтни олисдаги бойликдан эмас, меҳнат ва сабрдан қидирайлик!
Ҳилолахон Комилова,
Фарғона вилояти бош отинойиси
