Маҳмуд Ғазнавий Исломни ёйиш учун Ҳиндистонга 18 марта сафар қилган. Шу сафарларнинг бирида қўшин шиддатли қаршиликка дуч келди. Бу оғир ҳолдан қутулиш учун султон Аллоҳга шундай ниёз этди: “Эй Роббим, сен ёрдам берувчисан, бизларга ёрдам бер. Агар ушбу жангда ғолиб чиқсам, қўлга киритган ўлжамнинг ҳаммасини фақирларга тарқатаман”.
Маҳмуд Ғазнавий бу жангда ғалаба қозониб, қўлга киритилган ҳазиналарни ғариб-мискинларга тарқата бошлабди. Лекин, султоннинг ёнидаги вазирлар бу ҳолдан хурсанд бўлмай, султонга:
— Султоним, нималар қиляпсиз? Шунча бойликни фақир-фуқарога тарқатиладими? Улар бунинг қийматини билармиди? Давлатнинг эса бу ҳазиналарга эҳтиёжи бор, — деб фикр билдирибдилар.
Султон Маҳмуд бу сўзларни тинглагач, иккиланиб қолиб, замона олимига бу ҳолни англатибди. Олим Маҳмуд Ғазнавийга бундай маслаҳат берибди:
— Султоним! Бу ерда иккиланадиган нарсанинг ўзи йўқ. Жуда оддий танлов олдида турибсиз. Агар Аллоҳга бошқа ишингиз тушмайдиган бўлса, марҳамат вазирларингиз айтганини қилиб, ўлжаларни ҳазинага жойланг. Агар Аллоҳга яна ишингиз тушадиган бўлса, сўзингиз устидан чиқиб, ўлжани фақирларга улашинг.
Ҳикмат: Қийинчилик дамларда берилган ваъдалар енгиллик дамларда унутилмаслиги лозим. Яна қийинчилик кунлар келмайди деб ҳеч ким кафолат бера олмайди. Жаноби Расули акрам алайҳис салом айтадилар: “Мунофиқнинг аломати учта: гапирса ёлғон гапиради, ваъдасида хилоф қилади, омонатга хиёнат қилади”.
Эътибор беринг! Машаққат пайтида Аллоҳни эслаймиз-у, бемалол пайтда эса Аллоҳни унутамизми? Агар шундай қилсак, бу ишимиз тўғри эканидан далолатми? Халқ орасида бир гап юради: “Сувдан ўтгунча қозоним худойи”. Бу гап асли хато эканини билишимиз зарур. Аллоҳ барчамизни тўғри йўлдан адаштирмасин!
Ҳ.Эсоналиев,
Фарғона тумани “Тўрахон ҳожи” масжиди имом-ноиби
