Савол: Ассалому алайкум!
— Қуръони каримда динининг баъзисини сотувчилар ҳақида зикр қилинган экан. Шулар ҳақида малумот берсангиз.
Жавоб: Ва алайкум ассалом!
— Аҳли китоблар дунё матоҳини қўлга киритиш эвазига Аллоҳ таолонинг оятларини ва ҳукмларини ўзгартиришган. Бу билан улар Аллоҳнинг ғазабига дучор бўлишган. Мусулмонлар ҳам шундай жиноятга йўл қўймасликлари учун Қуръони каримнинг кўплаб оятларида уларнинг мазкур қилмишларини кескин танқид қилиб келтирган. Жумладан: Оли Имрон сурасида шундай деган:
إِنَّ الَّذِينَ يَشْتَرُونَ بِعَهْدِ اللَّهِ وَأَيْمَانِهِمْ ثَمَنًا قَلِيلًا أُولَئِكَ لَا خَلَاقَ لَهُمْ فِي الْآَخِرَةِ وَلَا يُكَلِّمُهُمُ اللَّهُ وَلَا يَنْظُرُ إِلَيْهِمْ يَوْمَ الْقِيَامَةِ وَلَا يُزَكِّيهِمْ وَلَهُمْ عَذَابٌ أَلِيمٌ
«Аллоҳга берган аҳдлари ва қасамларини озгина баҳога алмаштирадиган кимсалар учун охиратда ҳеч қандай насиба йўқдир. (Қиёмат куни) Аллоҳ улар билан гаплашмайди, уларга (раҳмат назари билан) боқмайди ва уларни оқламайди ҳам. Улар учун аламли азоб бордир» (77-оят).
Бу ояти карима Таврот ва Инжил китобларидаги Пайғамбаримиз алайҳиссаломга тааллуқли оятларни ҳамда Аллоҳ таолонинг ҳукмларини олиб ташлаган ёки ўзгартирган аҳли китоблар ҳақида нозил бўлган. Улар Муҳаммад алайҳиссалом пайғамбар бўлиб танилмасларидан олдин, агар у дунёга келса, албатта, унга имон келтирамиз ва ёрдам берамиз деб қасамёд этган эдилар.
Бошқа бир ояти каримада:
وَإِذْ أَخَذَ اللَّهُ مِيثَاقَ الَّذِينَ أُوتُوا الْكِتَابَ لَتُبَيِّنُنَّهُ لِلنَّاسِ وَلَا تَكْتُمُونَهُ فَنَبَذُوهُ وَرَاءَ ظُهُورِهِمْ وَاشْتَرَوْا بِهِ ثَمَنًا قَلِيلًا فَبِئْسَ مَا يَشْتَرُونَ
«Эсланг, (эй, Муҳаммад!) Аллоҳ аҳли китоблардан, уни (Таврот ва Инжилни) одамларга, албатта, аниқ баён қиласиз, уни (ҳеч кимдан) сир тутмайсиз, деб аҳд олган эди. Лекин, улар уни (берган ваъдаларини) ортларига улоқтириб, озгина баҳога уни сотиб юбордилар. Бу савдолари нақадар нохуш!» (Оли Имрон сураси, 187-оят).
Аллоҳ таолонинг ушбу оятлардаги хитоби гарчи аҳли китобларга қаратилган бўлсада, диний китоблардаги барча маълумотни диндорларга тўла ҳолда етказишнинг зарурлиги барча Ислом уламоларига ҳам тааллуқлидир. Шунинг учун Уламолар Ислом шариатининг барча аҳкомларини қандай бўлса, шундайлигича етказишлари зиммаларидаги улкан бурчдир. Уни ҳаргиз яшириб ёки ўзгартириб одамларни ва ўзларини алдамасликлари лозим. Акс ҳолда Қиёмат кунида аламли азобга дучор бўлишлари мумкин (Аллоҳ сақласин). Ҳадиси шарифлардан бирида Набий алайҳиссалом: «Ким бир илмдан сўралса-ю, у ўшани яширса, Қиёмат куни оловдан бўлган юган билан юганланади», деганлар (Имом Табароний ривоятлари). Валлоҳу аълам.
ЎМИ Фатво ҳайъати