Буюк ватандошимиз Бурхониддин Марғилоний ҳазратлари ўзларининг “Ҳидоя” асарларида шундай дейдилар: “Ўз вақтидан кечикиб қилинган инъом-эҳсон маҳкам тортилган занжир мисоли бўғувчидир”.
Бу ҳикматдан қуйидагича ибрат оламиз. Ҳар қандай яхшиликни вақтида қилиш лозим. Масалан, ота-онани борида қадрлаш керак. Аслида уларни зиёратига этишда кўп нарса талаб этилмайди. Икки оғиз ширин сўз ва бизни соғ-саломатлигимиз уларга таскин беради. Бир дона иссиқ нону, бир пиёла қаймоқ улар кўнглини тоғдек кўтаради. Лекин улар тириклигида шу каби хизматларни қилмай, оламдан ўтгандан кейин эҳсон ва хайриялар қилиш одат тусига айланган. Қанийди, бу эҳсонларнинг бир қисми ота-онамиз тириклик вақтида бўлганида, Бурҳониддин Марғилон ҳазратлари айтганларидек вақтида қилинган эҳсон бўларди.
Биз мавзуга доир биргина мисолни келтириш билан чекландик, аммо Бурхониддин Марғилоний ҳазратларининг “Ўз вақтидан кечикиб қилинган инъом-эҳсон маҳкам тортилган занжир мисоли бўғувчидир” деган ҳикматларини ҳар қадамда қўллаш мумкин. Халқимизда ҳам “Қолган ишга қор ёғар”, “Бугунги ишни эртага қўйма” каби мақоллари ҳам айни шу мазмунни қувватлайди. Шундай экан, фурсатни қўлдан бой бермай, ҳар бир савоб ишни ўз вақтида бажаришга одатланайлик.
Аҳмаджон МАМАДИЕВ,
Фарғона тумани “Сирли” масжиди имом–хатиби
