Аллоҳ таоло каломида «Биз сизларга илгаргиларга юклаган нарсамизни юкламадик» деб марҳамат қилади. Бу оят бошқа оятлар каби ҳар бир замон учун долзарбдир. Бу оятни ҳозирги кунимизга тадбиқ қиладиган бўлсак, болаларимиз ёруғ синфларда, гўзал шароитларда, эътибор ва эҳтиромда илм олишмоқда. Меҳрибон ота-оналар мактаб дарсларидан ташқари ҳали «Менталь арифметика», ҳали «Инглиз тили» репетиторлик курсларига маблағ сарфлаб, «болам ўқисин» деб тинмай меҳнатда.
Имом Бухорий, Маҳмуд Замахшарий каби буюк аждодларимиз илм йўлида чеккан заҳматнинг юздан бирини ҳам кўргани йўқ. Ёки Навоий бобомиз ўн минглаб байтни хира шамчироқда ёзганларида ҳозиргидек электр чироғу, ручкаларда ижод қилгани йўқ. Ёки яқин юз йил нарини эсга оладиган бўлсак Қодирий, Чўлпон, Беҳбудий каби алломаларимиз биз каби тинч замонда эмас, таҳликали замонда қанча дурдона асарлар ёзиб, кўплаб тилларни ўзлаштирганларида уларнинг қўлида бизники каби ноутбук, самартфонлар бўлмаган.
Биз нима қиляпмиз, айниқса, ҳозирги карантин шароитида, телевидение орқали берилаётган онлайн дарсларни кўргани баъзида эринамиз, жавон тўла китобни ўқигани бемаза сериаллардан кўзимиз қиймайди. Тайёр хулосаларга, тайёр фикрларга ўрганиб қоляпмиз, бирор муаммо ечимини топишга, изланишга эриняпмиз.
Айни ҳозирги кунлар ота-оналар фарзандлари билан бирга пайтларида берилаётган онлайн дарсларни бирга бажариб, шу вазифаларни устозларига жўнатиб турилса, болаларимиз илм излашдан тўхтаб қолмайди.
Зеро, Аллоҳ таоло биринчи туширган ояти каримаси, динимизнинг биринчи хитоби ҳам «Ўқи» бўлди:
Яратган Роббинг номи билан ўқи!
Табиат китобини ўқи!
Башариятнинг бутун тарихини ўқи!
Ҳидоятга эришмоқ учун ўқи!
Ўрганмоқ учун ўқи!
Залолатдан қайтмоқ учун ўқи…!
Ҳозирги карантин пайти айнан мана шу ўқимоқ учун имкониятдир, болаларимиз тасаввурини кенгайтириб, билим олишга илҳомлантириш дақиқаларидир.
Қиз болаларни ҳам меҳнатга йўналтириш биринчи навбатда онадан ўтади. Илгари тўй-зиёфат, гап-гаштаклар ёки ишдан ортиб ўргатолмаган вазифаларимизни кўникмаларни ҳосил қилишга имкониятдир. Ахир икки дунё иззат тожини фарзандларимиз орқасидан киямиз, инша Аллоҳ.
Бу кунларда биздан озгина сабр ва дуо керак холос, фарзандларимизни қалбига яхшилик уруғини экиб, ёрқин келажакка илхомлантириш керак холос. Роббим барчаси учун шукр.
Роббимга «ҳамд» айтишга қодир қилганига алҳамдулиллаҳ.
Бу кунларда барчамизни хонадонимизга хайр-барака, офият-амният сўраб қоламан, беморларга шифои комил ато айласин!
Гулрухон ОХУНЖОН ҚИЗИ,
Данғара тумани бош отинойиси
