Давлатимиз раҳбари ташаббуси билан инсон қадрини улуғлаш, аҳолини ҳар томонлама қўллаб-қувватлашга қаратилган эзгу ишлар изчил давом этмоқда. Ана шундай юксак эътибор намунаси сифатида юртимиздан 100 нафар фуқаро “Президент ҳожиси” мақомига муносиб кўрилиб, муқаддас Ҳаж сафарига йўл олмоқда.
Жумладан, Фарғона вилоятидан ҳам 7 нафар юртдошимиз ушбу шарафли ва муборак сафар учун йўлланмаларга эга бўлдилар.
Бугун, Фарғона халқаро аэропортидан “Президент ҳожиси” мақомига сазовор бўлган фуқаролар пойтахт сари кузатиб қўйилди.
Кузатув жараёни самимий ва кўтаринки руҳда ўтди. Зиёратчиларнинг яқинлари, нуронийлар ва жамоатчилик вакиллари уларни дуо ва эзгу тилаклар билан кузатдилар. Муқаддас сафарга отланаётган юртдошларимиз ҳам бундай юксак эътибор ва ғамхўрликдан мамнун эканликларини билдирдилар.
Кузатув маросимида вилоят мутасаддилари, соҳа масъуллари ҳамда жамоатчилик вакиллари иштирок этдилар.
Тадбир давомида бўлажак ҳожиларга оқ йўл тиланиб, уларнинг муқаддас амалларни муносиб адо этиб қайтишлари ҳақида дуолар қилинди.
Фарғона вилояти вакиллиги Матбуот хизмати
***
Davlatimiz rahbari tashabbusi bilan inson qadrini ulug‘lash, aholini har tomonlama qo‘llab-quvvatlashga qaratilgan ezgu ishlar izchil davom etmoqda. Ana shunday yuksak e’tibor namunasi sifatida yurtimizdan 100 nafar fuqaro “Prezident hojisi” maqomiga munosib ko‘rilib, muqaddas Haj safariga yo‘l olmoqda.
Jumladan, Farg‘ona viloyatidan ham 7 nafar yurtdoshimiz ushbu sharafli va muborak safar uchun yo‘llanmalarga ega bo‘ldilar.
Bugun, Farg‘ona xalqaro aeroportidan “Prezident hojisi” maqomiga sazovor bo‘lgan fuqarolar poytaxt sari kuzatib qo‘yildi.
Kuzatuv jarayoni samimiy va ko‘tarinki ruhda o‘tdi. Ziyoratchilarning yaqinlari, nuroniylar va jamoatchilik vakillari ularni duo va ezgu tilaklar bilan kuzatdilar. Muqaddas safarga otlanayotgan yurtdoshlarimiz ham bunday yuksak e’tibor va g‘amxo‘rlikdan mamnun ekanliklarini bildirdilar.
Kuzatuv marosimida viloyat mutasaddilari, soha mas’ullari hamda jamoatchilik vakillari ishtirok etdilar.
Tadbir davomida bo‘lajak hojilarga oq yo‘l tilanib, ularning muqaddas amallarni munosib ado etib qaytishlari haqida duolar qilindi.
Farg‘ona viloyati vakilligi Matbuot xizmati
