Ўтган ҳафтада вилоятда фаолият олиб бораётган отинойилар учун Фарғона Политехника институти мажлислар залида навбатдаги ўқув-семинар бўлиб ўтди. Ўқув-семинари маъруза-амалиёт тарзида олиб борилди.
Семинарда хотин-қизлар масалалари бўйича масъуллар билан бирга Марғилон шаҳар бош имом-хатиби Абдулфаттоҳ домла Олимов, Марғилон шаҳар «Имом Заҳириддин» масжиди имом-хатиби Ҳасанбой домла Олимназаровлар иштирок этиб, «Умра зиёратига борувчи аёлларга тавсилар», «Бидъат ва хурофотлардан четланиш» каби мавзуларда маъруза қилдилар.
Шунингдек, Фарғона вилояти бош имом-хатибининг хотин-қизлар масалалари бўйича ёрдамчиси Ҳилолахон Комилова томонидан отинойилар ўз устида мунтазам равишда ишлаши, илм ва малакасини ошириб бориши, аёлларга хос фиқҳий масалалар, қирқ фарз, дин арконлари юзасидан чоп этилаётган адабиётларни мутолаа қилишлари, Ўзбекистон мусулмонлари идораси томонидан чиқарилаётган Жума тезислари билан мунтазам равишда танишиб боришлари муҳимлиги қайд этилди.
Семинар давомида отинойилар ўзларини қизиқтирган саволларга жавоб ҳам олдилар.
***
O‘tgan haftada viloyatda faoliyat olib borayotgan otinoyilar uchun Farg‘ona Politexnika instituti majlislar zalida navbatdagi o‘quv-seminar bo‘lib o‘tdi. O‘quv-seminari ma’ruza-amaliyot tarzida olib borildi.
Seminarda xotin-qizlar masalalari bo‘yicha mas’ullar bilan birga Marg‘ilon shahar bosh imom-xatibi Abdulfattoh domla Olimov, Marg‘ilon shahar «Imom Zahiriddin» masjidi imom-xatibi Hasanboy domla Olimnazarovlar ishtirok etib, «Umra ziyoratiga boruvchi ayollarga tavsilar», «Bid’at va xurofotlardan chetlanish» kabi mavzularda ma’ruza qildilar.
Shuningdek, Farg‘ona viloyati bosh imom-xatibining xotin-qizlar masalalari bo‘yicha yordamchisi Hilolaxon Komilova tomonidan otinoyilar o‘z ustida muntazam ravishda ishlashi, ilm va malakasini oshirib borishi, ayollarga xos fiqhiy masalalar, qirq farz, din arkonlari yuzasidan chop etilayotgan adabiyotlarni mutolaa qilishlari, O‘zbekiston musulmonlari idorasi tomonidan chiqarilayotgan Juma tezislari bilan muntazam ravishda tanishib borishlari muhimligi qayd etildi.
Seminar davomida otinoyilar o‘zlarini qiziqtirgan savollarga javob ham oldilar.
