Муқаддас Ҳаж зиёратини адо этган юртдошларимиз томонидан илгари сурилган “Янги Ўзбекистоннинг тинчлик ва маънавият тарғиботчилари бўламиз” ташаббуси доирасида республика бўйлаб амалий тадбирлар давом этмоқда.
Ташаббус доирасидаги навбатдаги тадбир Тошлоқ туманида ўтказилди. Унда Ўзбекистон мусулмонлари идорасининг Фарғона вилоятидаги вакили, вилоят бош имом-хатиби Убайдуллоҳ домла Абдуллаев раҳбарлигида тажрибали имом-хатиблар, вилоят вакиллиги мутахассислари, туман имом-хатиблари, имом-ноиблар ҳамда “Ҳаж-2026” зиёратчилари иштирок этдилар.
“Бурҳониддин Марғилоний” масжидида ўтказилган йиғилишда тажрибали имом-хатиблардан иборат Ишчи гуруҳ тузилиб, унинг фаолияти уч асосий йўналиш бўйича ташкил этилди.
Ишчи гуруҳ аъзолари тумандаги 45 та хонадонда маънавий-маърифий тарғибот ва амалий ёрдам ишларини олиб бордилар.
Жумладан, оилавий муаммолар, ичкиликка ружу қўйиш, ёт ғоялар таъсирига тушиш каби ҳолатлар бўйича суҳбатлар ўтказилиб, тегишли насиҳат ва тавсиялар берилди. Нотинч оилалар ўрганилиб, аразлашганлардан бири яраштирилди.
Шунингдек, маънавий кўмакка муҳтож 30 та хонадон ҳолидан хабар олинди. Ногиронлиги бўлган, хасталикка чалинган, эҳтиёжманд ва табаррук ёшдаги қариялар истиқомат қилаётган 9 та хонадонга совға-саломлар улашилиб, даволаниш ва дори-дармон учун моддий ёрдам кўрсатилди.
Масжидларда ҳужжат юритиш, жамоат билан ишлаш, санитария ва ободончилик, намозхонлар учун яратилган шароитлар ўрганилди.
Ишчи гуруҳ аъзолари бириктирилган масжидларда пешин намозини жамоат билан адо этиб, долзарб мавзуларда маърузалар қилдилар.
Тадбирлар якунида юртимиз тинчлиги, халқимиз фаровонлиги ва Ватанимиз равнақи учун дуолар қилинди.
***
Muqaddas Haj ziyoratini ado etgan yurtdoshlarimiz tomonidan ilgari surilgan “Yangi O‘zbekistonning tinchlik va maʼnaviyat targ‘ibotchilari bo‘lamiz” tashabbusi doirasida respublika bo‘ylab amaliy tadbirlar davom etmoqda.
Tashabbus doirasidagi navbatdagi tadbir Toshloq tumanida o‘tkazildi. Unda O‘zbekiston musulmonlari idorasining Farg‘ona viloyatidagi vakili, viloyat bosh imom-xatibi Ubaydulloh domla Abdullayev rahbarligida tajribali imom-xatiblar, viloyat vakilligi mutaxassislari, tuman imom-xatiblari, imom-noiblar hamda “Haj-2026” ziyoratchilari ishtirok etdilar.
“Burhoniddin Marg‘iloniy” masjidida o‘tkazilgan yig‘ilishda tajribali imom-xatiblardan iborat Ishchi guruh tuzilib, uning faoliyati uch asosiy yo‘nalish bo‘yicha tashkil etildi.
Ishchi guruh aʼzolari tumandagi 45 ta xonadonda maʼnaviy-maʼrifiy targ‘ibot va amaliy yordam ishlarini olib bordilar.
Jumladan, oilaviy muammolar, ichkilikka ruju qo‘yish, yot g‘oyalar taʼsiriga tushish kabi holatlar bo‘yicha suhbatlar o‘tkazilib, tegishli nasihat va tavsiyalar berildi. Notinch oilalar o‘rganilib, arazlashganlardan biri yarashtirildi.
Shuningdek, maʼnaviy ko‘makka muhtoj 30 ta xonadon holidan xabar olindi. Nogironligi bo‘lgan, xastalikka chalingan, ehtiyojmand va tabarruk yoshdagi qariyalar istiqomat qilayotgan 9 ta xonadonga sovg‘a-salomlar ulashilib, davolanish va dori-darmon uchun moddiy yordam ko‘rsatildi.
Masjidlarda hujjat yuritish, jamoat bilan ishlash, sanitariya va obodonchilik, namozxonlar uchun yaratilgan sharoitlar o‘rganildi.
Ishchi guruh aʼzolari biriktirilgan masjidlarda peshin namozini jamoat bilan ado etib, dolzarb mavzularda maʼruzalar qildilar.
Tadbirlar yakunida yurtimiz tinchligi, xalqimiz farovonligi va Vatanimiz ravnaqi uchun duolar qilindi.
