Бу йилги ҳаж мавсумининг бошланишига ҳам саноқли кунлар қолди. Шу муносабат билан республикамиз бўйлаб ҳаж зиёратига тайёргарлик ишлари қизғин олиб борилмоқда. Имом Бухорий номидаги Тошкент ислом институтида Тошкент, Сирдарё вилоятлари ва Тошкент шаҳридан ҳаж мавсуми учун бириктирилган гуруҳ раҳбарлари иштирокида бўлиб ўтган йиғилишда ана шу тайёргарлик жараёни таҳил қилиниб, қатнашчиларга тегишли кўрсатма ва тавсиялар берилди.
Машғулотларда Ўзбекистон мусулмонлари идораси раиси ўринбосари, Тошкент ислом институти ректори Муҳаммадолим Муҳаммадсиддиқов, Диний идора Масжидлар билан ишлаш бўлими мудири Музаффар домла Камолов, Тошкент шаҳар бош имом-хатиби Абдуқаҳҳор домла Юнусов, диний идора вакиллари, имом-хатиблар ва шу соҳа ходимлари иштирок этди.
Йиғилишда гуруҳ раҳбариларига ҳаж мавсумидаги муҳим вазифалар эслатилди. Зиёратчиларга Исломнинг бешинчи рукни бўлган ҳажга пухта тайёргарлик кўриш, ҳажнинг фарзлари, вожиб ва суннатларини атрофлича тушунтиришлари зарурлиги таъкидланди.
Худди шундай Наманган вилояти вакиллигида Наманган, Андижон ва Фарғона вилоятларидан ҳаж зиёратчиларига бириктирилган гуруҳ раҳбарларига икки кунлик ўқув семинари бошланди.
Ўқув машғулотларида Наманган вилояти бош имом-хатиби Мусохон домла Аббосиддинов, “Ҳидоя” ўрта маҳсус ислом билим юрти ўқитувчилари ва тажрибали имом-хатиблар гуруҳ раҳбарларига ҳаж амалларини адо этишнинг тартиб-қоидалари, ҳаж қилиш асносида ман этилган амаллардан сақланиш, Мадинаи мунаввара ва Маккаи мукаррамадаги муборак жойларни зиёрат қилиш одоблари ҳақида маъруза қилдилар. Шунингдек, ҳаж сафарига доир қонунчилик ва бошқа меъёрий ҳужжатларни ҳам пухта билиш ҳам уқтирилди.
Гуруҳ раҳбарлари зиёратчиларга муборак сафар давомида доимо хушмуомала бўлиш, ўзаро ёрдам кўрсатиш, зикру ибодатларни кўпайтириш, беҳуда нарсаларни тарк этиш ҳақида ҳам эслатиб туришлари лозим эканини таъкидлаб ўтилди. Иштирокчилар саволларига маърузачилар томонидан жавоблар берилди.
* * *
Bu yilgi haj mavsumining boshlanishiga ham sanoqli kunlar qoldi. Shu munosabat bilan respublikamiz bo‘ylab haj ziyoratiga tayyorgarlik ishlari qizg‘in olib borilmoqda. Imom Buxoriy nomidagi Toshkent islom institutida Toshkent, Sirdaryo viloyatlari va Toshkent shahridan haj mavsumi uchun biriktirilgan guruh rahbarlari ishtirokida bo‘lib o‘tgan yig‘ilishda ana shu tayyorgarlik jarayoni tahil qilinib, qatnashchilarga tegishli ko‘rsatma va tavsiyalar berildi.
Mashg‘ulotlarda O‘zbekiston musulmonlari idorasi raisi o‘rinbosari, Toshkent islom instituti rektori Muhammadolim Muhammadsiddiqov, Diniy idora Masjidlar bilan ishlash bo‘limi mudiri Muzaffar domla Kamolov, Toshkent shahar bosh imom-xatibi Abduqahhor domla Yunusov, diniy idora vakillari, imom-xatiblar va shu soha xodimlari ishtirok etdi.
Yig‘ilishda guruh rahbarilariga haj mavsumidagi muhim vazifalar eslatildi. Ziyoratchilarga Islomning beshinchi rukni bo‘lgan hajga puxta tayyorgarlik ko‘rish, hajning farzlari, vojib va sunnatlarini atroflicha tushuntirishlari zarurligi ta’kidlandi.
Xuddi shunday Namangan viloyati vakilligida Namangan, Andijon va Farg‘ona viloyatlaridan haj ziyoratchilariga biriktirilgan guruh rahbarlariga ikki kunlik o‘quv seminari boshlandi.
O‘quv mashg‘ulotlarida Namangan viloyati bosh imom-xatibi Musoxon domla Abbosiddinov, “Hidoya” o‘rta mahsus islom bilim yurti o‘qituvchilari va tajribali imom-xatiblar guruh rahbarlariga haj amallarini ado etishning tartib-qoidalari, haj qilish asnosida man etilgan amallardan saqlanish, Madinai munavvara va Makkai mukarramadagi muborak joylarni ziyorat qilish odoblari haqida ma’ruza qildilar. Shuningdek, haj safariga doir qonunchilik va boshqa me’yoriy hujjatlarni ham puxta bilish ham uqtirildi.
Guruh rahbarlari ziyoratchilarga muborak safar davomida doimo xushmuomala bo‘lish, o‘zaro yordam ko‘rsatish, zikru ibodatlarni ko‘paytirish, behuda narsalarni tark etish haqida ham eslatib turishlari lozim ekanini ta’kidlab o‘tildi. Ishtirokchilar savollariga ma’ruzachilar tomonidan javoblar berildi.
