Охирги вақтларда интернет орқали Қуръонни босмаган мушукчалар видеоси жуда оммалашди. Бу видеотасвирларни исломий саҳифалар ҳам қўяётгани янада ажабланарлидир.
Бир оз тафаккур қиладиган бўлсак, ушбу видеони суратга олиб, тарқатаётганлар аслида Қуръони каримга ўша мушукчалик ҳам ҳурмат бажо келтирмаганларини англаймиз. Аслини олганда ҳар бир мусулмонга «Тўхта, бу бир ҳайвон бўлса, ўзини бошқара олмай Қуръон устига чиқиб, босиб олиши мумкин. Ёки нажосат чиқарса, мусҳафнинг устига тушиши мумкин», деган ҳаёл келиши керак. Майли, кимдир ўйламай видеога олибди ҳам дейлик, лекин уни тарқатишга одамларни нима ундади?
Аллоҳнинг Каломи ҳисобланмиш Қуръони каримга нисбатан бундай тажриба ишлари ғоят илмсизлик ва жаҳолатдир! Мусҳафни ерга қўйиш, унинг устидан ҳайвонларни сакраб ўтишига имконият яратиш Қуръонга нисбатан катта беҳурматлик ҳисобланади.
Мушук бу бир оддий ақлсиз ҳайвон, холос. Унинг ҳатти-ҳаракати ҳеч қандай нарсани исботлаш ёки инкор қилишни ифодаламайди. Агарчи, мободо у Мусҳафини босса ҳам Қуръоннинг мартабасига заррача путур етмайди.
Аллоҳ таоло ҳайвонларга илҳом қилиши ҳақ! Улар ҳам Аллоҳ яратган махлуқотлардир. Буларнинг ҳатти ҳаракатида биз учун мўжиза бўлиб кўринган воқеалар содир бўлиши тайин. Лекин бу «ҳайвонларнинг ҳаракати «шаръий исбот», дегани эмас. Биз Аллоҳнинг каломи ҳақ эканига ҳайвонларнинг унга нисбатан муомаласига эътибор қилишга буюрилмаганмиз. Фараз қилайлик, динга мойиллиги бор ёки иккиланиб турган инсон ушбу видеони кўриб, уни ўзича синаб кўриши мумкин. Агар мушук ёки ҳайвон мусҳафни босиб ўтадиган бўлса, ундаги динга нисбатан мойиллик сўниши мумкин.
Аслида, бундай ҳолатлар ҳақиқий мўмин киши учун одатий ҳол бўлиши лозим. Зеро, биз яшаб турган замин мўжизаларга шундоқ ҳам бой, улар Аллоҳнинг яккалигига далолат қилади. Жуда кўп асарларда ушбу мавзуга атаб Абул Атоҳийянинг қуйидаги машҳур шеъри келтирилади:
وَلِلَّهِ فِي كُلِّ تَحْرِيكَةٍ وَتَسْكِينَةٍ أَبَدًا شَاهِدُ
فِي كُلِّ شَيْءٍ لَهُ آيَةٌ تَدُلُّ عَلَى أَنَّهُ وَاحِدُ
Шеърнинг маъноси:
Ҳар бир ҳаракат ва сукунатда доим Аллоҳнинг борлигига далил мавжуд. Ҳар бир нарсада Уни ёлғиз эканлигига далолат қилувчи белги бор.
Хулоса қилиб айтадиган бўлсак, биз бундай ҳолатларга кўр-кўрона эмас, балки илм-маърифат билан ёндашишимиз, оқибатини ўйлашимиз даркор. Бу каби кўзимизга ғайри табиий бўлиб кўринган ҳодисаларга мўмин киши ақл билан холисона ёндашиши лозим.
Ихтиёр Абдураҳмонов
Исломшунослик Илмий-тадқиқот маркази
кичик илмий ходими
islamcenter.uz