Шу йил 25 ноябрь куни Аммон шаҳрида Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Иордания Вақф, ислом ишлари ва муқаддас қадамжолар вазири Муҳаммад Аҳмад Муслим ал-Халояла жаноблари билан ҳамкорликни ривожлантириш бўйича мулоқот ўтказдилар.
Учрашувда икки давлат раҳбарлари саъй-ҳаракатлари билан диний-маърифий соҳадаги ҳамкорликни ривожлантириш, икки мамлакат вақф муассасалари, илмий-тадқиқот марказлари ва диний таълим муассасалари ўртасидаги алоқаларни мустаҳкамлашга эришилаётгани эътироф этилди.
Шунингдек, музокараларда ўзбекистонлик мутахассислар вақф йўналишида замонавий малака ва кўникмаларга эга бўлишида алоқаларни ўрнатиш ҳамда муштарак илмий лойиҳаларни амалга ошириш, вақф мулкларини бошқариш бўйича мавжуд тажрибани ўрганиш мақсадида Иорданияда малака оширишларини йўлга қўйиш каби қатор масалалар муҳокама қилинди. Жумладан, учрашувда қуйидаги натижаларга эришилди:
Ўзбекистон мусулмонлари идораси “Вақф” хайрия жамоат фонди мутахассисларининг Иорданияда малака ошириш курслари ҳамда амалиёт ўташларини яқин ойларда ташкил этиш;
Вақф мулкларини тасарруф этишдаги илғор ва замонавий тажрибаларни ўрганиш учун “Вақф” хайрия жамоат фонди мутахассисларини яқин кунларда Иорданияга ишчи сафарларини уюштириш;
Иорданиялик профессор олимлар томонидан вақф мулклари тартиблари, тарихи, бугуни ва истиқболлари тўғрисида касб-маҳорат машғулотлари ўтказиш кабиларга келишилди.
Маълумот ўрнида, Иордания Вақф, ислом ишлари ва муқаддас қадамжолар вазирлиги вақф мулклари, зиёратгоҳлар, хайрия фондларини бошқариш, ҳаж, умра сафарларини ташкил этиш, масжидлар, имомлар фаолиятини юритиш, илмий-тадқиқот ишларини олиб бориш, диний таълим, Қуръони каримни курслари, Мусҳафлар чоп этиш ва жума тезисларини ёзиш каби фаолият турларига бошчилик қилади.
***
Shu yil 25 noyabr kuni Ammon shahrida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Iordaniya Vaqf, islom ishlari va muqaddas qadamjolar vaziri Muhammad Ahmad Muslim al-Xaloyala janoblari bilan hamkorlikni rivojlantirish bo‘yicha muloqot o‘tkazdilar.
Uchrashuvda ikki davlat rahbarlari sa’y-harakatlari bilan diniy-ma’rifiy sohadagi hamkorlikni rivojlantirish, ikki mamlakat vaqf muassasalari, ilmiy-tadqiqot markazlari va diniy ta’lim muassasalari o‘rtasidagi aloqalarni mustahkamlashga erishilayotgani e’tirof etildi.
Shuningdek, muzokaralarda o‘zbekistonlik mutaxassislar vaqf yo‘nalishida zamonaviy malaka va ko‘nikmalarga ega bo‘lishida aloqalarni o‘rnatish hamda mushtarak ilmiy loyihalarni amalga oshirish, vaqf mulklarini boshqarish bo‘yicha mavjud tajribani o‘rganish maqsadida Iordaniyada malaka oshirishlarini yo‘lga qo‘yish kabi qator masalalar muhokama qilindi. Jumladan, uchrashuvda quyidagi natijalarga erishildi:
O‘zbekiston musulmonlari idorasi “Vaqf” xayriya jamoat fondi mutaxassislarining Iordaniyada malaka oshirish kurslari hamda amaliyot o‘tashlarini yaqin oylarda tashkil etish;
Vaqf mulklarini tasarruf etishdagi ilg‘or va zamonaviy tajribalarni o‘rganish uchun “Vaqf” xayriya jamoat fondi mutaxassislarini yaqin kunlarda Iordaniyaga ishchi safarlarini uyushtirish;
Iordaniyalik professor olimlar tomonidan vaqf mulklari tartiblari, tarixi, buguni va istiqbollari to‘g‘risida kasb-mahorat mashg‘ulotlari o‘tkazish kabilarga kelishildi.
Ma’lumot o‘rnida, Iordaniya Vaqf, islom ishlari va muqaddas qadamjolar vazirligi vaqf mulklari, ziyoratgohlar, xayriya fondlarini boshqarish, haj, umra safarlarini tashkil etish, masjidlar, imomlar faoliyatini yuritish, ilmiy-tadqiqot ishlarini olib borish, diniy ta’lim, Qur’oni karimni kurslari, Mus’haflar chop etish va juma tezislarini yozish kabi faoliyat turlariga boshchilik qiladi.
