Фарғона вилояти вакиллиги томонидан «Ҳаж-2026″ мавсуми олдидан муҳим ташкилий йиғилиш бўлиб ўтди. Унда гуруҳ раҳбари сифатида сафарга тайёргарлик кўраётган имом-хатиблар ҳамда уларнинг ўрнида вақтинча вазифаларни бажарадиган имом ва ноиблар иштирок этдилар.
Йиғилишни вилоят бош имом-хатиби Убайдуллоҳ домла Абдуллаев олиб бориб, сўз аввалида Ҳаж сафари нафақат шараф, балки улкан масъулият эканини алоҳида таъкидлади. У киши ўз нутқида ҳожиларга йўл-йўриқ кўрсатиш, уларнинг ибодатларини тўғри адо этишига кўмаклашиш – юксак савобли ва масъулиятли хизмат экани, шу боис ҳар бир элликбоши ўз зиммасига юкланган вазифани сидқидилдан, ихлос билан бажариши лозимлиги таъкидланди.
Йиғилиш давомида Аллоҳнинг меҳмонларига хизмат кўрсатиш, улар билан мулоқотда сабр-тоқат ва хушмуомалаликни сақлаш, сафар давомида юзага келиши мумкин бўлган турли ҳолатларга тайёр туриш каби масалалар атрофлича муҳокама қилинди. Шунингдек, амалда учрайдиган вазиятлар юзасидан амалий тавсиялар ва зарур кўрсатмалар берилди.
Шу билан бирга, масжидларда вақтинча хизматга тайинланаётган имомлар зиммасига ҳам катта масъулият юкланиши қайд этилди. Уларга кунлик беш вақт намозларни тартибли ва жамоат билан адо этиш, жума намозларини юқори савияда ўтказиш, шунингдек, Қурбон ҳайити каби улуғ айёмларни халқимизга муносиб тарзда ташкил этиш бўйича аниқ вазифалар юклатилди.
Йиғилишда ёш имом ва имом ноибларига алоҳида эътибор қаратилди. Уларнинг малакасини ошириш, жамоат билан ишлаш кўникмаларини ривожлантириш, диний-маърифий тадбирларни самарали ташкил этиш борасида зарур тавсиялар берилди. Тажрибали уламолар ўз маслаҳатлари билан ўртоқлашиб, ёшларга йўл-йўриқ кўрсатдилар.
Тадбир якунида барча иштирокчиларга муборак сафар олдидан муваффақият, саломатлик ва хизматларида барака тилаб, Ҳаж мавсумини юқори савияда ташкил этиш барча учун устувор вазифа экани яна бир бор таъкидланди.
***
Farg‘ona viloyati vakilligi tomonidan «Haj-2026» mavsumi oldidan muhim tashkiliy yig‘ilish bo‘lib o‘tdi. Unda guruh rahbari sifatida safarga tayyorgarlik ko‘rayotgan imom-xatiblar hamda ularning o‘rnida vaqtincha vazifalarni bajaradigan imom va noiblar ishtirok etdilar.
Yig‘ilishni viloyat bosh imom-xatibi Ubaydulloh domla Abdullayev olib borib, so‘z avvalida Haj safari nafaqat sharaf, balki ulkan masʼuliyat ekanini alohida taʼkidladi. U kishi o‘z nutqida hojilarga yo‘l-yo‘riq ko‘rsatish, ularning ibodatlarini to‘g‘ri ado etishiga ko‘maklashish – yuksak savobli va masʼuliyatli xizmat ekani, shu bois har bir ellikboshi o‘z zimmasiga yuklangan vazifani sidqidildan, ixlos bilan bajarishi lozimligi taʼkidlandi.
Yig‘ilish davomida Allohning mehmonlariga xizmat ko‘rsatish, ular bilan muloqotda sabr-toqat va xushmuomalalikni saqlash, safar davomida yuzaga kelishi mumkin bo‘lgan turli holatlarga tayyor turish kabi masalalar atroflicha muhokama qilindi. Shuningdek, amalda uchraydigan vaziyatlar yuzasidan amaliy tavsiyalar va zarur ko‘rsatmalar berildi.
Shu bilan birga, masjidlarda vaqtincha xizmatga tayinlanayotgan imomlar zimmasiga ham katta masʼuliyat yuklanishi qayd etildi. Ularga kunlik besh vaqt namozlarni tartibli va jamoat bilan ado etish, juma namozlarini yuqori saviyada o‘tkazish, shuningdek, Qurbon hayiti kabi ulug‘ ayyomlarni xalqimizga munosib tarzda tashkil etish bo‘yicha aniq vazifalar yuklatildi.
Yig‘ilishda yosh imom va imom noiblariga alohida eʼtibor qaratildi. Ularning malakasini oshirish, jamoat bilan ishlash ko‘nikmalarini rivojlantirish, diniy-maʼrifiy tadbirlarni samarali tashkil etish borasida zarur tavsiyalar berildi. Tajribali ulamolar o‘z maslahatlari bilan o‘rtoqlashib, yoshlarga yo‘l-yo‘riq ko‘rsatdilar.
Tadbir yakunida barcha ishtirokchilarga muborak safar oldidan muvaffaqiyat, salomatlik va xizmatlarida baraka tilab, Haj mavsumini yuqori saviyada tashkil etish barcha uchun ustuvor vazifa ekani yana bir bor taʼkidlandi.
