Аллоҳ таолога ҳамду санолар бўлсин, бу йил ҳам юртимиздан 15 мингдан зиёд юртдошимиз дунё мусулмонлари қаторида Исломнинг бешинчи аркони – Ҳаж ибодатини адо этиш бахтига муяссар бўлмоқдалар.
Ҳозирда ҳожиларимиз муқаддас заминда ибодатга тўла руҳий ҳузур ила сафарда бўлиб турибдилар. Улар учун яратилган шарт-шароитлар йил сайин такомиллашиб, юртимиз номига муносиб даражада ташкил этилмоқда.
Мадинаи мунаввара зиёрати
Зиёрат дастури Мадинаи мунавварадан бошланди. Ҳожиларимиз жойлаштирилган меҳмонхона бевосита Масжиди набавийнинг олдида жойлашгани эътиборга молик бўлиб, азон садоси билан ибодатга чиқиш учун катта қулайлик яратди.
Куннинг ҳар уч маҳали иссиқ овқат, сархил мевалар ва соғлиқ учун зарур эҳтиёжлар ўз вақтида тақдим этилмоқда. Зиёратчилар Уҳуд тоғининг тарихий саҳналари, Қубо ва Қиблатайн масжидлари билан танишиш пайтида гуруҳ раҳбарлари томонидан Ислом тарихи ва улуғ шахслар ҳаёти ҳақида маърузалар тингладилар.
Умра ибодати
Зиёратчилар Маккаи мукаррамага етиб келгач, белгиланган тартибда меҳмонхоналарга жойлаштирилиб, умра амалларини адо этдилар. Шу билан бирга, Ҳарами шарифда бевосита намозларда иштирок этиб, муқаддас жойнинг фазилати ва руҳий қувватига шоҳид бўлдилар.
Юртимиздан борган имом-хатиблар ва воизлар томонидан ҳожилар учун илмий-маърифий суҳбатлар ташкил қилинди. Ҳар куни хатми Қуръон, саловотлар ва истиғфорлар жамланиб, алоҳида дуолар қилинди.
Малакали шифокорлар ҳожиларимизнинг саломатлиги билан доимий равишда хабардор бўлиб турибдилар. Бу эса зиёратчиларимизнинг маънавий ҳамда жисмоний ҳолатини мустаҳкамлашга хизмат қилмоқда.
Давлат раҳбарининг эътибори
Юртбошимиз билан муфтий ҳазратлар ўртасида бўлиб ўтган мулоқотда, Президентимиз шахсан ҳожилар ҳолидан хабар олганлари юртдошларимизнинг қалбларини нурга тўлдирди. Давлат раҳбарининг бу эътибори юртимиздаги диний эркинлик ва қадр-қимматга берилаётган юксак баҳо намунасидир.
Мино водийси – дуо ва тавбалар майдони
Ниҳоят интиқиб кутилган кунлар ҳам келиб, бугун ҳожиларимиз оппоқ эҳромларда Мино водийсига етиб келдилар. Бу ердаги зикр ва ибодат, дуо ва илтижолар қалбларга ором, кўнгилларга сурур бахш этмоқда.
Камина ҳам бу улуғ ибодат, масъулиятли ва шарафли хизматга муяссар бўлиб турганимдан Аллоҳга шукрлар айтаман.
Илоҳим, қилинаётган дуолар, адо этилаётган ибодатлар қабул бўлсин! Ҳажжи мабрурнинг мукофоти жаннат экани ҳақида Пайғамбаримиз соллаллоҳу алайҳи васаллам башорат берганлар. Аллоҳ барча юртдошларимизнинг ҳажларини мабрур айласин! Юртимиз тинч, осуда, келажаги равнақли бўлсин!
Хасанбой Юсупалиев,
Марғилон шаҳар “Зиё” масжиди имом-хатиби,
Саудия Арабистони, Мино водийсидан
***
Alloh taologa hamdu sanolar bo‘lsin, bu yil ham yurtimizdan 15 mingdan ziyod yurtdoshimiz dunyo musulmonlari qatorida Islomning beshinchi arkoni – Haj ibodatini ado etish baxtiga muyassar bo‘lmoqdalar.
Hozirda hojilarimiz muqaddas zaminda ibodatga to‘la ruhiy huzur ila safarda bo‘lib turibdilar. Ular uchun yaratilgan shart-sharoitlar yil sayin takomillashib, yurtimiz nomiga munosib darajada tashkil etilmoqda.
Madinai munavvara ziyorati
Ziyorat dasturi Madinai munavvaradan boshlandi. Hojilarimiz joylashtirilgan mehmonxona bevosita Masjidi nabaviyning oldida joylashgani e’tiborga molik bo‘lib, azon sadosi bilan ibodatga chiqish uchun katta qulaylik yaratdi.
Kunning har uch mahali issiq ovqat, sarxil mevalar va sog‘liq uchun zarur ehtiyojlar o‘z vaqtida taqdim etilmoqda. Ziyoratchilar Uhud tog‘ining tarixiy sahnalari, Qubo va Qiblatayn masjidlari bilan tanishish paytida guruh rahbarlari tomonidan Islom tarixi va ulug‘ shaxslar hayoti haqida ma’ruzalar tingladilar.
Umra ibodati
Ziyoratchilar Makkai mukarramaga yetib kelgach, belgilangan tartibda mehmonxonalarga joylashtirilib, umra amallarini ado etdilar. Shu bilan birga, Harami sharifda bevosita namozlarda ishtirok etib, muqaddas joyning fazilati va ruhiy quvvatiga shohid bo‘ldilar.
Yurtimizdan borgan imom-xatiblar va voizlar tomonidan hojilar uchun ilmiy-ma’rifiy suhbatlar tashkil qilindi. Har kuni xatmi Qur’on, salovotlar va istig‘forlar jamlanib, alohida duolar qilindi.
Malakali shifokorlar hojilarimizning salomatligi bilan doimiy ravishda xabardor bo‘lib turibdilar. Bu esa ziyoratchilarimizning ma’naviy hamda jismoniy holatini mustahkamlashga xizmat qilmoqda.
Davlat rahbarining e’tibori
Yurtboshimiz bilan muftiy hazratlar o‘rtasida bo‘lib o‘tgan muloqotda, Prezidentimiz shaxsan hojilar holidan xabar olganlari yurtdoshlarimizning qalblarini nurga to‘ldirdi. Davlat rahbarining bu e’tibori yurtimizdagi diniy erkinlik va qadr-qimmatga berilayotgan yuksak baho namunasidir.
Mino vodiysi – duo va tavbalar maydoni
Nihoyat intiqib kutilgan kunlar ham kelib, bugun hojilarimiz oppoq ehromlarda Mino vodiysiga yetib keldilar. Bu yerdagi zikr va ibodat, duo va iltijolar qalblarga orom, ko‘ngillarga surur baxsh etmoqda.
Kamina ham bu ulug‘ ibodat, mas’uliyatli va sharafli xizmatga muyassar bo‘lib turganimdan Allohga shukrlar aytaman.
Ilohim, qilinayotgan duolar, ado etilayotgan ibodatlar qabul bo‘lsin! Hajji mabrurning mukofoti jannat ekani haqida Payg‘ambarimiz sollallohu alayhi vasallam bashorat berganlar. Alloh barcha yurtdoshlarimizning hajlarini mabrur aylasin! Yurtimiz tinch, osuda, kelajagi ravnaqli bo‘lsin!
Xasanboy Yusupaliyev,
Marg‘ilon shahar “Ziyo” masjidi imom-xatibi,
Saudiya Arabistoni, Mino vodiysidan
