Шу йил 25 март куни ташкил этилган ифторлик маросимида Давлатимиз раҳбари иштирок этиб, нутқ сўзлади. Унда юртимиз ҳожиларининг кўплаб хайрли ишларда шахсий намуна кўрсатаётгани ва маънавият тарғиботчисига айланаётгани барчамиз учун қувончли экани таъкидланди.
Муфтий Нуриддин Холиқназар ҳазратлари бошчилигида ҳожиларнинг “Янги Ўзбекистон фидойиси бўлиб, маънавият тарғиботчисига айланамиз” деган ташаббуси сабаб эҳтиёжманд оилаларга моддий ёрдам кўрсатилгани эътироф этилди.
Ушбу хайрли ишлар айни кунларда ҳам давом этмоқда. Жорий йил, 3 апрель куни Фарғона шаҳрида амалий-намунавий тадбир ўтказилиб, унда Фарғона вилояти бош имом-хатиби Убайдуллоҳ домла Абдуллаев иштирок этди.
Ташкилий йиғилишда тажрибали имом-хатиблардан иборат Ишчи гуруҳ тузилиб, вазифалар тақсимланди. Убайдуллоҳ домла амалга ошириладиган ишлар кўлами ва Ишчи гуруҳ аъзолари ҳамкорлигининг муҳим жиҳатларини тушунтириб ўтди.
Ишчи гуруҳ фаолияти уч йўналишдан иборат бўлиб, бир қатор хайрли ишларни амалга оширдилар. Жумладан, ишчи гуруҳ аъзоси ҳамда имом-хатиблар ўзларига бириктирилган маҳалла ҳудудидан “Ҳаж-2024” зиёратчисини маънавий-маърифий тадбирларга жалб этдилар. Биргаликда маҳалланинг энг камида 5 тагача муаммоли хонадонларига кириб, у ерда яшаётганлардан ҳол-аҳвол сўрадилар. Уларнинг муаммоларини ўргандилар, фикр-мулоҳазаларини тингладилар. Имом-хатиблар 7 тоифага мансуб 85 та оилага кириб, маънавий-маърифий тарғибот ҳамда амалий ёрдам тадбирларини олиб бордилар.
Қайд этиш лозимки, бу каби хайрли ишлар замирида Фарғона шаҳар “Хўжамбердибой” масжиди ҳудудида яшовчи боқувчисини йўқотган, ўз уй жойига эга бўлмаган, ижарада яшаган фуқарога ҳожилар кўмагида янги хонадон олиб берилгани қувонарли ҳолдир.
Пешин намозидан сўнг жамоатга долзарб мавзуларда маърузалар ўқилиб, хайрли дуолар қилинди.
Бу эзгу ташаббуслар юртимизда моддий-маънавий тарғибот ишлари тобора мустаҳкамланиб бораётганидан далолатдир.
Фарғона вилояти вакиллиги Матбуот хизмати
***
Shu yil 25 mart kuni tashkil etilgan iftorlik marosimida Davlatimiz rahbari ishtirok etib, nutq so‘zladi. Unda yurtimiz hojilarining ko‘plab xayrli ishlarda shaxsiy namuna ko‘rsatayotgani va ma’naviyat targ‘ibotchisiga aylanayotgani barchamiz uchun quvonchli ekani ta’kidlandi.
Muftiy Nuriddin Xoliqnazar hazratlari boshchiligida hojilarning “Yangi O‘zbekiston fidoyisi bo‘lib, ma’naviyat targ‘ibotchisiga aylanamiz” degan tashabbusi sabab ehtiyojmand oilalarga moddiy yordam ko‘rsatilgani e’tirof etildi.
Ushbu xayrli ishlar ayni kunlarda ham davom etmoqda. Joriy yil, 3 aprel kuni Farg‘ona shahrida amaliy-namunaviy tadbir o‘tkazilib, unda Farg‘ona viloyati bosh imom-xatibi Ubaydulloh domla Abdullayev ishtirok etdi.
Tashkiliy yig‘ilishda tajribali imom-xatiblardan iborat Ishchi guruh tuzilib, vazifalar taqsimlandi. Ubaydulloh domla amalga oshiriladigan ishlar ko‘lami va Ishchi guruh a’zolari hamkorligining muhim jihatlarini tushuntirib o‘tdi.
Ishchi guruh faoliyati uch yo‘nalishdan iborat bo‘lib, bir qator xayrli ishlarni amalga oshirdilar. Jumladan, ishchi guruh a’zosi hamda imom-xatiblar o‘zlariga biriktirilgan mahalla hududidan “Haj-2024” ziyoratchisini ma’naviy-ma’rifiy tadbirlarga jalb etdilar. Birgalikda mahallaning eng kamida 5 tagacha muammoli xonadonlariga kirib, u yerda yashayotganlardan hol-ahvol so‘radilar. Ularning muammolarini o‘rgandilar, fikr-mulohazalarini tingladilar. Imom-xatiblar 7 toifaga mansub 85 ta oilaga kirib, ma’naviy-ma’rifiy targ‘ibot hamda amaliy yordam tadbirlarini olib bordilar.
Qayd etish lozimki, bu kabi xayrli ishlar zamirida Farg‘ona shahar “Xo‘jamberdiboy” masjidi hududida yashovchi boquvchisini yo‘qotgan, o‘z uy joyiga ega bo‘lmagan, ijarada yashagan fuqaroga hojilar ko‘magida yangi xonadon olib berilgani quvonarli holdir.
Peshin namozidan so‘ng jamoatga dolzarb mavzularda ma’ruzalar o‘qilib, xayrli duolar qilindi.
Bu ezgu tashabbuslar yurtimizda moddiy-ma’naviy targ‘ibot ishlari tobora mustahkamlanib borayotganidan dalolatdir.
Farg‘ona viloyati vakilligi Matbuot xizmati
