Бугун, 2 март шанба куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Фарғона шаҳридаги “Уммул Қуро” жоме масжидида сайёр қабул ўтказиб, вилоятнинг турли ҳудудларидан келган фуқаролар мурожаатларини тингладилар.
Қабул жараёнида масжид-мадрасалар, имом-хатиблар фаолияти билан боғлиқ масалалар, шунингдек, оилавий муносабатлар, моддий кўмак, ҳаж-умра сафарлари каби мурожаатлари эшитилиб, уларни ҳал этиш чоралари кўрилди. Эҳтиёжманд оилаларга белгиланган тартибда моддий ёрдам кўрсатилди, бемор фуқароларга муолажа олиш учун маблағ ажратиш вазифаси юкланди. Жисмоний имконияти чекланган айрим ҳамюртларимизга эса ногиронлик аравачалари тақдим этилди.
Фарғона шаҳридаги “Мурувват” интернат уйидаги жисмоний имконияти чекланган болажонлар ҳолидан хабар олиниб, ширин сўз ва ҳадялар ила уларнинг кўнгиллари кўтарилди. Шунингдек, улар учун эҳсон дастурхони ёзилди. Мутасаддилар билан тарбияланучиларга яратилган шароитларни кўздан кечириш чоғида зарур эҳтиёжларига кўмаклашиш, хусусан, ётоқ чойшаблари олиб бериш режалаштирилди.
Сайёр қабул ва интернат уйига ташрифдан мамнун бўлган мўмин-мусулмон халқимиз Ватан тинчлиги, эл фаровонлиги ва мутасаддилар ҳақларига хайрли дуолар қилишди.
* * *
Bugun, 2 mart shanba kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Farg‘ona shahridagi “Ummul Quro” jome masjidida sayyor qabul o‘tkazib, viloyatning turli hududlaridan kelgan fuqarolar murojaatlarini tingladilar.
Qabul jarayonida masjid-madrasalar, imom-xatiblar faoliyati bilan bog‘liq masalalar, shuningdek, oilaviy munosabatlar, moddiy ko‘mak, haj-umra safarlari kabi murojaatlari eshitilib, ularni hal etish choralari ko‘rildi. Ehtiyojmand oilalarga belgilangan tartibda moddiy yordam ko‘rsatildi, bemor fuqarolarga muolaja olish uchun mablag‘ ajratish vazifasi yuklandi. Jismoniy imkoniyati cheklangan ayrim hamyurtlarimizga esa nogironlik aravachalari taqdim etildi.
Farg‘ona shahridagi “Muruvvat” internat uyidagi jismoniy imkoniyati cheklangan bolajonlar holidan xabar olinib, shirin so‘z va hadyalar ila ularning ko‘ngillari ko‘tarildi. Shuningdek, ular uchun ehson dasturxoni yozildi. Mutasaddilar bilan tarbiyalanuchilarga yaratilgan sharoitlarni ko‘zdan kechirish chog‘ida zarur ehtiyojlariga ko‘maklashish, xususan, yotoq choyshablari olib berish rejalashtirildi.
Sayyor qabul va internat uyiga tashrifdan mamnun bo‘lgan mo‘min-musulmon xalqimiz Vatan tinchligi, el farovonligi va mutasaddilar haqlariga xayrli duolar qilishdi.
