Бугун, 2 март куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Фарғона вилоятида фаолият юритаётган имом-хатиблар билан учрашув ўтказдилар.
Муҳим масалалар муҳокама этилган йиғилишда Муфтий ҳазратлари кейинги йилларда диний-маърифий соҳада бўлаётган ўзгаришларнинг қадрига етиш, Ватан, дин ва халқ равнақи учун хизмат қилиш ҳақида сўз юритдилар. Шунингдек, имомлик шарафли мақом бўлиши билан бирга ўта нозик ва масъулиятли иш экани, имом-хатиблар шариат ходими сифатида мўмин-мусулмон халқимизни тўғри йўлга бошлашда ғайрат қилишлари, баъзи имом-хатиблар эса ўзларини ислоҳ қилишлари лозимлиги алоҳида қайд этилди.
Ташриф давомида Шайх Нуриддин Холиқназар ҳазратлари Фарғона вилоятидаги жоме масжидларида Рамазон ойига тайёргарлик жараёнларини кўздан кечирдилар, хусусан, муборак ойга қадар масжидлар биноси техник ҳолати, хавфсизлик қоидалари ва санитария-гигиена талабларига жавоб беришини таъминлаш сингари ишларни тўлиқ якунлаш баробарида мўмин-мусулмонларимиз ибодатларини бекаму кўст адо этишлари учун барча шароитларни ҳозирлаш борасида кўрсатма ва тавсиялар бердилар.
Муфтий ҳазратлари намозхонлар билан мулоқот қилиб, Рамазон ойига маънавий тайёргарлик кўриш, меҳр-мурувват ишларини кўрсатиш ва турли исрофгарчиликлардан сақланиш каби масалаларга ҳам урғу қаратдилар.
Шу билан Муфтий ҳазратларининг водий вилоятларига қилган сафарлари якунланди.
* * *
Bugun, 2 mart kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Farg‘ona viloyatida faoliyat yuritayotgan imom-xatiblar bilan uchrashuv o‘tkazdilar.
Muhim masalalar muhokama etilgan yig‘ilishda Muftiy hazratlari keyingi yillarda diniy-ma’rifiy sohada bo‘layotgan o‘zgarishlarning qadriga yetish, Vatan, din va xalq ravnaqi uchun xizmat qilish haqida so‘z yuritdilar. Shuningdek, imomlik sharafli maqom bo‘lishi bilan birga o‘ta nozik va mas’uliyatli ish ekani, imom-xatiblar shariat xodimi sifatida mo‘min-musulmon xalqimizni to‘g‘ri yo‘lga boshlashda g‘ayrat qilishlari, ba’zi imom-xatiblar esa o‘zlarini isloh qilishlari lozimligi alohida qayd etildi.
Tashrif davomida Shayx Nuriddin Xoliqnazar hazratlari Farg‘ona viloyatidagi jome masjidlarida Ramazon oyiga tayyorgarlik jarayonlarini ko‘zdan kechirdilar, xususan, muborak oyga qadar masjidlar binosi texnik holati, xavfsizlik qoidalari va sanitariya-gigiyena talablariga javob berishini ta’minlash singari ishlarni to‘liq yakunlash barobarida mo‘min-musulmonlarimiz ibodatlarini bekamu ko‘st ado etishlari uchun barcha sharoitlarni hozirlash borasida ko‘rsatma va tavsiyalar berdilar.
Muftiy hazratlari namozxonlar bilan muloqot qilib, Ramazon oyiga ma’naviy tayyorgarlik ko‘rish, mehr-muruvvat ishlarini ko‘rsatish va turli isrofgarchiliklardan saqlanish kabi masalalarga ham urg‘u qaratdilar.
Shu bilan Muftiy hazratlarining vodiy viloyatlariga qilgan safarlari yakunlandi.
