Дунёнинг ярми аёл қолган ярмини ҳам аёл дунёга келтирган. Ушбу ҳикмат замирида улкан хақиқат мужассам бўлиб, барчаларимизни дунёга келтирган, оқ ювиб оқ тараган зотлар, шубҳасиз, муштипаргина волидаи муҳтарамаларимиз. Бу хақиқатни ҳеч ким инкор қилмайди. Оналаримизни ҳар куни зиёрат қилсак, озлик қилади. Шу боис бўлса керак, шоир ва мутафаккир Мир Алишер Навоий ҳазратлари:
“Жаннат равзасию боғлари оналар оёғи остидадир, лекин равзани кўрмоқ ва ундан баҳраманд бўлмоқ бахтига эришмоқни истар бўлсанг, оналар оёғи остида тупроқ бўлишни ихтиёр қил”, дея ёзган бўлсалар, бобомизнинг ушбу фикрлари Пайғамбаримиз алайҳиссаломнинг “Жаннат оналар оёғи остидадир” ҳадислари асосида битилган дейилса муболаға бўлмайди.
Оналар хизматини ўлчаб бўлмайди, хизматларини ҳар қанча бажарсак ҳам хақларини адо қилолмаймиз, чунки қуйидаги ривоят ҳам она бўлмиш муҳтарам аёл шаъни, қадр-қиммати ҳақида сзўлайди:
“Яратгувчи аёлни ижод этганида фаришталар хайрон қолидилар, сўнг унинг ихтиёри ила сўрадилар:
– Ё Аллоҳ! Уни нега гул каби гўзал яратдинг?
– Уни эрлар бир гул каби авайлашлари учун.
– Уни мунчалар мунис яратдинг, Ё Раб?
– Одам болаларига оналик қилиши учун.
– Унинг кўксини нега мунчалик меҳринг ила тўлдирдинг, дея савол қилди фаришталар.
– Токи улар то қиёматга қадар Ер юзини меҳрга тўлдирсинлар. Аёл эркакни акси бўлиб меҳр берса, минг чандон меҳр беради.
Улуғ донишмандлар хаётига назар ташлар эканмиз, улар ҳаётидан ҳам онага бўлган чексиз эҳтиромларга гувоҳ бўламиз. Жумладан, Ҳасан Басрий ҳазратлари оналари билан бир дастурхонда ўтирсалар, дастурхондаги егуликлардан оналари тановул қилмагунларича, у зот қўл узатмас эканлар. Бундай ҳатти-ҳаракат эса номақбул фарзанднинг иши қабилида баҳоланар, шогирдларига ҳам шундай таълим берар эканлар.
Ўтмишдаги ота-боболаримиз ҳам ушбу қоидаларга риоя қилиш натижасида буюклик рутбасига кўтарилдилар.
Аллоҳ таоло Нисо сурасида “…Улар билан тотув турмуш кечирингиз…” дея марҳамат қилади.
Жаноб Пайғамбаримиз алайҳиссалом ҳам: “Мўминларнинг иймон жиҳатидан комили, хулқи яхши бўлганларидир. Сизларнинг яхшиларингиз эса, ўз аҳли аёллари билан яхши бўлганларингиздир”, дея марҳамат қилганлар.
Ушбу оятлар мазмунига эътибор қаратилса аёл киши жамиятнинг ажралмас бир бўлаги бўлиб, у ижтимоий ҳаётда ўз мавқеига эга бўлиб, илм олишга касб-ҳунар қилишга ҳақли эканлигини маълум бўлади. Шунга биноан бугунги куннинг аёли ҳам унга берилган ҳақ-ҳуқуқлардан оқилона фойдаланиш билан бир қаторда, аёллик иффатини сақлаб, ўз шаънига доғ туширмасликка, ўзини турли ёмонлик, хавф-хатар ва иллатлардан ҳимоялаш ҳамда ўз хилқатига муносиб талаб қилинади.
Мамлакатимизда соғлом ва баркамол авлод тарбиясига катта эътибор қаратиб келинмоқда. Айниқса, она бола саломатлиги йўлида талайгина хайрли ишлар амалга оширилмоқда. Бу яратилаётган барча қулайликлар аёл-қизларимизни бахтли она бўлишига сабаб бўлиши даркор. Муҳтарам юртбошимиз томонидан бу йилни “Соғлом она ва бола” йили деб номланиши, бу улкан ғоя замирида ҳам оилага, хусусан, аёл ва келажак авлодга эҳтиром мужассам бўлганидир.
Т.Эрбўтаев,
Вилоят бош имом хатиби
