Барчаларимизга маълумки, ҳар бир мусулмон киши дунё ҳаётида Аллоҳ таоло берган неъматлардан баҳраманд бўлиб яшайди. Ҳаммамиз яхши биламиз Аллоҳ таоло бизга берган беҳисоб неъматларни санаб саноғига ета олмаймиз. Шу неъматларнинг қаторида инсоният учун берилган энг катта неъмат бу – тилдир. Ҳар бир неъмат биз инсонлар учун фақат шукр қилишлик учун берилади. Бу берилган неъматлар тўғрисида қиёмат кунида, албатта сўралишимиз борлиги барчамизга маълум. Бу ҳақда Аллоҳ таоло Қуръони каримда марҳамат қилиб айтади:
«Сўнгра ўша куни берилган неъматлардан сўраласиз» (Такаасур сураси 8-оят).
Бизга Аллоҳ таоло инъом этган бу биргина тил неъмати тўғрисида тафаккур қилишимиз керак, албатта. Мусулмон кишидан бошқа бир мусулмон одам уни тилидан келадиган озордан омонда бўлишлигини айтиб яна бир ҳадисда Пайғамбаримиз (соллаллоҳу алайҳи васаллам) айтадилар: «Мусулмон киши бошқа бир мусулмон кишининг қўлидан ва тилидан саломат бўлганидир» дедилар. Ҳадисда таъкидланишича, мўмин мусулмон киши бошқа кишиларга тилидан ва қўлидан азият бермаслиги лозим. Албатта, биз мусулмонлар тилимизни ғийбатдан, бўҳтондан ва яқин инсонларга нисбатан азият беришликдан сақламоғимиз керак.
Жамиятимизнинг барча ҳудудларида ва инсонлар ўртасида ғийбат ва шунга ўхшаш ҳолатлар бўлаётганлиги аччиқ бўлса ҳақиқатдир. Ҳар бир мусулмон киши ибодат ва чиройли амаллар қилишлиги билан биргаликда шу каби иллатларга ружу қўйганлигини кўриб афсусланасан киши. Ҳар бир қилаётган ибодатларимиз ва амалларимиз худонинг даргоҳида қабул бўлганлигини билгандек инсонларнинг орқасидан ғийбат қилишдан ҳам қўрқмаймиз. Ҳасан Басрий (р.а.) айтадилар: «Гапи кўпнинг ёлғони кўп, моли кўпнинг гуноҳлари кўп.Кимнинг хулқи ёмон бўлса, ўзини азоблайди», дедилар. Инсонни дунёда кўп бефойда гапларни гапиришлиги ўзининг зарари эканлиги таъкидланмоқда.
Бу фоний дунёда барчаларимизни қилаётган амалларимизни Аллоҳ таоло ўзи қабул қилсин. Ўзи биз учун мукофот қилиб берган неъматларга шукр қилувчи шокир бандалари қаторида эътироф этсин. Берилган энг катта неъмат бўлмиш бу тил неъматини инсонларни ғийбат ва бўҳтон қилишга эмас, балки аксинча Аллоҳнинг каломини ўқишликда ва ёд олишликда, инсонларга нисбатан яхши муомалада бўлишликда бардавом бўлишлигини насиб айласин!
Р.Ғойибназаров,
Бувайда тумани «Бандикушод» масжиди имом-хатиби
