Ўзбекистон мусулмонлари идорасининг 2021 йил 23 мартдаги 908-сонли хатига асосан Вазирлар Маҳкамаси ҳузуридаги Дин ишлари бўйича қўмитанинг 2021 йил 1-ярим йиллик иш дастурининг 46-банди ижросини таъминлаш мақсадида Фарғона вилояти “Санъат” коллежи ҳамда Қўқон шаҳридаги “Маданият уйи”да вилоятда фаолият олиб бораётган отинойилар учун бир кунлик ўқув-семинар ўтказилди.
Семинарда Ўзбекистон мусулмонлари идорасининг Фарғона вилояти вакили ўринбосари Алишер домла Наимов ҳамда имом-хатиблардан иборат маърузачилар иштирок этдилар. Семинар маъруза-амалиёт тарзида олиб борилди.
Кун тартибига қўйилган масалалар юзасидан маърузачилар ҳозирги кунда мамлакатимизда ижтимоий соҳаларда олиб борилаётган ислоҳотлар, шунингдек диний-маърифий соҳада амалга оширилаётган ижобий ишлар, мўмин-мусулмонлар учун ташкил этилаётган имкониятлар ҳақида тўхталар эканлар, ижтимоий-маънавий муҳитни соғломлаштириш, соф Ислом таълимотини тарғиб қилишда диний соҳа ходимларининг, хусусан, отинойиларнинг ўрни ҳақида баён қилдилар.
Семинар давомида тренинглар ҳам ташкил этилди, савол-жавоб, дебат усулларидан фойдаланилди. Шунингдек, отинойиларнинг мавжуд муаммолар юзасидан берган саволларига жавоблар берилди, фикр-мулоҳаза ва таклифлари тингланди.
Фарғона вилояти вакиллиги Матбуот хизмати
