Ҳар бир ота-она ўз фарзандларининг истиқболи, бахт-саодати ва келажакда мустақил ҳаёт кечириб, жисмоний, маънавий ва руҳий жиҳатдан баркамол авлод бўлиб етишишини ният қилади. Ҳар бир никоҳланувчи ёш оила, аввало, жуфти билан чиройли ҳаёт кечириш ҳамда шириндан шакар фарзандлар кўришни орзу қилади. Фарзанд инсон ҳаётини мазмуни бўлибгина қолмай, балки насл-насабини давомчиси ҳамдир.
Одобли, ақлли, уддабурон, салоҳиятли фарзанд ота-онанинг бахти бўлиб, икки дунё саодатига олиб борувчи дилбанддир. Шундай фарзандлар ўз ота-онасига раҳмат ва бахт, хурсандчилик келтиради. Ҳар бир инсоннинг қалбида оила қуриш ва солиҳ фарзанд кўриш орзуси бўлади. Фарзандларнинг соғлом, илмли, иймонли ва иродали бўлиб улғайиши нафақат ота-она, балки давлатимизнинг ҳам эзгу мақсадларидан биридир.
Мамлакатимизда баркамол авлод тарбиясига юксак эътибор ва ғамхўрликлар кўрсатилмоқда. Уларнинг соғлом, бақувват илмли ва одобли бўлиб улғайишлари учун барча шароитлар яратиб берилган.
Муқаддас ислом динида ҳам оила ҳамда фарзандлар борасида кўплаб ибрат олиш зарур бўлган тавсия ва кўрсатмалар берилган. Ҳаттоки фарзанд дунёга келишидан олдин солиҳ фарзанд дунёга келиши учун нима қилиш кераклигигача айтиб ўтилган.
Оиша онамиздан ривоят қилинган ҳадисда Расулуллоҳ (с.а.в.): “Фарзандларингизга муносиб онани ихтиёр қилинглар”, деганлар.
Расулуллоҳ (с.а.в.): “Ҳеч бир ота ўз фарзандига гўзал хулқ ва одобдан афзалроқ мерос қолдиролмайди”, деганлар (Термизий ривояти).
Халқимизда: “Қозонга яқин юрсанг қораси юқади” деган нақл ҳам бор. Ҳасанул Басрий р.ҳ. бир куни одамларга: “Экин пишиб етилгандан сўнг нима қилинади?” деб савол бердилар. Улар: “Ҳосили йиғиб олинади”, дейишди. Шунда Ҳасанул Басрий: “Шуни билингларки, гоҳида экин пишиб етилмасидан олдин унга офат (касаллик) етиши ва уни нобуд қилиши ҳам мумкин”, деб ёшлар тарбиясига эътиборли бўлишга, кишининг ёшлик даврини қандай ўтказиши унинг келажакда ким бўлиб етишишида муҳим ўрин тутишига ишора қилдилар. Ёшлик даври қалбнинг мусаффолигини сақлаш, уни имон ва илму маърифат нури билан тўлдириш учун энг қулай фурсатдир.
Р.Нуралиев,
Фурқат тумани “Ал-Мадинатул Мунаввара” масжиди имом-ноиби
