Президентимиз Шавкат Мирзиёев Тошкент вилоятига ташрифи чоғида (7 январь 2018 йил) вилоят фаоллари билан учрашиб, диний-маърифий ишлар масаласига ҳам тўхталган, хусусан, Ислом динининг бешинчи аркони – Ҳаж ибодати хусусида ҳам ўз фикрларини билдириб:
“Ислом тўғрисида, динимизнинг поклигини БМТ минбарида, Ислом ташкилоти, Шанхай ҳамкорлик ташкилоти йиғилишларида айтдим. Имом ал Бухорий маркази, Тошкент Ислом цивилизацияси маркази, Ислом академиясини ташкил этдик.
Мана ҳажга боришади. Бутун дунёдан боради. Ўзбекистондан ҳажга борганлар ўтганида маданият ва илмнинг ҳиди келиши керак. Кечирасизлар, Ҳаж ибодатми, тижоратми? 50 фоизи тижорат учун бораяпти, улар боболаримизни шарманда қилаяпти.
Алҳамдулиллоҳ, ҳаммамиз мусулмонмиз. Ҳажга бориш учун энди рўйхат бўлмайди. Мен 2 минг қўшиб бердим, лекин керак бўлса, минг кишини юбораман. Кимни юбораман? Ким масжидга кириб, Қуръондан 2 сурани ўқиб бериб, шу маҳалла, шу кўчадаги адашганни мен зиммамга оламан, у адашган бўлмайди, менинг ибодатимнинг шукроналиги шу бўлади, деса, биринчи бўлиб, шу одам кетади.
Бир-биримиз билан илмда, билимда мусобақа қилайлик. Фан доктори Имом ал Бухорийнинг фалон китоби фалон бандини ташвиқ қилса, қандай яхши бўлар эди. Буни ким қилади? Ўзимиз қиламиз”, – деган эди Президентимиз.
Аллоҳ таолонинг муборак байтини тавоф қилиш яқин ўтмишдаги ота-боболаримизнинг ҳам армонларидан бири бўлиб ўтганидан барчамиз хабардормиз. Шукрки, бугун бу борада хурсанд бўладиган ишлар талайгина. Айниқса, айни кунларда ватандошларимизнинг ҳар куни беш юздан зиёдлари Умра сафарига йўл олишаётгани таҳсинга сазовор. Аммо юртбошимиз куйиниб гапирганидек, бу улуғ ибодатга отланаётганларнинг нияти холис, ибодат ҳаловатини топиш, гуноҳларидан фориғ бўлиш, бугунги кунга шукроналикмикин? Ахир кимсан “Имом Бухорий”нинг юртидан келган меҳмон дея қабул қилишади бизни.
Ҳикоя қилинишича, Байтуллоҳ зиёратига келганлардан бири: “Эй, Роббим, бандаларинг бир жойга ишлагани кетаётиб оиласидагиларга: “Сизларга ажойиб ва кўп совғалар олиб келаман” дея мақтанади. Мен ҳам хонадон аҳлим ва оиламга: “Роббимнинг даргоҳидан ибодатим ва ихлосим эвазига сизларга раҳмат ва мағфират олиб келаман” дея мақтаниб келганман. Мени ноумид қилма, Роббим!”, деди. Шунда ғойибдан: “Бандам раҳмат ва мағфиратимдан сенга ҳам ато қилдим, оилангга олиб бор” деган бир нидо эшитилди. У аҳлига Аллоҳ таолонинг улкан совғаси билан қайтди.
Хулоса ўрнида шуни айтмоқчимизки, Пайғамбаримиз алайҳиссалом айтганларидек “Амаллар ниятга боғлиқдир”. Шундай экан, биз ҳам бу улуғ ибодатга мушарраф бўлар эканмиз, ниятимизни пок қилсак, ўйлаймизки, бу шукроналигимиз ифодаси бўлади.
Шукрулло МИНОЖАТОВ,
Олтиариқ тумани “Жаҳонгирхон” масжиди имом-хатиби
