Ривоят қилинишича, Абу Ҳанифа роҳимаҳуллоҳ дахрийларга қарши кескир қилич эдилар. Дахрийлар у зотни ўлдириш учун фурсат кутардилар.
Бир куни Абу Ҳанифа масжидда ўтирганларида у зотга яланғочланган қиличлар билан ҳужум қиладилар. Буюк имом: “Менга бир масала борасида жавоб беринглар-да, хоҳлаган ишингизни қилаверинг”, дедилар. Дахрийлар бунга рози бўлгач У зот:
– Сизларга денгиз гирдобида қолган, атрофини мавж урган тўлқинлар-у, турли хил шамоллар ўраб олган, уни бошқариб турадиган денгизчилари бўлмаган кемани тўғри ҳолда сузиб кетаётганини кўрдим, деб айтган киши ҳақида нима дейсизлар? Шуни ақлга тўғри келади, деб ўйлайсизларми? – дедилар. Улар:
– Йўғ-е! Буни ақл қабул қилмайди, дейишди. Абу Ҳанифа:
– Субҳаналлоҳ! Денгизчилари бўлмаган кеманинг тўғри ҳолда сузиши ақлга тўғри келмаган бир пайтда, ҳолатлари турли-туман бўлган еру осмон Яратувчисиз қоим бўлиши мумкин экан-да?!” дедилар.
Бундай жавобни кутмаган дахрийлар шу дамда Аллоҳнинг инояти ила буюк имомнинг қўлларида исломни қабул қилдилар.
Азизбек МИРЗАЖОНОВ,
Олтиариқ тумани “Ҳожа Абдуллоҳ ал-Ансорий” масжиди имом-хатиби
