Ҳаётимизнинг бир дақиқасида талайгина хайрли ишларни қилиш мумкин. Масалан, Қуръон оятларини ўқиш. Ҳар бир оятда ўнлаб ҳарфлар бор ва шу ҳарфларнинг ҳар бирига ўнтадан савоб берилса, юзлаб савобга эга бўламиз. Юз марта: “Субҳаналоҳи ва биҳамдиҳ” десак, бир дақиқа вақтимиз кетади. Ҳолбуки, “Субҳаналоҳи ва биҳамдиҳ”ни айтган одамнинг гуноҳлари, денгиз кўпиклари миқдорича кўп бўлсада, мағфират қилинади.
Бир дақиқада бир китобнинг тўрт саҳифасига кўз югуртириб чиқиш мумкин. Фотиҳа сурасини ичида бир дақиқада етти марта ўқишга улгуриш мумкин. Баъзилар Фотиҳа сурасига бериладиган ҳасанотларни ҳисоблашган экан, бир минг тўрт юздан ортиқроқ чиқибди. Ихлос сурасини эса, бир дақиқада йигирма марта ўқишингиз мумкин. Ишонмасангиз, синаб кўринг!
Буларни баён қилар эканмиз, сизга умрингизнинг бир дақиқаси қанчалар қийматли эканини айтмоқчимиз, холос. Уни зикр, тиловат, дуо, тафаккур, мутолаа ва таълифга қиёслаб кўрилса, жуда ҳам катта нарса (рақамлар)ни ифодалайди.
Биргина дақиқа сизнинг умрингиз, фикрингиз, тушунчангиз, хотирангиз ва ҳасанотларингизга кўплаб нарсани зиёда қилиши мумкин.
Бу бир дақиқадан унумли фойдалансангиз, ўз ўрнига сарфласангиз, шундагина амал саҳифангизга ёзилади. Ўйлаб кўринг, қанча-қанча дақиқаларимиз, соатларимиз, кунларимиз, ойларимиз, ҳаттоки йилларимиз бекорга кетмоқда. Ўйин-кулги ва кераксиз нарсалар билан ўтмоқда, изсиз йўқ бўлмоқда, қанча вақтингиз бекорга кетибди?! Қанча савоблардан маҳрум қолибсиз?! Қанча-қанча онларингиз миш-миш, ғийбат, чақимчилик, ғаламислик, беҳуда ишлар билан машғул бўлиш ва бекорчилар билан бирга ўтириш билан ўтиб кетибди?!
Бир дақиқада “Ла илаҳа иллаллоҳу ваҳдаҳу ла шарика лаҳу лаҳул мулку ва лаҳул ҳамду ва ҳува ала кулли шайъин қодийр” деб йигирма марта айтсангиз бўлади. Унинг савоби эса Исмоил алайҳиссалом авлодидан саккизтасини Аллоҳ йўлида қулликдан озод қилиш савобига тенгдир.
Таълиф оламига келсак, бир дақиқада хотирангиздан тўрт, бошқа бир китобдан эса беш сатрни, яъни тақрибан бир саҳифанинг учдан бирини ёза оласиз. Агар бир кунда беш сатр ёзишингизни фараз қилсак, бир ойда беш, бир йилда бир юз йигирма, ўн йилда эса бир минг икки юз саҳифани тўлдира оласиз. Ибн Касирнинг тафсирича ҳажмда бўлади. Агар ҳар куни бир дақиқада йигирма марта Ихлос сурасини ўқий олсангиз, бир ойда олти юз, бир йилда эса етти минг икки юз марта ўқий оласиз. Бу эса Қуръон каримни икки минг тўрт юз марта ўқиш ажрига тенгдир.
Тажрибаларда шеърнинг бир байтини бир дақиқада йигирма марта такрорлаб, ёд олишни синаб кўрилган. Демак, агар ҳар куни ҳикматли шеърнинг бир байтини ёдлашга одатлансак, ўн йилда уч минг олти юз байтни ёд олар эканмиз. Ҳолбуки, бу байтлар биз учун нутқимизга ҳикмат ва тилимизга бойлик бағишлайди.
“Соллаллоҳу алайҳи васаллам” лафзи билан Расулуллоҳ соллаллоҳу алайҳи васалламга бир дақиқада эллик марта салавот айтишингиз мумкин. Бунга мукофот сифатида Аллоҳ таоло сизга беш юз марта салавот айтади. Чунки сиз тарафингиздан айтилган бир салавот ўн баробар савоб билан тақдирланади.
Енгил, фарз ва вожибларига риоя қилинган, рукуъ ва саждаларда уч марта тасбиҳ айтишга чекланилган бир ракаатни бир дақиқада ўқий оладиган одам бўлса, у ҳар куни икки ракаат зуҳо-чошгоҳ намозини ўқиса, бир йилда етти юз ракаатдан кўпроқ намоз ўқийди. Ҳар бир ракаатда икки сажда бўлса, бир йилда чошгоҳ намозининг ўзида бир минг тўрт юздан ортиқ сажда қилган бўлади. Бунинг учун унинг кундалик ҳаётидан икки дақиқа кифоя.
Саҳиҳ ҳадисда: “Сиз Аллоҳ учун бир сажда қилсангиз, Аллоҳ бу сажда билан (мақомингизни) бир даража кўтаради ва битта гуноҳингизни кечиради” дейилган.
Демак, бир дақиқада Роббимизни рози қилишимиз, гуноҳларимизни ўчиришимиз, Аллоҳ ҳузурида савоблар олишимиз ва ёдлашимиз, лаёқатимизни ўстиришимиз, билимимизни оширишимиз, маданиятимизни бойитишимиз ва маҳоратимизни турли нарсаларда оширишимиз мумкин экан.
Буларнинг барчаси ҳимматимиз ва ғайратимизга боғлиқ. Имом Табароний ривоят қилган ҳадисда Расулуллоҳ соллаллоҳу алайҳи васаллам марҳамат қилиб айтадиларки, “Албатта Аллоҳ таоло бандалари ичида ғайратлисини яхши кўради”. Яъни кимки ҳар бир ишда, хоҳ у диний бўлсин, хоҳ дунёвий бўлсин ғайрат, шижоат қиладиган бўлса, албатта, Аллоҳ таолонинг Ўзи уни қўллайди ва у мақсадига етишади. Чунки саъй-ҳаракат бандадан, уни баракасини бериб, зиёда қилиш Аллоҳдандир.
А.НАИМОВ,
Фарғона вилояти бош имом-хатиби ўринбосари
