19.02.2020 санада жойданди
Ақида илми инсон ҳаётида одоб-ахлоқ, ибодат, олди-берди алоқалари ва барча илмлардан муҳимроқ ўрин тутади. Чунки инсон Исломни қабул қилганидан сўнг, биринчи навбатда унинг зиммасига ибодатларни ўрганишдан ҳам аввал ақида илмини ўрганиш вожиб бўлади. Шунинг учун ҳам Пайғамбаримиз соллаллоҳу алайҳи васаллам Муоз ибн Жабал розияллоҳу анҳуни Яман аҳлига элчи қилиб юбораётганларида:
“Аввало уларни Аллоҳ таолони бир дейишга чақиргин, қачон улар Аллоҳни бир деб билишса, Аллоҳ таоло уларга беш вақт намозни фарз қилганлиги хабарини беринг”,- деганлар (Имом Бухорий ва Имом Термизий ривоятлари).
Ушбу ҳадиси шариф ақидани нақадар аҳамиятли эканига далолат қилади. Чунки Раcулуллоҳ соллаллоҳу алайҳи васаллам Яман аҳлини намоз ўқиш ва бошқа амалларни бажаришга буюришдан аввал, уларни ақидасини тўғрилашга буюрдилар.
Тўғри ақидани ўрганиш инсонни адашишдан, ширкдан ва залолатдан сақлайди. Ақидани билмаслик эса инсоннинг гумроҳ бўлиб қолишига сабаб бўлади. Минг афсуски, бугунги кунда баъзан ўтганларни қабрини зиёрат қилиш асносида қабрдагилардан ёрдам сўраш, қабрни тавоф қилиш, чироқ ёқиш, дарахтларга ип боғлаш каби хурофотларни бажариш холатларига гувоҳ бўлиб қоламиз. Ваҳоланки, шариатимизда бу каби амаллардан қайтарилган. Аслида қабрлар зиёратидан Аллоҳ таолонинг розилигини, қалбни ислоҳ этишни ҳамда ўтганларга дуойи хайрлар қилишни қасд қилиниши керак.
Шунинг учун ҳам улуғ машойихларимиздан бири бўлган Сўфи Оллоёр:
Ақида билмаган шайтона элдир,
Агар минг йил амал деб қилса – елдир
деб, ақида илми биз учун қанчалик аҳамиятли эканлиги, агар тўғри ақидани ўрганмасак, Аллоҳ таоло рози бўлмайдиган гуноҳ ишларга қўл уриб қўйишимиз мумкинлиги ва яхши амалларимизни савобини йўққа чиқариб қўйишимиз мумкинлигини баён қилиб беряптилар.
Аллоҳ таоло ҳаммамизга тўғри ақидани насиб айласин.
Ҳошимжон ЭРГАШЕВ,
Бувайда тумани “Пошшопирим” масжиди имом-хатиби
