Бугун, 23 апрель куни Саудия Арабистони пойтахтида энг нуфузли ташкилот ҳисобланган Ислом олами уюшмаси Олий Кенгашнинг 46-йиғилиши бўлиб ўтди.
Ўзбекистон мусулмонлари идораси раиси, муфтий Шайх Нуриддин Холиқназар ҳазратлари Ислом олами уюшмаси Олий Кенгаши аъзолигига қабул қилинганлари тўғрисида ушбу йиғилишда қарор қилинди. Ушбу аъзолик Муфтий ҳазратлари фаолиятлари давомидаги тўртинчи йирик ташкилотга аъзо бўлишларидир. Булар – Халқаро мусулмон уламолари кенгаши (Қатар), Мусулмон донишмандлар кенгаши (БАА), Исломий фиқҳ академияси (Саудия Арабистони) ва Ислом олами уюшмаси Олий Кенгаши (Саудия Арабистони) кабилардир.
Риёз шаҳрида бўлиб ўтган халқаро анжуманда Саудия Арабистони, Миср Араб Республикаси, Бирлашган Араб Амирлиги, Кувайт, Қатар, Туркия, Малайзия, Индонезия каби давлатлардан келган вазирлар, таниқли уламолар, машҳур муфтийлар, профессор-олимлар, давлат ва дин арбоблари ҳамда халқаро исломий ташкилотлар етакчилари иштирок этди.
Шунингдек, Саудия Арабистони Бош муфтийси, Ислом олами уюшмаси Олий Кенгаши раиси Абдулазиз бин Абдуллоҳ Ол Шайх, Масжид ал-Ҳаром ва Масжид ан-Набавий диний ишлари раиси, Масжид ал-Ҳаром имом-хатиби Шайх, Доктор Абдурраҳмон ибн Абдулазиз ас-Судайс, Миср Вақфлар ва Ислом ишлари вазири доктор Муҳаммад Мухтор Жумъа Мабрук ва Туркия Диёнат ишлари бошқармаси раиси Али Эрбош кабилар қатнашди.
Ислом олами уюшмаси Бош котиби Шайх Доктор Муҳаммад Абдулкарим ал-Исо жанобларининг таклифига биноан Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ушбу анжуманда иштирок этди.
Анжуманда бутун жаҳонда тинчлик-осойишталикни қарор топтириш, хусусан, Фаластин ва Ғазо минтақасидаги вазиятни тинч йўл билан ҳал этиш, ислом уммати бирлигига эришиш, айрим мусулмон мамлакатларидаги нохуш ҳолатларни ислоҳ қилиш, Роҳинжа мусулмонларининг ҳақ-ҳуқуқларини ҳимоя қилиш, диний рамзларнинг таҳқирланиши, айниқса, Қуръони каримни ёқиш каби ҳолатларга мутлақо йўл қўймаслик ва исломофобия хатти-ҳаракатларининг олдини олиш каби ўта муҳим масалалар муҳокама қилинди.
Сўзга чиққан нотиқлар Яқин Шарқда қуролли қарама-қаршиликлар оқибатида тинч аҳоли вакиллари, аёллар ва ёш болалар ҳалок бўлаётгани, кескинлик кун сайин мураккаблашиб, қурбонлар сони ортиб бораётгани сабабли зудлик билан Ғазодаги ўт очишни, ҳарбий ҳаракатларни тўхтатиш, бегуноҳ аҳоли ва фуқароларни ҳимоя қилишга чақириш баробарида Фаластин муаммосини адолатли ҳал этишга даъват этдилар.
Йиғилиш якунида тегишли қарорлар ва баёнотлар қабул қилинди.
* * *
Bugun, 23 aprel kuni Saudiya Arabistoni poytaxtida eng nufuzli tashkilot hisoblangan Islom olami uyushmasi Oliy Kengashning 46-yig‘ilishi bo‘lib o‘tdi.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Islom olami uyushmasi Oliy Kengashi a’zoligiga qabul qilinganlari to‘g‘risida ushbu yig‘ilishda qaror qilindi. Ushbu a’zolik Muftiy hazratlari faoliyatlari davomidagi to‘rtinchi yirik tashkilotga a’zo bo‘lishlaridir. Bular – Xalqaro musulmon ulamolari kengashi (Qatar), Musulmon donishmandlar kengashi (BAA), Islomiy fiqh akademiyasi (Saudiya Arabistoni) va Islom olami uyushmasi Oliy Kengashi (Saudiya Arabistoni) kabilardir.
Riyoz shahrida bo‘lib o‘tgan xalqaro anjumanda Saudiya Arabistoni, Misr Arab Respublikasi, Birlashgan Arab Amirligi, Kuvayt, Qatar, Turkiya, Malayziya, Indoneziya kabi davlatlardan kelgan vazirlar, taniqli ulamolar, mashhur muftiylar, professor-olimlar, davlat va din arboblari hamda xalqaro islomiy tashkilotlar yetakchilari ishtirok etdi.
Shuningdek, Saudiya Arabistoni Bosh muftiysi, Islom olami uyushmasi Oliy Kengashi raisi Abdulaziz bin Abdulloh Ol Shayx, Masjid al-Harom va Masjid an-Nabaviy diniy ishlari raisi, Masjid al-Harom imom-xatibi Shayx, Doktor Abdurrahmon ibn Abdulaziz as-Sudays, Misr Vaqflar va Islom ishlari vaziri doktor Muhammad Muxtor Jum’a Mabruk va Turkiya Diyonat ishlari boshqarmasi raisi Ali Erbosh kabilar qatnashdi.
Islom olami uyushmasi Bosh kotibi Shayx Doktor Muhammad Abdulkarim al-Iso janoblarining taklifiga binoan O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ushbu anjumanda ishtirok etdi.
Anjumanda butun jahonda tinchlik-osoyishtalikni qaror toptirish, xususan, Falastin va G‘azo mintaqasidagi vaziyatni tinch yo‘l bilan hal etish, islom ummati birligiga erishish, ayrim musulmon mamlakatlaridagi noxush holatlarni isloh qilish, Rohinja musulmonlarining haq-huquqlarini himoya qilish, diniy ramzlarning tahqirlanishi, ayniqsa, Qur’oni karimni yoqish kabi holatlarga mutlaqo yo‘l qo‘ymaslik va islomofobiya xatti-harakatlarining oldini olish kabi o‘ta muhim masalalar muhokama qilindi.
So‘zga chiqqan notiqlar Yaqin Sharqda qurolli qarama-qarshiliklar oqibatida tinch aholi vakillari, ayollar va yosh bolalar halok bo‘layotgani, keskinlik kun sayin murakkablashib, qurbonlar soni ortib borayotgani sababli zudlik bilan G‘azodagi o‘t ochishni, harbiy harakatlarni to‘xtatish, begunoh aholi va fuqarolarni himoya qilishga chaqirish barobarida Falastin muammosini adolatli hal etishga da’vat etdilar.
Yig‘ilish yakunida tegishli qarorlar va bayonotlar qabul qilindi..
