Имом Абу Ҳанифа раҳматуллоҳи алайҳ шундай устоз бўлганки, унинг қалбида Аллоҳдан қўрқиш, омонатдорлик, масъулиятни адо этиш ва узоқни кўра билиш жойлашган эди. Бу инсон ҳақиқий устозлик даъвосида бўлган барча учун ибрат ва ўрнак бўлиши керак. Бу донишманд ва ўқитувчининг ҳаётидан минг йилдан ортиқ вақт ўтибди, аммо то ҳануз ҳар куни, балки ҳар лаҳза унинг илмидан Шарқ ва Ғарбда фойдаланишмоқда.
У киши аввал одамлар билан савдо қилар эди. Аммо кейинчалик савдосини ўзгартирди. Аллоҳ билан савдони бошлади. У одамлар билан қилган савдоси дунёдан кетиши билан тугади, энди бу савдодан ҳеч ким манфаат олмайди, аммо Аллоҳ билан қилган савдоси то бугунгача қолиб келмоқда ва иншоаллоҳ қиёмат кунигача қолади. Бу гапларни тасдиқлаш учун улуғ инсон ҳаётидан кичик воқеаларни келтирамиз, шунингдек биз ҳам ундан ибрат олиб тўғри йўлни танлайлик. Биз учун одамларга фойдаси тегадиган ва ўлимдан кейин ҳам қоладиган савдони танлашимиз керак.
Саймарий раҳимаҳуллоҳ ўз санади билан қозий Шарийк раҳимаҳуллоҳдан ривоят қилиб айтган: “Абу Ҳанифа раҳматуллоҳи алайҳ кўп ва узоқ сукут қилар эди. Жуда кўп мулоҳаза қилар эди. Фиқҳда мукаммал ва чуқур билимга эга эди. Илм ва баҳсда нозик ва аниқ хулосалар чиқарар эди. Таълим бераётганда мол талаб қилмас эди. Агар шогирд камбағал бўлса, уни молиявий жиҳатдан таъминлар эди. У ва унинг оиласи учун маблағ ажратар эди, шогирд эса таълимни давом эттирар эди. Таълимни тугатганда унга айтар эди: “Сен энг катта бойликка эришдинг, ҳалол ва ҳаромни таниш билан тўлиқ фойдага эришдинг”. У жуда ақлли эди ва шогирдлар ва баҳсдошлар билан камдан-кам тортишар эди”.
Курдий раҳимаҳуллоҳ ўз маноқиби билан Абу Юсуф раҳимаҳуллоҳдан ривоят қилиб айтади: “Мен ҳадис ўрганар эдим ва камбағал эдим. Бир куни отам олдимга келди, мен эса Имомнинг ёнида эдим. Отам менга шундай деди: “Эй жигарбандим, оёғингни унинг оёғи билан бирга чўзма, чунки бунинг нони ёғли, сен эса муҳтожсан”. Шу боис, бир муддат илм ўрганишга бормадим ва отамнинг буйруғини бажардим. Имом мендан нима учун қолиб кетганимни сўради. Мен айтдим: “Рўзғор ташвиши”. Одамлар қайтганидан кейин мен кетмоқчи бўлдим. У менга бир халта берди, унинг ичида юз дирҳам бор эди ва деди: “Бу пулни сарфла, агар тугаб қолса, менга хабар бер ва доим дарсларга қатна”. Бир неча вақт ўтиб, у яна менга юз дирҳам берди. Ҳар сафар тугаганда менга бериб турар эди, шундай экан, мен унга тугашини айтмас эдим. Гўёки кимдир уни тугаганини хабар қилгандай эди. Бу мен зарур бўлган илмга етиб боргунча давом этди. Аллоҳ унга яхшилик ато қилсин ва уни мағфират қилсин”.
Шунингдек, Ҳасан ибн Зиёд раҳимаҳуллоҳ камбағал инсон бўлгани ҳақида айтади. У ҳар доим Имомнинг дарслари ҳалқасида бўлар эди. Отаси унга шундай дерди: “Бизда қизлар бор, уларга эътибор қиладиган бир ўғилдан бошқа ўғил йўқ, сен улар учун бирор иш билан шуғуллан”. Бу хабар Имомга етиб борганида, у Ҳасанга рўзғор учун маблағ ажратди. Унга шундай деди: “Фиқҳни ўрганишда давом эт, чунки мен илмдан бехабар бир фақирни кўрган эмасман”.
Муваффақ ўз санади билан Маккий ибн Иброҳимдан ривоят қилиб айтган, у Имом Бухорийнинг шайхларидан бири ҳисобланади: “Мен савдо қилар эдим. Бир куни Абу Ҳанифа раҳматуллоҳи алайҳни олдига келдим. У менга шундай деди: “Эй Маккий! Мен сени савдо қилаётганингни кўряпман. Савдо илмсиз бўлса, унда турли бузуқликлар келиб чиқади. Нима учун илм ўрганмайсан? Нима учун ёзмайсан?” У менга илмга йўналиш олиш ва ёзишни ўрганиш ҳақида доимий равишда тушунтириб турди. Аллоҳ илм баракаси билан менга ризқ эшигини очди. Мен Абу Ҳанифа роҳматуллоҳи алайҳ учун ҳар намозимдан кейин ва ҳар қанча ёдимга тушса, дуо қиламан. Чунки Аллоҳ унинг баракаси билан мен учун илм эшигини очди».
Хулоса қилиб айтсак, Абу Ҳанифа раҳматуллоҳи алайҳ ўз даврининг энг яхши муаллимларидан эди. Ҳаммамизга ҳам бу кишининг йўлидан юриб дунё ва охират саодатига эришиш насиб айласин!
Хуршид Абдураҳимов,
Сўх тумани «Қози Неъматуллоҳ» масжиди имом-хатиби
***
Imom Abu Hanifa rahmatullohi alayh shunday ustoz bo‘lganki, uning qalbida Allohdan qo‘rqish, omonatdorlik, mas’uliyatni ado etish va uzoqni ko‘ra bilish joylashgan edi. Bu inson haqiqiy ustozlik da’vosida bo‘lgan barcha uchun ibrat va o‘rnak bo‘lishi kerak. Bu donishmand va o‘qituvchining hayotidan ming yildan ortiq vaqt o‘tibdi, ammo to hanuz har kuni, balki har lahza uning ilmidan Sharq va G‘arbda foydalanishmoqda.
U kishi avval odamlar bilan savdo qilar edi. Ammo keyinchalik savdosini o‘zgartirdi. Alloh bilan savdoni boshladi. U odamlar bilan qilgan savdosi dunyodan ketishi bilan tugadi, endi bu savdodan hech kim manfaat olmaydi, ammo Alloh bilan qilgan savdosi to bugungacha qolib kelmoqda va inshoalloh qiyomat kunigacha qoladi. Bu gaplarni tasdiqlash uchun ulug‘ inson hayotidan kichik voqealarni keltiramiz, shuningdek biz ham undan ibrat olib to‘g‘ri yo‘lni tanlaylik. Biz uchun odamlarga foydasi tegadigan va o‘limdan keyin ham qoladigan savdoni tanlashimiz kerak.
Saymariy rahimahulloh o‘z sanadi bilan qoziy Shariyk rahimahullohdan rivoyat qilib aytgan: “Abu Hanifa rahmatullohi alayh ko‘p va uzoq sukut qilar edi. Juda ko‘p mulohaza qilar edi. Fiqhda mukammal va chuqur bilimga ega edi. Ilm va bahsda nozik va aniq xulosalar chiqarar edi. Ta’lim berayotganda mol talab qilmas edi. Agar shogird kambag‘al bo‘lsa, uni moliyaviy jihatdan ta’minlar edi. U va uning oilasi uchun mablag‘ ajratar edi, shogird esa ta’limni davom ettirar edi. Ta’limni tugatganda unga aytar edi: “Sen eng katta boylikka erishding, halol va haromni tanish bilan to‘liq foydaga erishding”. U juda aqlli edi va shogirdlar va bahsdoshlar bilan kamdan-kam tortishar edi”.
Kurdiy rahimahulloh o‘z manoqibi bilan Abu Yusuf rahimahullohdan rivoyat qilib aytadi: “Men hadis o‘rganar edim va kambag‘al edim. Bir kuni otam oldimga keldi, men esa Imomning yonida edim. Otam menga shunday dedi: “Ey jigarbandim, oyog‘ingni uning oyog‘i bilan birga cho‘zma, chunki buning noni yog‘li, sen esa muhtojsan”. Shu bois, bir muddat ilm o‘rganishga bormadim va otamning buyrug‘ini bajardim. Imom mendan nima uchun qolib ketganimni so‘radi. Men aytdim: “Ro‘zg‘or tashvishi”. Odamlar qaytganidan keyin men ketmoqchi bo‘ldim. U menga bir xalta berdi, uning ichida yuz dirham bor edi va dedi: “Bu pulni sarfla, agar tugab qolsa, menga xabar ber va doim darslarga qatna”. Bir necha vaqt o‘tib, u yana menga yuz dirham berdi. Har safar tugaganda menga berib turar edi, shunday ekan, men unga tugashini aytmas edim. Go‘yoki kimdir uni tugaganini xabar qilganday edi. Bu men zarur bo‘lgan ilmga yetib borguncha davom etdi. Alloh unga yaxshilik ato qilsin va uni mag‘firat qilsin”.
Shuningdek, Hasan ibn Ziyod rahimahulloh kambag‘al inson bo‘lgani haqida aytadi. U har doim Imomning darslari halqasida bo‘lar edi. Otasi unga shunday derdi: “Bizda qizlar bor, ularga e’tibor qiladigan bir o‘g‘ildan boshqa o‘g‘il yo‘q, sen ular uchun biror ish bilan shug‘ullan”. Bu xabar Imomga yetib borganida, u Hasanga ro‘zg‘or uchun mablag‘ ajratdi. Unga shunday dedi: “Fiqhni o‘rganishda davom et, chunki men ilmdan bexabar bir faqirni ko‘rgan emasman”.
Muvaffaq o‘z sanadi bilan Makkiy ibn Ibrohimdan rivoyat qilib aytgan, u Imom Buxoriyning shayxlaridan biri hisoblanadi: “Men savdo qilar edim. Bir kuni Abu Hanifa rahmatullohi alayhni oldiga keldim. U menga shunday dedi: “Ey Makkiy! Men seni savdo qilayotganingni ko‘ryapman. Savdo ilmsiz bo‘lsa, unda turli buzuqliklar kelib chiqadi. Nima uchun ilm o‘rganmaysan? Nima uchun yozmaysan?” U menga ilmga yo‘nalish olish va yozishni o‘rganish haqida doimiy ravishda tushuntirib turdi. Alloh ilm barakasi bilan menga rizq eshigini ochdi. Men Abu Hanifa rohmatullohi alayh uchun har namozimdan keyin va har qancha yodimga tushsa, duo qilaman. Chunki Alloh uning barakasi bilan men uchun ilm eshigini ochdi».
Xulosa qilib aytsak, Abu Hanifa rahmatullohi alayh o‘z davrining eng yaxshi muallimlaridan edi. Hammamizga ham bu kishining yo‘lidan yurib dunyo va oxirat saodatiga erishish nasib aylasin!
Xurshid Abdurahimov,
So‘x tumani «Qozi Ne’matulloh» masjidi imom-xatibi