Аллоҳ таоло инсонга ақлу идрок ато этиб, барча махлуқлардан афзал қилди. Пайғамбарлар ва илоҳий китоблар орқали икки дунё саодатига эришиш йўлларини ўргатди. Залолатга бошловчи ишлардан қайтарди.
Қуръони каримда пайғамбаримиз соллаллоҳу алайҳи васалламга: “Эй, инсонлар! Мен сизлар учун аниқ огоҳлантирувчидурман, холос” (Ҳаж сураси, 49 оят), дейиш буюрилган.
Аллоҳ таоло ер юзида ёвузлик қилмасликка буюради ҳамда ноҳақлик, адолатсизлик, зўравонлик, одам ўлдириш, қон тўкишни таъқиқлайди. Аллоҳ таолонинг ана шу буйруқларига бўйсунмаслик йўлини тутган кимсаларни Қуръони карим «Шайтоннинг изидан эргашганлар» деб атайди. Мана инсонларни огоҳлантирган Қуръони карим оятлари: «Аллоҳга берган аҳд-паймонларини мустаҳкам бўлганидан кейин бузадиган, Аллоҳ боғланишига буюрган нарсаларни узадиган ва Ер юзида бузғунчилик қилиб юрадиган кимсалар ҳам борки, улар учун (Аллоҳнинг) лаънати бўлур ва улар учун энг ёмон диёр – жаҳаннам бордир» (Раъд сураси, 25 оят).
«Аллоҳ берган ризқдан еб-ичинглар, ер юзида бузғунчилик жиноятларини қилманглар» (Бақара сураси, 60 оят).
Парвардигорнинг иродасига қарши бориб, бегуноҳ одамларни ўлдирган ва хўрлаган кимсалар дунё ҳаётида ютуққа эришамиз, деб ўйласалар қаттиқ хато қилган бўлар. Аллоҳ таоло ер юзида ҳар қандай бузғунчиликни таъқиқлайди, ёвузлик йўлига кирганларни лаънатлайди. Зеро, Қуръони каримда шундай дейилган: «Аллоҳ бузғунчи кимсаларнинг ишини ўнгламайди» (Юнус сураси, 81 оят).
У зот (соллаллоҳу алайҳи васаллам) инсоният жаҳолат ботқоғига ғарқ бўлиб, ўз қиёфасини йўқотиб бораётган даврда пайғамбар қилиб юборилди. Зулматни ҳидоят нури билан ёритдилар. Инсонга фақат имонгина чин маънода бахт бера олишини ҳикматли сўзлари, ибратли ҳаётлари билан ўргатдилар.
Одамлар орасида яхшиликларни ёйиш, ёмонликларнинг олдини олиши керак. Имони бутун инсон ён-атрофга ҳар доим ҳушёрлик билан боқади, жамиятда юз бераётган воқеа-ҳодисалардан тегишли хулосалар чиқаради.
Бугунги тинчлик ва хотиржамлигимизга бепарво бўлмай, қадрига етайлик, асраб-авайлайлик!
Расулхон АҲРОРОВ,
Сўх тумани “Қози Неъматуллоҳ” масжиди имом-хатиби
