Савол: Ассалому алайкум!
— Мен қўлимда доим тасбеҳ айтаман. Лекин “Ибодати Исломия” китобининг 108-бетида қўлда тасбеҳ айтиш макруҳ амал дейилганини ўқиб қолдим. Шу гапни кенгроқ тушунтириб берсангиз? Айтиб юрадиган тасбиҳларимизни қўлда санашимиз мумкин эмасми?
Жавоб: Ва алайкум ассалом!
— Бисмиллаҳир Роҳманир Роҳийм. Сиз мазкур китобнинг намознинг макруҳлари бобидаги оят ва тасбеҳларни бармоқ билан санаш ҳақидаги гапни айтяпсиз. Бу макруҳлик сиз тушунгандек намоздан кейин ёки бошқа вақтларда ҳам қўлда тасбиҳ айтиш эмас, балки намоз ўқиётганда, яъни “Аллоҳу акбар” деб намозни бошлаб, салом бергунча бўлган жараёнда ўқиётган оят ёки руку, сажда тасбиҳларини бармоқ билан санаш макруҳдир. Масалан, намоздан кейин 33 мартадан айтиладиган зикрларни қўл ёки тасбиҳлар ёрдамида санаш асло макруҳ бўлмайди.
“Ҳатто нафл намоз бўлса ҳам, намоз ичида оят, сура ва тасбиҳларни қўлда санаш танзиҳий макруҳдир. Лекин намоз ташқарисида бундай қилиш макруҳ эмас” (“Раддул муҳтор” китоби). Валлоҳу аълам.
Ўзбекистон мусулмонлари идораси
Фатво маркази
***
Savol: Assalomu alaykum!
— Men qo‘limda doim tasbeh aytaman. Lekin “Ibodati Islomiya” kitobining 108-betida qo‘lda tasbeh aytish makruh amal deyilganini o‘qib qoldim. Shu gapni kengroq tushuntirib bersangiz? Aytib yuradigan tasbihlarimizni qo‘lda sanashimiz mumkin emasmi?
Javob: Va alaykum assalom!
— Bismillahir Rohmanir Rohiym. Siz mazkur kitobning namozning makruhlari bobidagi oyat va tasbehlarni barmoq bilan sanash haqidagi gapni aytyapsiz. Bu makruhlik siz tushungandek namozdan keyin yoki boshqa vaqtlarda ham qo‘lda tasbih aytish emas, balki namoz o‘qiyotganda, ya’ni “Allohu akbar” deb namozni boshlab, salom berguncha bo‘lgan jarayonda o‘qiyotgan oyat yoki ruku, sajda tasbihlarini barmoq bilan sanash makruhdir. Masalan, namozdan keyin 33 martadan aytiladigan zikrlarni qo‘l yoki tasbihlar yordamida sanash aslo makruh bo‘lmaydi.
“Hatto nafl namoz bo‘lsa ham, namoz ichida oyat, sura va tasbihlarni qo‘lda sanash tanzihiy makruhdir. Lekin namoz tashqarisida bunday qilish makruh emas” (“Raddul muhtor” kitobi). Vallohu a’lam.
O‘zbekiston musulmonlari idorasi
Fatvo markazi
