Савол: Ассалому алайкум!
— Менинг отам спиртли ичимликларни кўп истеъмол қилади. Отам менга жуда кўп ароқ олиб келишимни буюради. Мен бирон марта ҳам йўқ демай имкониятим даражасида олиб келаман. Шу ишим тўғрими? Йўқ десам мендан кўнгли қолади деб қўрқаман. Жавоб учун олдиндан раҳмат. Aллоҳ рози бўлсин.
Жавоб: Ва алайкум ассалом!
— Шариатда ота-онанинг ҳаққи улуғ. Мусулмон одам уларнинг розилигини олишга ҳаракат қилиши керак. Зеро Аллоҳ таоло Қуръони каримнинг бир неча ўринларида ота-онага итоат қилишни Ўзининг итоати ортидан келтиради. Бу уларнинг ҳаққи улуғлигини билдиради. Аммо Расулуллоҳ саллаллоҳу алайҳи васаллам: “Холиқнинг маъсиятида махлуққа итоат йўқ» – дедилар”. Яъни, бандани рози қиламан деб, Аллоҳ таолони норози қиладиган нарсани қилиб бўлмайди. Бу эса ота-онага итоатнинг вожиблиги Аллоҳга гуноҳ бўлмайдиган ишларда эканини билдиради. Шунинг учун мабодо, ота она томонидан гуноҳга буюрилса, уларга яхши сўз билан бу ишни қилолмаслигини тушунтиради ва гуноҳ бўлмайдиган барча ишларда эса, хизматга тайёр эканини билдиради.
Шу ўринда ота-оналарга бир насиҳат қилмоқчимиз. Аллоҳ таоло сизга шундай итоаткор, инсофли фарзанд насиб қилибди. Бу фарзанд келажакда иншааллоҳ, сизлар қабрда савобга муҳтож бўлиб ётганингизда ортиларингиздан дуо қилиб сизларнинг корингизга ярайди. Шундай экан ота-оналар Аллоҳ таоло уларга солиҳ фарзанд ато қилганига шукр қилишлари ва уларни гуноҳ ишларга буюрмасликлари шариатимиз талабидир. Валлоҳу аълам!
ЎМИ Фатво ҳайъати
