Савол: Ассалому алайкум!
— Бир биродаримиз гўрков бўлиб ишлайди. Шу киши қабристондаги жойда овқат қилиб бизни меҳмон қилмоқчи. Биз қабристонда овқатланиш жоизмас десак, ундай эмас деяпти. Шу масалада аниқлик киритиб берсангизлар?
Жавоб: Ва алайкум ассалом!
— Қабристон вақф жой бўлиб у ерга охиратни, ўлимни эслаш ва марҳумларнинг ҳаққига дуо хайр қилиш учун борилади. Расулуллоҳ саллаллоҳу алайҳи васаллам: “Ўлим насиҳат олиш учун етарли ҳодисадир”, деганлар (Имом Табароний ривояти).
Абу Ҳурайра разияллоҳу анҳудан ривоят қилинади: Расулуллоҳ саллаллоҳу алайҳи васаллам: “Бирингизнинг бир чўғ устига ўтириб, кийими титилиб, терисигача етиб бориши унинг учун қабрга ўтирганидан яхшидир”, дедилар. (Имом Муслим ривояти).
Қабристондан бошқа жойларда ҳам емакхоналар кўпайган пайтда қабрстонни емакхонага айлантириб олишдан сақланиш керак. Валлоҳу аълам.
ЎМИ Фатво ҳайъати
