Савол: Ассалому алайкум!
— Рўзадор одам қон анализи топширса бўладими?
Жавоб: Ва алайкум ассалом!
— Ҳа, рўзадор одам турли мақсадларда қон топшириши мумкин, бу иш билан унинг рўзаси очилмайди. Чунки рўза ичга кирувчи нарсалар сабабли бузилади. Лекин рўзадор қон топширса, заифлашиб қоладиган бўлса, макруҳ бўлади. Бу ҳолатда қон топширишни ифтордан кейинга қолдириш мақсадга мувофиқ бўлади. Валлоҳу аълам.
***
Савол: Ассалому алайкум!
— Камқонлик касаллиги билан касалланганман 10 йил аввал. Шифокорлар ўшанда рўза тутиш мумкин эмаслигини айтишган. Бу ҳолатда нима қилсам тўғри бўлади?
Жавоб: Ва алайкум ассалом!
— Бемор киши рўза тутса, касаллиги оғирлашса ёки касаллик чўзилишидан қўрқса Рамазон ойи рўзасини тутмаслигига шариатимиз рухсат беради. У киши тузалганидан кейин рўзанинг қазосини тутиб беради. Тузалишидан умид бўлмаса, рўзанинг фидясини беради. Бемор киши рўза тутиш масаласида дину диёнатдан хабари бор, моҳир шифокор ёки табиб билан маслаҳат қилиб, унинг кўрсатмасига амал қилишлари керак. Валлоҳу аълам.
ЎМИ Фатво ҳайъати
