Савол: Ассалому алайкум!
— Баъзи чет мамлакатларда хуфтон намозидан кейин ўтирган ҳолда “қабр нури намози”ни ўқишар ва бошқаларни ҳам тарғиб қилишар экан. Шу намоз аслида шариатда борми?
Жавоб: Ва алайкум ассалом!
— Динимизда “Қабр нури намози” деб аталадиган махсус намоз йўқ. Умуман олганда, туннинг энг охирги намози витр бўлиши мустаҳабдир. Аммо витрдан кейин ҳам нафл ўқиш жоиз. Чунки Расулуллоҳ соллаллоҳу алайҳи васаллам баъзан витрдан кейин намоз ўқиганлари маълум. Улар эҳтимол У зотнинг ана шу амаллари туфайли шундай дейишаётган бўлсалар керак. Оиша, Умму Салама ва Абу Умома розияллоҳу анҳум каби саҳобийлар Расулуллоҳ соллаллоҳу алайҳи васалламнинг витрдан кейин ўтирган ҳолда икки ракат намоз ўқиганларини ривоят қилишган.
Уламолар ўша ҳадисни Сарвари олам алайҳиссалом витрдан кейин ҳам нафл ўқиш мумкин эканини билдириш учун ўқиганлар, дейишган. Яна бир гуруҳ уламолар У зот алайҳиссалом таҳажжудни жуда ҳам узоқ ўқиганларидан оёқлари шишиб кетар эди, шу боис витрдан кейин дам олиш учун ўтириб икки ракат нафл ўқир эдилар, деб изоҳлашган. Уни «қабр нури намози» деб номлаб, доимий суннат сифатида тарғиб қилиш нотўғридир. Валлоҳу аълам.
Ўзбекистон мусулмонлари идораси
Фатво маркази
***
Savol: Assalomu alaykum!
— Ba’zi chet mamlakatlarda xufton namozidan keyin o‘tirgan holda “qabr nuri namozi”ni o‘qishar va boshqalarni ham targ‘ib qilishar ekan. Shu namoz aslida shariatda bormi?
Javob: Va alaykum assalom!
— Dinimizda “Qabr nuri namozi” deb ataladigan maxsus namoz yo‘q. Umuman olganda, tunning eng oxirgi namozi vitr bo‘lishi mustahabdir. Ammo vitrdan keyin ham nafl o‘qish joiz. Chunki Rasululloh sollallohu alayhi vasallam ba’zan vitrdan keyin namoz o‘qiganlari ma’lum. Ular ehtimol U zotning ana shu amallari tufayli shunday deyishayotgan bo‘lsalar kerak. Oisha, Ummu Salama va Abu Umoma roziyallohu anhum kabi sahobiylar Rasululloh sollallohu alayhi vasallamning vitrdan keyin o‘tirgan holda ikki rakat namoz o‘qiganlarini rivoyat qilishgan.
Ulamolar o‘sha hadisni Sarvari olam alayhissalom vitrdan keyin ham nafl o‘qish mumkin ekanini bildirish uchun o‘qiganlar, deyishgan. Yana bir guruh ulamolar U zot alayhissalom tahajjudni juda ham uzoq o‘qiganlaridan oyoqlari shishib ketar edi, shu bois vitrdan keyin dam olish uchun o‘tirib ikki rakat nafl o‘qir edilar, deb izohlashgan. Uni «qabr nuri namozi» deb nomlab, doimiy sunnat sifatida targ‘ib qilish noto‘g‘ridir. Vallohu a’lam.
O‘zbekiston musulmonlari idorasi
Fatvo markazi
