Имом-хатиблар томонидан олиб борилаётган ишларни янги босқичга кўтариш, фаолиятни замонавий талаблар асосида такомиллаштириш, хусусан, соҳадаги ишларни рақамлаштирган ҳолда умумлаштириб бориш, маълумотлар базасини тизимли шакллантириш ҳамда шаффофликни таъминлаш мақсадида Ўзбекистон мусулмонлари идораси раиси, муфтий шайх Нуриддин Холиқназар ҳазратларининг ташаббуслари билан электрон платформа жорий қилинди.
Ушбу платформадан самарали фойдаланишни йўлга қўйиш мақсадида Фарғона шаҳрида имом-хатиблар учун тадбир ташкил этилди. Унда Фарғона вилояти бош имом-хатиби Убайдуллоҳ домла Абдуллаев, ЎМИ масжидлар билан ишлаш бўлими етакчи мутахассиси Дилмурод Рахимов, шунингдек, Фарғона, Андижон ва Наманган вилоятларидан ташриф буюрган шаҳар ва туман бош имом-хатиблари ҳамда вакилликларнинг кадрлар ва масжидлар билан ишлаш бўйича мутахассислари иштирок этдилар.
Мазкур электрон платформа имом-хатиблар фаолиятини таҳлил қилиш, ҳисоботларни электрон шаклда юритиш, режа ва натижаларни аниқ кўрсаткичлар орқали баҳолаш имконини беради. Шунингдек, KPI (асосий самарадорлик кўрсаткичлари) тизими орқали соҳа ходимлари фаолиятини баҳолаб бориш механизми жорий этилаётгани алоҳида таъкидланди.
Тақдимот жараёнида платформада имом-хатиблар фойдаланадиган қисмлар, шунингдек, модератор ва администраторлар учун мўлжалланган бўлимлар бўйича батафсил тушунчалар берилди. Иштирокчилар платформа орқали маълумот киритиш, таҳрирлаш, назорат қилиш ва умумий таҳлилларни амалга ошириш тартиблари билан яқиндан танишдилар.
Тадбир якунида иштирокчилар мазкур электрон платформа имом-хатиблар фаолиятини самарали ташкил этиш, вақт ва ресурсларни тежаш, шунингдек, жойларда олиб борилаётган ишлар сифатини янада оширишга хизмат қилишини таъкидладилар. Шу билан бирга, бундай замонавий ёндашувлар диний-маърифий соҳадаги ишларни тизимли ва мақсадли равишда ривожлантиришга муҳим ҳисса қўшиши қайд этилди.
***
Imom-xatiblar tomonidan olib borilayotgan ishlarni yangi bosqichga ko‘tarish, faoliyatni zamonaviy talablar asosida takomillashtirish, xususan, sohadagi ishlarni raqamlashtirgan holda umumlashtirib borish, ma’lumotlar bazasini tizimli shakllantirish hamda shaffoflikni ta’minlash maqsadida O‘zbekiston musulmonlari idorasi raisi, muftiy shayx Nuriddin Xoliqnazar hazratlarining tashabbuslari bilan elektron platforma joriy qilindi.
Ushbu platformadan samarali foydalanishni yo‘lga qo‘yish maqsadida Farg‘ona shahrida imom-xatiblar uchun tadbir tashkil etildi. Unda Farg‘ona viloyati bosh imom-xatibi Ubaydulloh domla Abdullayev, O‘MI masjidlar bilan ishlash bo‘limi yetakchi mutaxassisi Dilmurod Raximov, shuningdek, Farg‘ona, Andijon va Namangan viloyatlaridan tashrif buyurgan shahar va tuman bosh imom-xatiblari hamda vakilliklarning kadrlar va masjidlar bilan ishlash bo‘yicha mutaxassislari ishtirok etdilar.
Mazkur elektron platforma imom-xatiblar faoliyatini tahlil qilish, hisobotlarni elektron shaklda yuritish, reja va natijalarni aniq ko‘rsatkichlar orqali baholash imkonini beradi. Shuningdek, KPI (asosiy samaradorlik ko‘rsatkichlari) tizimi orqali soha xodimlari faoliyatini baholab borish mexanizmi joriy etilayotgani alohida ta’kidlandi.
Taqdimot jarayonida platformada imom-xatiblar foydalanadigan qismlar, shuningdek, moderator va administratorlar uchun mo‘ljallangan bo‘limlar bo‘yicha batafsil tushunchalar berildi. Ishtirokchilar platforma orqali ma’lumot kiritish, tahrirlash, nazorat qilish va umumiy tahlillarni amalga oshirish tartiblari bilan yaqindan tanishdilar.
Tadbir yakunida ishtirokchilar mazkur elektron platforma imom-xatiblar faoliyatini samarali tashkil etish, vaqt va resurslarni tejash, shuningdek, joylarda olib borilayotgan ishlar sifatini yanada oshirishga xizmat qilishini ta’kidladilar. Shu bilan birga, bunday zamonaviy yondashuvlar diniy-ma’rifiy sohadagi ishlarni tizimli va maqsadli ravishda rivojlantirishga muhim hissa qo‘shishi qayd etildi.
