Ўзбекистон мусулмонлари идораси раиси, муфтий шайх Нуриддин Холиқназар ҳазратларининг ташаббуси билан Рамазон ойида ўтказиладиган хатми Қуръон тадбирларининг савиясини янада ошириш, шунингдек, ушбу маросимларда иштирок этадиган қориларнинг тайёргарлигини чуқур текшириш мақсадида тадбир ташкил этилди.
Мазкур тадбир Фарғона шаҳридаги Аҳмаджон қори масжидида бўлиб ўтди. Унда «Қуръони карим ва тажвидни ўргатиш» бўлими ходимлари, вилоят вакиллиги масъуллари, шунингдек, вилоятимиздаги масжидларда хатми Қуръон ўтказиши белгиланган қорилар иштирок этдилар.
Тадбир аввалида Рамазон ойи ва хатми Қуръоннинг фазилати, шунингдек, уларни ўтказишда риоя қилиниши лозим бўлган тартиблар ҳақида атрофлича сўз юритилди. Хусусан, Қуръон тиловатининг одоби, тажвид қоидаларига амал қилиш, овоз ва оҳангни меъёрда сақлаш, жамоат олдида масъулият ҳисси билан чиқиш каби масалаларга эътибор қаратилди.
Шунингдек, тадбир давомида устозлар томонидан қориларнинг амалий тайёргарлиги текширилди. Улар Қуръон тиловати жараёнида йўл қўйилаётган айрим камчиликлар бўйича тушунтиришлар бериб, ҳар бир қорига алоҳида тарзда керакли тавсия ва маслаҳатларни билдирдилар. Бу эса қориларнинг Рамазон ойидаги хатми Қуръон маросимларига янада пухта ва масъулият билан тайёргарлик кўришларига хизмат қилади.
***
O‘zbekiston musulmonlari idorasi raisi, muftiy shayx Nuriddin Xoliqnazar hazratlarining tashabbusi bilan Ramazon oyida o‘tkaziladigan xatmi Qur’on tadbirlarining saviyasini yanada oshirish, shuningdek, ushbu marosimlarda ishtirok etadigan qorilarning tayyorgarligini chuqur tekshirish maqsadida tadbir tashkil etildi.
Mazkur tadbir Farg‘ona shahridagi Ahmadjon qori masjidida bo‘lib o‘tdi. Unda «Qur’oni karim va tajvidni o‘rgatish» bo‘limi xodimlari, viloyat vakilligi mas’ullari, shuningdek, viloyatimizdagi masjidlarda xatmi Qur’on o‘tkazishi belgilangan qorilar ishtirok etdilar.
Tadbir avvalida Ramazon oyi va xatmi Qur’onning fazilati, shuningdek, ularni o‘tkazishda rioya qilinishi lozim bo‘lgan tartiblar haqida atroflicha so‘z yuritildi. Xususan, Qur’on tilovatining odobi, tajvid qoidalariga amal qilish, ovoz va ohangni me’yorda saqlash, jamoat oldida mas’uliyat hissi bilan chiqish kabi masalalarga e’tibor qaratildi.
Shuningdek, tadbir davomida ustozlar tomonidan qorilarning amaliy tayyorgarligi tekshirildi. Ular Qur’on tilovati jarayonida yo‘l qo‘yilayotgan ayrim kamchiliklar bo‘yicha tushuntirishlar berib, har bir qoriga alohida tarzda kerakli tavsiya va maslahatlarni bildirdilar. Bu esa qorilarning Ramazon oyidagi xatmi Qur’on marosimlariga yanada puxta va mas’uliyat bilan tayyorgarlik ko‘rishlariga xizmat qiladi.
